ԵՐԵՎԱՆ, 1 դեկտեմբերի — Sputnik. Անգլիայի Գավաթի խաղարկության 1/4 եզրափակչում «Մանչեսթեր Յունայթեդը» սեփական հարկի տակ 4:1 հաշվով հաղթեց «Վեսթ Հեմին»: Հանդիպման ընթացքում փայլուն խաղ ցուցադրեց հայ կիսապաշտպան Հենրիխ Մխիթարյանը, որը դարձավ երկու գոլային փոխանցման հեղինակ: Վերջինս փոխարինվեց խաղի 90-րդ րոպեին:
Թեև Մխիթարյանը գոլի հեղինակ չի դարձել, բայց խաղից հետո մանչեսթերյան ակումբի երկրպագուները հենց հայ ֆուտբոլիստին են ընտրել որպես հանդիպման լավագույն ֆուտբոլիստ:
Երկրպագուները առաջարկված երեք թեկնածուներից ամենաշատ ձայները տվել են Հայաստանի հավաքականի ավագ Հենրիխ Մխիթարյանին: Երկրորդն Անտոնի Մարսիալն է, երրորդը` Ուեյն Ռունին:
Խաղից առաջ թիմերը մեկ րոպե լռությամբ հարգանքի տուրք մատուցեցին Կոլումբիայում տեղի ունեցած ավիավթարից զոհված բրազիլական «Շապեկոենսեի» անձնակազմի և ֆուտբոլիստների հիշատակին:
«Մանչեսթեր Յունայթեդի» գլխավոր մարզիչ Ժոզե Մոուրինյուն խաղից հետո մեկնաբանել է Հենրիխ Մխիթարյանի խաղը:
«Շատ ուրախ եմ Մխիթարյանի խաղի համար, քանի որ մենք խաղում էինք Պրեմիեր լիգան ներկայացնող թիմի հետ, որն ունի Պրեմիեր լիգայի որակներ, Պրեմիեր լիգային հատուկ բնավորություն: Մենք իսկապես երջանիկ ենք, քանի որ գիտենք, թե ինչի համար ենք նրան ձեռք բերել ու սպասում ենք առաջխաղացման, որն արդեն նկատում ենք»,- նշել է Մոուրինյուն:
Հիշեցնենք, որ Հենրիխ Մխիթարյանը լավագույնն էր ճանաչվել նաև Եվրոպա լիգայի խաղարկության խմբային փուլի հինգերորդ տուրի՝ «Ֆեյենորդի» հետ խաղում (4:0):