ԵՐԵՎԱՆ, 1 մայիսի - Sputnik. Շենգավիթ վարչական շրջանի ղեկավար Ռազմիկ Մկրտչյանը (ՔՊ կուսակցություն) Facebook–ի իր էջում մանրամասներ է հայտնել գիշերը կատարված դեպքից։
Արդեն հայտնել ենք, որ այսօր՝ մայիսի 1-ին, «ռազբորկա» է տեղի ունեցել Երևանում` Թոխմախի գերեզմանատանը, կան վիրավորներ։ Ըստ տեղեկությունների` նրանց հիվանդանոց տեղափոխողների մեջ են եղել նաև Շենգավիթի և Մալաթիայի թաղապետները։
«Երեկ երեկոյան՝ աշխատանքային հանդիպումից հետո, Դավիթ Կարապետյանի հետ (Մալաթիայի թաղապետ,-խմբ.), նրա մեքենայով Նոր Նորքից վերադառնում էինք: Դավիթ Բեկ փողոցում մեքենան կանգնեցրեց մի մարդ, որը, դատելով տեսքից, լավ վիճակում չէր ու օգնության կարիք ուներ: Քաղաքացին ասաց, որ վիրավորված է և խնդրեց փրկել իր կյանքը: Բնականաբար, նրան շտապ տեղափոխեցինք մոտակա հիվանդանոց»,–գրել է Մկրտչյանը:
Նրա խոսքով` քաղաքացու կյանքին վտանգ չի սպառնում, և նրա (ինչպես նաև ըստ մամուլի՝ մյուս վիրավորների) առողջությունը շուտ կվերականգնվի: Մկրտչյանը հորդորում է քաղաքացիական պարտքի և մարդկային բնական վերաբերմունքի դրսևորումը չտեղափոխել ենթադրությունների, առավել ևս շահարկումների տիրույթ:
Հիշեցնենք` գիշերը ժամը 00։20-ի սահմաններում Էրեբունի բժշկական կենտրոնից ոստիկանության Էրեբունու բաժին ահազանգ էր ստացվել, որ իրենց մոտ են տեղափոխվել 3 քաղաքացի` հրազենային վնասվածքներով, 1 հոգի էլ դանակահարված։
Sputnik Արմենիային Երևանի քաղաքապետարանից ավելի ուշ վստահեցրել էին, որ Շենգավիթի ու Մալաթիայի թաղապետները գիշերային «ռազբորկային» չեն մասնակցել։ Նրանք պարզապես անցնելիս են եղել այդ տարածքով և տեսնելով, որ վիրավորներ կան, օգնել են նրանց հասցնել հիվանդանոց։
