ԵՐԵՎԱՆ, 19 հունվարի – Sputnik. Հայաստանի պաշտպանության նախարար Վաղարշակ Հարությունյանն ընդունել է Երկրապահ կամավորականների միության վարչության պատվիրակությանը՝ ԵԿՄ վարչության նախագահ Սասուն Միքայելյանի գլխավորությամբ։ Այս մասին տեղեկացնում է ՊՆ կայքը։
Հանդիպման ընթացքում քննարկվել են ազատամարտիկներին միավորող հասարակական կազմակերպության հետ պաշտպանական գերատեսչության առաջիկա ծրագրերին ու փոխգործակցությանը, բանակ-հասարակություն կապերի զարգացմանը վերաբերող մի շարք հարցեր:
ՀՀ պաշտպանության նախարարը վստահություն է հայտնել, որ երկրապահները այսուհետ ևս կշարունակեն իրենց նշանակալի ավանդն ունենալ հայրենիքի պաշտպանությանն առնչվող, ինչպես նաև երիտասարդության հայրենասիրական դաստիարակության գործում:
Հիշեցնենք, որ Սասուն Միքայելյանը Արցախում ոտքերի ու մեջքի հատվածում բեկորային վիրավորումներ է ստացել հոկտեմբերի 19–ին։ Նրան վիրահատել են ՀՀ ՊՆ կենտրոնական կլինիկական զինվորական հոսպիտալում («Մուրացան» հոսպիտալ)։
