Երևանի պետական համալսարան

ԵՊՀ դեկանները պահանջում են անհապաղ հետ կանչել վիճահարույց օրենքի նախագիծը

148
(Թարմացված է 16:16 04.12.2020)
Այս օրենքով խախտվում են ուսանողների, դասախոսների, գիտության ոլորտի աշխատակիցների իրավունքներն ու օրինական շահերը

ԵՐԵՎԱՆ, 4 դեկտեմբերի - Sputnik. Երևանի պետական համալսարանի դեկաններն ու ստորաբաժանումների ղեկավարները պահանջում են Ազգային ժողովից հետ կանչել վիճահարույց օրենքի նախագիծը։ ԵՊՀ մամուլի ծառայությունը տեղեկացնում է, որ խոսքը վերաբերում է «Բարձրագույն կրթության և գիտության մասին» ՀՀ օրենքի նախագծին, որը որպես անհետաձգելի և չզեկուցվող հարց՝ ընդգրկվել էր կառավարության դեկտեմբերի 3-ի նիստի օրակարգում, հավանության արժանացել, ապա ուղարկվել ՀՀ Ազգային ժողով՝ հրատապության կարգով քննարկելու և ընդունելու առաջարկությամբ:

ԵՊՀ-ից ուշադրություն են հրավիրում ևս մի հանգամանքի վրա նշելով, որ օրենքի նախագիծն «անհիմն ու անբացատրելի մոտեցմամբ» է ընդգրկվել կառավարության անհետաձգելի հարցերի շարքում։ Սա այն դեպքում, երբ եռակողմ` «Հայաստանի Հանրապետության համար խիստ անբարենպաստ հայտարարությունից հետո մեր երկրի առջև ծառացան անհապաղ լուծման ենթակա մի շարք հիմնախնդիրներ, ինչպիսիք են՝ հումանիտար աղետ, տասնյակ հազարավոր տեղահանվածներ, հարյուրավոր գերիներ և անհայտ կորածներ, ինչպես նաև սահմանների հետ կապված բազմաթիվ հարցեր»։

Պետական համալսարանը մանրամասնում է, թե այս պայմաններում ինչպիսի օրենքի նախագիծ է կառավարության սեղանին դրվել։

ԳԱԱ–ն պահանջում է Փաշինյանի հրաժարականը

«Խոսքը մի նախագծի մասին է, որը քննարկվել է ԵՊՀ գիտական խորհրդում ու տարբեր ստորաբաժանումներում և արժանացել բազմաթիվ էական դիտողությունների՝ հաշվի առնելով այն հանգամանքը, որ այն, հիմքում չունենալով ՀՀ-ում բարձրագույն կրթության և գիտության զարգացման հստակ հայեցակարգ, իր կարգավորումներով վտանգի տակ էր դնում բուհական ինքնավարությունը, ակադեմիական ազատությունը, հայագիտական առարկաների և հետազոտությունների գերակայությունը, գիտության կառավարումը, ՀՀ գիտությունների ազգային ակադեմիայի կարգավիճակն ու գոյությունն ընդհանրապես և բազմաթիվ այլ հարցեր»,- նշված է ԵՊՀ տարածած հաղորդագրության մեջ։

ԵՊՀ-ում վրդովված են, որովհետև իրենց մատնանշած դիտողություններից ոչ մեկը ոչ միայն հաշվի չի առնվել, այլև «վերջին պահին օրենքի նախագծում տեղ է գտել առավել վիճահարույց դրույթ՝ բուհերի կառավարիչների՝ ԿԳՄՍ նախարարի կողմից 5 տարուց ոչ ավել ժամկետով նշանակվելու վերաբերյալ»։

Ընդ որում՝ կառավարչի համար չի նախատեսվում բուհի ռեկտորի համար սահմանված ոչ մի պահանջ։

«Դա իսպառ ոչնչացնում է ՀՀ Սահմանադրությամբ և տարբեր օրենքներով նախատեսված բուհական ինքնավարությունն ու ակադեմիական ազատությունները` դրանով իսկ խախտելով կրթության և գիտության հիմնական շահառուների` ուսանողների, պրոֆեսորադասախոսական անձնակազմի և գիտության ոլորտի աշխատակիցների իրավունքներն ու օրինական շահերը»,- պնդում են ԵՊՀ-ում։

Ուստի Երևանի պետական համալսարանի դեկաններն ու տարբեր ստորաբաժանումների պատասխանատուները պահանջում են հանրապետության գիտական և կրթական հանրության հետ միասին ձեռնարկել անհրաժեշտ միջոցներ՝ բարձրագույն կրթության և գիտության զարգացմանը նպաստող օրենքի նախագիծ պատրաստելու համար։

ԵՊՀ-ում նախազգուշացնում են՝ եթե օրենքի նախագիծը հետ չկանչվի, բարձրագույն կրթությանն ու գիտության զարգացմանը նպաստող նախագիծ չմշակվի, ապա իրենց իրավունք են վերապահում իրականացնելու Սահմանադրությամբ և օրենքներով չարգելված բոլոր գործողությունները նշված օրենքի ընդունումը և կիրարկումը կանխելու համար։

