ԵՐԵՎԱՆ, 19 դեկտեմբերի - Sputnik. Գերիների վերադարձի ու անհետ կորածների գտնվելու հարցը դեռ ամբողջությամբ լուծված չէ։ Այսօր իր տեսաուղերձում այս մասին ասաց ՀՀ վարչապետ Նիկոլ Փաշինյանը` անդրադառնալով գերիների փոխանակման գործընթացին։
«Ցավոք, Խծաբերդում ունեցել ենք գերեվարվածներ, որը պիտի անհամատեղելի լիներ ռազմական գործողությունների դադարի տրամաբանության հետ»,– ասաց նա։
Հիշեցնենք` դեկտեմբերի 13-ից ադրբեջանցիները կանգնել էին Մեծ Շենից Հին Շեն գյուղ տանող միակ ճանապարհին՝ հայտարարելով, որ այդտեղ կանգնելու հրաման ունեն։ Երկու գյուղերն էլ գտնվում են Արցախի հսկողության տակ։ Այդ ընթացքում Արցախի զինված ուժերը տեղում լրացուցիչ ուժեր էին կուտակել` իրավիճակը վերահսկողության տակ պահելու համար։
Ավելի ուշ հայտնի դարձավ, որ հաջողվել է ճանապարհից հեռացնել ադրբեջանական հենակետը և ապաշրջափակել Հին Շենը։
Բայց այդ, գործողությունների արդյունքում Շիրակի մարզի 58 կամավորականներ ու ՄՈԲ֊ի 12 տղաներ հայտնվել էին շրջափակման մեջ։ Երեկ երեկոյան լուր ստացվեց, որ նրանք անվտանգ դուրս են եկել շրջափակումից, իջել դիրքերից ու արդեն վերադառնում են տուն։
Դեկտեմբերի 16-ին Արցախի Հանրապետության պաշտպանության բանակի մամուլի ծառայությունը հայտնեց նաև, որ դեռևս անհայտ պայմաններում կորել է կապը Հադրութի Հին Թաղեր և Խծաբերդ գյուղերի ուղղությամբ տեղակայված մի քանի մարտական դիրքերի անձնակազմի հետ։ Այնուհետև լուրեր տարածվեցին, որ անհետ կորել էր շուրջ 60 զինծառայողից բաղկացած մի ստորաբաժանում։ Հետո հայտարարվեց, որ նրանք գերի են ընկել։ Ադրբեջանական կողմը հայտարարում էր 100 և ավելի գերեվարվածի մասին։
Կարմիր Խաչը կասկածում է գերիների փոխանակման` «բոլորը բոլորի դիմաց» սկզբունքի պահպանմանը
Նշենք, որ դեկտեմբերի 14-ին գերիների փոխանակման առաջին ու առայժմ միակ փուլի ընթացքում Հայաստան էր վերադարձել 44 գերեվարված։
Եվս մեկ գերի վերադարձվեց դեկտեմբերի 15-ին։
Հայկական կողմն Ադրբեջանին է փոխանցել 12 անձի, որոնց թվում` Արցախում սպանության ու դիվերսիայի համար դատապարտված 2 հանցագործների։
73 հայ զինծառայողների գերեվարման մասին լուրերը հաստատված չեն․ Արտակ Բեգլարյան
