ԵՐԵՎԱՆ, 2 հուլիսի - Sputnik. Հայաստանում հունիսի 15–29-ն ընկած ժամանակահատվածում օդի ջերմաստիճանը գերազանցել է երբևիցե դիտված պատմական առավելագույն ջերմաստիճանները։ Լրագրողների հետ հանդիպմանն այս մասին հայտարարեց ՀՀ շրջակա միջավայրի նախարարության Հիդրոօդերևութաբանության և մոնիթորինգի կենտրոնի փոխտնօրեն Գագիկ Սուրենյանը:
«Հունիսի 23-25-ը Արարատյան դաշտում և Երևանում ունեցանք 41,2 աստիճան տաքություն, որը մոտ երկու աստիճանով գերազանցեց 1998 թվականին դիտված պատմական ռեկորդը։ Այսինքն, այս տարվա հունիսը օդերևութաբանության պատմության մեջ դարձավ և՛ միջին ջերմաստիճանով, և՛ շոգերի տևողությամբ, և՛ ջերմաստիճանի առավելագույն ցուցանիշներով ամենատաքը», -ասաց Սուրենյանը։
Ինչ վերաբերում է տեղումներին, ապա հունիսը, նրա խոսքով, ռեկորդային էր դրանց բացակայությամբ։ Մասնավորապես, Գեղարքունիքի և Արարատի մարզերի առանձին հատվածներում, Երևանի տարբեր հատվածներում հունիսին տեղումներ ընդհանրապես չեն եղել, իսկ հյուսիսային շրջաններում ՝ Լոռիում, Շիրակում և Տավուշում ՝ տեղումների ամսական նորմայի ընդամենը 30-40 տոկոսն է եղել։
Սուրենյանը տեղեկացրեց, որ հրդեհների առաջացման վտանգի հետ կապված ամենաբարձր իրավիճակն այժմ Արարատի, Վայոց Ձորի և Սյունիքի մարզերում է։
«2000 թվականից սկսած հանրապետության տարածքում ամսական միջին ջերմաստիճանն աստիճանաբար բարձրացել է։ Իսկ ահա 2010 թվականից առայսօր մենք չենք ունեցել մի տարի, որ օդի ջերմաստիճանն Արարատյան դաշտում չբարձրանա 40-41 աստիճան», - ասաց նա։
Նշենք, որ առաջիկա օրերին` մինչև հուլիսի 6-ը, Արարատյան դաշտում և նախալեռներում, Վայոց Ձորի նախալեռներում, Սյունիքի հովտային գոտում և Երևանում սպասվում է բարձր կարգի հրդեհավտանգ իրավիճակ:
Այսօր և վաղը, ինչպես նաև հուլիսի 6-ին Հայաստանի առանձին շրջաններում կեսօրից հետո սպասվում է կարճատև անձրև և ամպրոպ, առանձին հատվածներում հնարավոր է նաև կարկուտ։
