ԵՐԵՎԱՆ, 10 մարտի - Sputnik. 168.am-ի էլեկտրոնային հասցեին սկանդալային տեսանյութեր են ստացվել, որոնցում երևում է, որ վարչապետ Նիկոլ Փաշինյանի` իրավական գծով խորհրդական Աննա Վարդապետյանը միջամտում է Հայաստանի ֆուտբոլի ֆեդերացիայի նախկին նախագահ Ռուբեն Հայրապետյանի և նրա որդու` Ռաֆիկ Հայրապետյանի նկատմամբ հարուցված քրեական գործերի նախաքննությանը։
Վարդապետյանն ուղղումներ է անում քրգործերի նյութերի մեջ և հրահանգավորում հիմնական դերակատարներին։
«Փաստեր են հրապարակված, որ գործով քննիչ Արթուր Այվազյանը, քրեական ոստիկանության բաժնի պետ Ռուբեն Դավթյանը էլեկտրոնային նամակագրությամբ հանձնարարականներ են ստանում Աննա Վարդապետյանից կոնկրետ որոշումների։ Մասնավորապես, Ռուբեն Հայրապետյանին և նրա որդուն որպես մեղադրյալ ներգրավելու մասով»,–նշված է կայքում։
Նույն քննիչ Արթուր Այվազյանը, ըստ տեսանյութերի, Վարդապետյանին է փոխանցում բանկային գաղտնիք կազմող տեղեկություններ։
Ի դեպ, տեսանյութերն ուղարկված են նաև տելեգրամային մի շարք ալիքների:
Հայրապետյանի պաշտպան Ամրամ Մակինյանն էլ Facebook–ի իր էջում գրառում է կատարել` հայտնելով, որ դեպքի առնչությամբ առավոտյան հանցագործության մասին գրավոր հաղորդում է ներկայացնելու գլխավոր դատախազություն։
Նա նաև հավելել է, որ տեսանյութերը մանրամասն ուսումնասիրելուց հետո կհրավիրի մամուլի ասուլիս:
Հիշեցնենք՝ Ռուբեն Հայրապետյանը որպես մեղադրյալ է ներգրավել ՀՀ քրեական օրենսգրքի 119-րդ հոդվածի 2-րդ մասի 3-րդ, 5-րդ կետով (ֆիզիկական ուժեղ ցավ կամ հոգեկան տառապանք պատճառելը), 133-րդ հոդվածի 2-րդ մասի 1-ին, 2-րդ, 7-րդ կետերով (մի խումբ անձանց կողմից շահադիտական դրդումներով մարդուն առևանգելը) և 322-րդ հոդվածի 2-րդ մասով (ինքնիրավչություն):
Նրան մեղադրանք է առաջադրվել «Հարսնաքար» համալիրի գործադիր մարմնի ղեկավարի նկատմամբ առերևույթ կատարված ինքնիրավչության, նրան ազատությունից ապօրինի զրկելու, ֆիզիկական ուժեղ ցավ, հոգեկան ուժեղ տառապանք պատճառելու դեպքերի առթիվ քննվող քրեական գործով:
Հայրապետյանի հանդեպ հետախուզում էր հայտարարվել։
Նույն մեղադրանքները ներկայացվել են նրա որդուն՝ Ռաֆիկ Հայրապետյանին, որին կալանավորելու միջնորդությունը մերժվել է, նա ազատության մեջ է։
«Հարսնաքարի» նախկին տնօրենն ինքն է գույք հափշտակել. Ռուբեն Հայրապետյանի փաստաբան
