ԵՐԵՎԱՆ, 12 ապրիլի – Sputnik. ՏՄՊՊՀ-ն վերահսկում է ձվի շուկայում հետտոնական իրավիճակն ու Զատիկից հետո ձվի գնանկման ու շուկայում դրա քանակի մասին հրապարակումները։ Այսօր լրագրողների հետ հանդիպմանը տեղեկությունը հայտնեց հանձնաժողովի նախագահ Գեղամ Գևորգյանը։
«Այս պահին կարող եմ միայն հստակ ասել, որ չկա տեղեկատվություն, որը մենք չենք հավաքագրում։ Մանրամասն վերլուծության արդյունքում ՏՄՊՊՀ–ն իր ֆունկցիան կիրականացնի»,– ասաց Գևորգյանը։
Նա նաև հիշեցրեց, որ ձվի շուկայում դեֆիցիտի ու գների բարձրացման հարցով հանձնաժողովը վարույթ է հարուցել, որն այս պահին դեռ ընթացքի մեջ է։
«Բայց սա էլ ասեմ ու թեման փակենք` ակնկալիքը մեր հանձնաժողովից պետք է լինի մեր լիազորությունների շրջանակում։ Մենք չենք կարող ձու ներմուծել կամ արտադրել։ Մենք միայն կարողանում ենք վրահսկել գերիշխող դիրք ունեցող տնտեսվարող սուբյեկտների վարքագիծը»,– ասաց Գևորգյանը` հիշեցնելով, որ 2020թ–ի տարեվերջին ՏՄՊՊՀ–ն արդեն տուգանքի որոշումներ էր կայացրել ձու արտադրողների նկատմամբ։ Այդ որոշումները տնտեսվարողները վիճարկում են դատարանում ու, բնականաբար, տուգանքներն առայժմ չեն վճարել։
«Դատարանը կորոշի գործի ելքը»,– ասաց նա` ձեռնպահ մնալով գնագահատականներից։
Հիշեցնենք՝ մարտի 30-ին հանձնաժողովը հայտարարեց, որ վարչական վարույթ է հարուցել ձու արտադրող խոշոր տնտեսվարող սուբյեկտների նկատմամբ՝ «Վարիանտ Գրուպ», «Լուսակերտ», «Լուսակերտի Էլիտ», «Գնթունիք», «Աշտարակ ձու», «Արզնու տոհմային ԹՏԽ», «Արաքս թռչնաֆաբրիկայի» կողմից գերիշխող դիրքի հնարավոր չարաշահման և/կամ հակամրցակցային համաձայնության հատկանիշներով:
Ձվի գինը մինչև Զատիկ կիջնի. ՏՄՊՊՀ նախագահ
Մարտի 29-ին Գևորգյանն ասել էր, որ թռչնաֆաբրիկաները խոստացել են Զատիկի համար բավարար քանակությամբ ձվեր արտադրել։ Նրա խոսքով` մինչև Զատիկ պետք է գնանկում լիներ։
Գնանկում տեղի չունեցավ։ Ձվի գինը Զատիկի նախօրեին ու Զատիկի օրը գերազանցեց 200 դրամը։ Իսկ խանութներում այդ օրրին ձու ընդհանրապես հնարավոր չէր գտնել։
