ԵՐԵՎԱՆ, 26 փետրվարի - Sputnik. 2018-ի մայիսից ի վեր զինված ուժերը համալրվել են հակաօդային պաշտպանության միջոցներով, հրետանային միջոցներով, զենիթային կայանքներով, հրաձգային զենքերով, զինամթերքով, 310 միավոր ավտոմոբիլային տեխնիկայով: Facebook սոցցանցի իր էջում նման գրառում է արել ՀՀ վարչապետ Նիկոլ Փաշինյանը` հայտնելով, թե երկու փաստ է ուզում ընդգծել, թե ինչ է արվել այս տարիներին բանակի համար։
«2020-ի բյուջեում ՊՆ–ին հատկացվել է 307 միլիարդ դրամ, որը 2018-ի փաստացի ցուցանիշը գերազանցում է 28%-ով կամ 66 միլիարդ դրամով, իսկ 2017-ի փաստացիի համեմատ ավել է մոտ 4.5%-ով: 2018-ի մայիսից ի վեր ՀՀ–ն ձեռք է բերել տեսանելի ժամանակահատվածի համեմատ աննախադեպ քանակի զենք-զինամթերք: Ի դեպ, մեր ՊՆ–ն ու Գլխավոր շտաբն են որոշել ինչ գնել, կառավարությունը տրամադրել է անհրաժեշտ գումարները»,–գրել է նա։
Նա անդրադարձել է նաև զինծառայողների ամսական մաքուր աշխատավարձը բարձրացմանը։ Վարչապետը հայտնել է, որ, մասնավորապես, կառավարության որոշմամբ 2019 թ. հունիսի 1-ից գնդի հրամանատարի աշխատավարձը բարձրացել է 4.6 տոկոսով, գնդի հրամանատարի տեղակալինը` 12.7, գումարտակի հրամանատարինը` 23, վաշտի հրամանատարինը` 32.6 , դասակի հրամանատարինը` 26.2, ավագ ենթասպայինը` 18, շարքային պայմանագրայինինը` 13.7 և սերժանտ պայմանագրայինինը (դասընթաց անցած)` 22 տոկոսով։
Նիկոլ Փաշինյանը հրաման տվեց բոլոր զինվորներին, սպաներին, գեներալներին
Հիշեցնենք, որ երեկ` փետրվարի 25-ին, ԶՈւ Գլխավոր շտաբը պահանջեց Փաշինյանի հրաժարականը։ Դա տեղի ունեցավ այն բանից հետո, երբ վարչապետը պաշտոնից հեռացրեց ԳՇ պետի առաջին տեղակալ Տիրան Խաչատրյանին։
Ի պատասխան Փաշինյանը հայտարարեց ռազմական հեղաշրջման փորձի մասին և Հանրապետության հրապարակում հավաքվելու կոչ արեց իր համակիրներին։ Նա հայտնեց նաև, ստորագրել է ԳՇ պետ Օնիկ Գասպարյանին պաշտոնից հեռացնելու փաստաթուղթը, որը, սակայն, դեռ չի ստորագրել նախագահ Արմեն Սարգսյանը։
