ԵՐԵՎԱՆ, 22 հունվարի – Sputnik. Արցախյան պատերազմի մասնակիցները բողոքի ակցիա են իրականացնում ՀՀ պաշտպանության նախարարության դիմաց։ Նրանք պահանջում են, որ իրենց հասանելիք գումարը պետությունը վճարի։
Կամավոր պատերազմ մեկնած Դավիթ Հովհաննիսյանը լրագրողների հետ զրույցում նշեց, որ իրենք ի սկզբանե չեն իմացել, որ պետք է գումար ստանան, բայց քանի որ պետությունն օրենքով սահմանված նման նախաձեռնություն է իրականացնում, ուստի իրենք էլ իրենց հասանելիք գումարն են ուզում։
«Մենք առաջնագծից վերադարձել ենք նոյեմբերի 30-ին, վերջին անգամ եղել ենք Լաչինում՝ Դժոխքի ձոր կոչվող վայրում։ Մինչ օրս տարբեր մարմինների դիմել ենք, ընդհուպ կառավարությանը` դրամական փոխհատուցում ստանալու համար։ Մեր խնդրին ոչ մեկը հստակ լուծում չի տվել։ Մարդ կար` ասում էր` մեկ-երկու օրից ձեր հարցը լուծում կստանա»,–ասում է կամավորը։
Կամավորներին զինաթափել են... ինչ էր կատարվում Քարվաճառում նոյեմբերի 9–ից հետո
Նրա խոսքով` դեկտեմբերի 30-ին դիմել են կառավարությանը, իսկ դրանից երկու օր առաջ պաշտպանության նախարարություն են գնացել։
«Մեզ ընդունեց գնդապետ Արա Առաքելյանը, ինքը մեզ ասաց, որ մաքսիմում դեկտեմբերի 30-ին մեր գումարները կփոխհատուցվեն, բայց դեկտեմբերի 30-ին գումարները մեր քարտերին չնստեց։ Ես կրկին կապվեցի Առաքելյանի հետ, վերջինս ասաց, որ տեղյակ է խնդրին և զեկուցել է։ Նա պատճառաբանեց, որ խնդիրը կապված է փաստաթղթերի հետ։ Երբ ասացի` բա ո՞ւմ բողոքենք, ասաց` Հայաստանիդ վարչապետին»,–ասաց կամավորը։
Դավիթ Հովհաննիսյանը դիմել է վարչապետի օգնական Նաիրի Սարգսյանին, սակայն վերջինս նշել է, որ արձակուրդային օրերի հետ կապված` հարցը լուծել չի ստացվի, պետք է սպասել աշխատանքային օրերի մեկնարկին։ Սակայն մինչ օրս Դավիթին չի հաջողվել պատասխան ստանալ։
Դավիթ Հովհաննիսյանը հանդիպել է նաև գեներալ-մայոր Վարդան Ավետիսյանի հետ, որն ասել է, որ համապատասխան հանձնաժողովն այդ հարցով զբաղվում է և առաջիկա օրերին հարցը կլուծվի, սակայն գումար կրկին չեն ստացել։
Հավաքվածները ստույգ պատասխան են ուզում, թե երբ են գումար ստանալու և ինչու մինչ օրս չեն ստացել։
Վերևներից ասել են՝ ադրբեջանցիների հետ ինքներդ բանակցենք. շրջափակումից դուրս եկած կամավոր
