ԵՐԵՎԱՆ, 9 դեկտեմբերի - Sputnik. Հայաստանն ու Ադրբեջանը ներկայացրել են գերիների իրենց ցանկերը։ Այսօր Աժ–ում տեղեկությունը հայտնեց ՀՀ փոխվարչապետ Տիգրան Ավինյանը` հավելելով, որ ներկա փուլում այդ ցանկերը ճշտվում են։
«Վերջնական ցանկերը հաստատելուց հետո տեղի կունենա գերիների փոխանակում, և մենք փորձում ենք այդ պրոցեսն իրականացնել հնարավորինս սեղմ ժամկետներում»,– ասաց Ավինյանը։
Նրա խոսքով` երկու կողմերը վերահաստատել են «բոլորը բոլորի դիմաց» սկզբունքը։ Հայաստանն առաջարկվել է ամրագրել նաև հետագայում գերիների հայտնաբերման դեպքում առանց որևէ նախապայմանի ու միակողմանի վերադարձի մեխանիզմը։
Հարությունյանը Մուրադովի հետ հանդիպել է անհետ կորածների և գերեվարվածների հարազատներին
Ինչ վերաբերում է անհետ կորածների հայտնաբերմանն ու զոհերի մարմինների փոխանակման պայմանավորվածությանը, Ավինյանը հայտնեց, որ նոյեմբերի 10-ից ի վեր ռազմադաշտից դուրս է բերվել 846 մարմին։ Հիմնական խնդիրը, նրա խոսքով, այս պահին զոհերի դիակների ԴՆԹ հետազոտությունների անցկացումն է։
«Այս պահի դրությամբ անճանաչելի մարմիններից 244 մարմնի նույնականացում ենք ունեցել։ Մարմինները հանձնվել են ծնողներին։ 154 մարմնի հետազոտություններն արված են, ու համընկնումներ անհետ կորածների հարազատների ԴՆԹ–ի հետ տեղի չի ունեցել։ 443 նմուշ էլ դեռ հետազոտման փուլում են»,– ասաց Ավինյանը։
Փոխվարչապետը հայտնեց, որ ամբողջ խնդիրը սարքավորումների ծանրաբեռնվածությունն է, որոնք 24-ժամյա ռեժիմով աշխատում են։
Տեմպերն արագացնելու համար Հայաստանի կառավարությունը դիտարկում է նաև արտասահմանյան ու ՀՀ մասնավոր լաբորատորիաները ներգրավելու տարբերակը։
Առողջապահության նախարարությունն էլ արդեն հավելյալ սարքավորումներ է գնել, որոնք այժմ ներկրվում են` գործընթացն արագացնելու նպատակով։
«Աղաչում եմ, չլացես, մամ. հերոս կմնամ». անհետ կորած զինվորի վերջին նամակը
