ԵՐԵՎԱՆ, 6 փետրվարի — Sputnik. Հայաստանի հավաքականի և «Մանչեսթեր Յունայթեդի» կիսապաշտպան Հենրիխ Մխիթարյանը, մեկնաբանելով «Լեսթերի» հետ խաղն, ասել է, որ թիմը պատրաստ էր խաղի ընթացքում փոխել սխեման, գրված է ակումբի կայքում։
«Կարմիր սատանաների» մարզիչ Ժոզե Մոուրինյուն «Լեսթերի» հետ հանդիպումը սկսեց` օգտագործելով 4-4-2 սխեման, սակայն այնուհետև փոխեց դասավորվածությունը 4-2-3-1-ով, ինչն, արդյունքում, թույլ տվեց թիմին ջախջախել Անգլիայի գործող չեմպիոնին։
«Մենք նախատեսել էինք դա այս խաղի համար։ Մարզիչն ասաց, որ եթե երկու հարձակվողների հետ պլանավորվածը չստացվի, մենք կփորձենք փոխել սխեման, ինչն էլ արեցինք խաղի ընթացքում։ Այնպես որ, այստեղ մեզ համար նորություն չկար»,- ասել է Մխիթարյանը Sky Sports-ին տված հարցազրույցում։
Նա նշել է, որ մի շարք խաղի ժամանակ հեշտությամբ փոխվել է խաղային սխեման։
«Կարծում եմ, այս անգամ փոփոխություններն ի օգուտ մեզ էին, և մենք լավ արդյունք ցույց տվեցինք դրանից հետո։ Փորձում էինք ավելի շատ վտանգավոր դրություններ ստեղծել, և դա աշխատեց», — ասել է նա։
«Ցանկացած մարզադաշտում հեշտ է խաղալը, եթե թիմը լավ է խաղում։ Կարևոր չէ, որ դիրքում ես գործում։ Խաղի սկզբում մարզիչը որոշեց, որ ես հարձակվողի հետ միասին պետք է խաղամ, և ես պարզապես փորձեցի անել այն, ինչ կարող էի», — ավելացրեց կիսապաշտպանը։
«Մանչեսթեր Յունայթեդի» թիմը նախօրեին ջախջախեց Անգլիայի գործող չեմպիոն «Լեսթեր»-ին 3:0 հաշվով։ Մխիթարյանը ճանաչվեց լավագույն խաղացող։
Հայ կիսապաշտպանն իր ֆեյսբուքյան էջում շնորհակալություն է հայտնել թիմի երկրպագուներին՝ աջակցության համար։
