ԵՐԵՎԱՆ, 31 հունվարի - Sputnik. Երևան քաղաքի ընդհանուր իրավասության դատարանի որոշմամբ երեկ ուշ երեկոյան ազատ են արձակվել ևս երկու գործիչներ, որոնք մեղադրվում էին ՀՀ կառավարության շենքը զավթելու փորձի մեջ: Ինչպես հայտնել է իրավապաշտպան Ռուբեն Մելիքյանը, դատարանը մերժել է ԱԺ նախկին պատգամավոր Արագած Ախոյանի և ազատամարտիկ, ռեժիսոր Արշակ Զաքարյանի կալանավորման միջնորդությունները:
«Իսրայել Հակոբկոխյանը դեռ ազատ արձակված չէ։ Հունվարի 31-ին՝ ժամը 16։00-ին կհրապարկվի նրա գործով որոշումը», - ասել է Մելիքյանը»։
Հիշեցնենք` դեկտեմբերի 28-ին մի քանի հարյուր քաղաքացիներ Հանրապետության հրապարակում բողոքի ակցիա էին իրականացնում` պահանջելով ՀՀ վարչապետ Նիկոլ Փաշինյանի հրաժարականը։
Հետո կառավարության շենքի դիմաց բախումներ սկսվեցին շենքը պահպանող ոստիկանության աշխատակիցների ու քաղաքացիների միջև, երբ մի խումբ քաղաքացիներ փորձեցին մուտք գործել կառավարության շենք։
Դեպքի վայրից բերման ենթարկվեցին շուրջ 3 տասնյակ քաղաքացիներ, որոնք հետագայում ազատ արձակվեցին։
Իսկ հաջորդ օրը` հունվարի 29-ին, հայտնի դարձավ, որ Քննչական կոմիտեում քրեական գործ էր հարուցվել «մի խումբ անձանց կողմից նախնական համաձայնությամբ շենքեր, շինություններ զավթելու փորձ» հոդվածով:
Քրեական գործի շրջանակներում ձերբակալվեցին հայտնի բռնցքամարտիկ, աշխարհի եւ Եվրոպայի չեմպիոն Իսրայել Հակոբկոխյանին, ԱԺ նախկին պատգամավոր, «Վերադարձ» հիմնադրամի նախագահ Արագած Ախոյանին, «Հայոց ազգային գվարդիա» ՀԿ ղեկավար Արշակ Զաքարյանին, ՊՆ պահեստազորի փոխգնդապետ Տիգրան Չոբանյանին, «Կամք» հասարակական կազմակերպության հիմնադիր Վահագն Չախալյանին:
«Ժողովրդի իրավունքն է ապստամբել այս իշխանության դեմ». Երևանում կրկին հանրահավաք է
Նրանց շահերը պաշտպանելու համար ստեղծվել է փաստաբանական խումբ՝ փաստաբաններ Բենիկ Գալստյանի, Օնիկ Առաքելյանի, Կարինե Խաչատրյանի, Անժելիկա Հակոբյանի մասնակցությամբ։
Նշենք, որ նախապես բերման ենթարկվածների մեջ էր նաև ՍԴ աշխատակազմի նախկին ղեկավար Էդգար Ղազարյանը, որն ազատ է արձակվել երեկ:
