ԵՐԵՎԱՆ, 20 հունվարի – Sputnik. Օրերս ՀՀ պաշտպանության նախարարության դարպասները մեքենայով վնասած Գուրգեն Վարդանյանի անհետ կորած որդու` Գոռի դին գտնվելն է։ Sputnik Արմենիայի հետ զրույցում տեղեկությունը հայտնեց Վարդանյանի փաստաբանը՝ Կարեն Ստեփանյանը։
Պաշտպանության նախարարությունը հայտնել էր, որ Գուրգեն Վարդանյանին ձերբակալել են։ Օրեր անց նրան ազատ արձակեցին, բայց մեղադրանք առաջադրվեց ՀՀ քրեական օրենսգրքի 258-րդ հոդվածի (խուլիգանություն) 4-րդ մասով և 327.6-րդ հոդվածի (զորամաս կամ հատուկ պահպանվող զինվորական այլ տարածք ապօրինի մուտք գործելը) 5-րդ մասով:
«Գոռ Վարդանյանի ծնողները դեկտեմբերին ԴՆԹ թեստ էին հանձնել և հունվարի 15-ին փորձաքննության պատասխանի հիման վրա էլ գտել են տղային։ Գոռին արդեն հուղարկավորել են»,–ասաց պաշտպանը։
Նա հայտնեց նաև, որ ընտանիքը ծանր հոգեբանական վիճակում է։ Իսկ ինչ վերաբերվում է հարուցված քրգործին, Ստեփանյանը նշեց, որ Գուրգեն Վարդանյանին մեղադրանք առաջադրելուց հետո դեռ որևէ գործողություն չի արվել։
Պաշտպանն ասաց, որ Գուրգեն Վարդանյանը մեքենան ՊՆ դարպասների վրա քշելով որևէ նախնական նպատակ չի ունեցել. նա պահի ազդեցության տակ, հոգեբանական ծանր վիճակում է նման քայլի դիմել։ Վարդանյանն ինքը բացատրություն չի կարողանում տալ իր արարքի համար։
«Էդ երեխաներին բերել են Հայաստան, ու հիմա նրանք ոչ մի տեղ չկան». անհետ կորածների ծնողներ
Նշենք, որ արցախյան վերջին պատերազմի ընթացքում անհետ կորած զինծառայողների հարազատները պարբերաբար բողոքի ակցիաներ են իրականացնում կառավարության և պաշտպանության նախարարության դիմաց։ Նրանց մի քանի անգամ ընդունել է ՀՀ վարչապետ Նիկոլ Փաշինյանը, բայց նրանց խնդրին այդպես էլ լուծում չի տրվել։