148
թեգերը:
բողոք, Երևանի պետական համալսարան (ԵՊՀ), բուհ, նախագիծ
Ըստ թեմայի
Արցախում բարձրագույն կրթությունն անվճար կդառնա
ԱԺ արտահերթ նիստ կգումարվի. օրակարգում ռազմական դրությունը վերացնելու նախագիծն է
«Նոյեմբերի 10-ը պիտի հայրենադավության օր հռչակվի». Նաիրա Զոհրաբյանը նոր նախագիծ է մշակում
Արխիվային լուսանկար

Կառավարությունը մասամբ կփոխհատուցի մարտական գործողությունների մասնակիցների ուսման վարձը

4
(Թարմացված է 14:34 30.07.2021)
Արտոնությունը կտարածվի նաև երկու կամ ավելի անչափահաս երեխաների ծնողների վրա, որոնք սովորում են բուհերում կամ միջին մասնագիտական ուսումնական հաստատություններում:

ԵՐԵՎԱՆ, 30 հուլիսի – Sputnik. Կառավարությունը մասամբ կփոխհատուցի մարտական գործողությունների մասնակիցների ուսման վարձը: ԱԺ արտահերթ նիստի ժամանակ այս մասին ասաց կրթության, գիտության, մշակույթի և սպորտի փոխնախարար Կարեն Թռչունյանը:

Օրինագծով առաջարկվում է մասնակիորեն կամ ամբողջությամբ փոխհատուցել մարտական գործողությունների մասնակիցների, ինչպես նաև երկու և ավելի անչափահաս երեխա ունեցող ուսանողների ուսման վարձը: Նրանց համար կներդրվեն նաև առաջադիմության առանձին ցուցանիշներ։

«Նախագծի ընդունման դեպքում ենթադրվում է, որ այս տարի որոշակի առաջադիմության դեպքում մասնակի փոխհատուցում կստանան բուհերի և միջին մասնագիտական ուսումնական հաստատությունների մոտ 4 հազար ուսանողներ», - ասաց Թռչունյանը:

2022 թվականին նման ուսանողների թիվը կկազմի 6800, 2023–ին ՝ 6000, 2024–ին ՝ 4600։

Այժմ նման արտոնություններից օգտվում են բարձր առաջադիմություն ունեցող ուսանողները, սոցիալապես անապահով խավերի ներկայացուցիչները, սահմանամերձ համայնքների ուսանողները։

Պատգամավոր Մխիթար Հայրապետյանը նշեց, որ համապատասխան փոփոխությունները նախատեսված են նաև «Բարձրագույն և հետբուհական մասնագիտական կրթության մասին» օրինագծում, որն այժմ քննարկվում է Սահմանադրական դատարանում, և անհասկանալի է, թե ինչու կառավարությունը չի սպասում քննարկման արդյունքներին, որոնք պետք է հայտնի դառնան օրերս։

Փոխնախարարը նշեց, որ քննարկումը կարող է ձգձգվել, ուստի մինչև սեպտեմբեր պետք է համապատասխան կարգավորումներ ունենալ։

Օրինագիծն ընդունվեց առաջին ընթերցմամբ։

4
Շտապօգնության մեքենա. արխիվային լուսանկար

ՀՀ օմբուդսմանի գրասենյակի մոտ տղամարդ է ինքնահրկիզվել

45
(Թարմացված է 14:16 30.07.2021)
Փաստի առթիվ ոստիկանության կենտրոնական բաժնի հետաքննական բաժանմունքում նյութեր են նախապատրաստվում։

ԵՐԵՎԱՆ, 30 հուլիսի - Sputnik. Այսօր` հուլիսի 30-ին, արտակարգ դեպք է տեղի ունեցել Երևանում։ ՄԻՊ գրասենյակի մոտ տղամարդ է ինքնահրկիզվել։ Տեղեկությունը հայտնում է shamshyan.com–ը։

«Ժամը 12։30-ի սահմաններում Երևանի 1-03 շտապօգնության բժիշկների հերթապահ խումբը ՀՀ մարդու իրավունքների պաշտպանի գրասենյակի դիմացից տարբեր աստիճանի այրվածքներով Այրվածքաբանության կենտրոն է տեղափոխել մի քաղաքացու»,–գրում է կայքը։

Թե ինչն է եղել ինքնահրկիզվելու պատճառը, դեռևս հայտնի չէ։

Փաստի առթիվ ոստիկանության կենտրոնական բաժնի հետաքննական բաժանմունքում նյութեր են նախապատրաստվում։

Ոստիկանությունը պարզում է քաղաքացու ինքնությունը։

Մասիսում 63–ամյա քաղաքացին փորձել է ինքնահրկիզվել. փրկարարները կանխել են

45
թեգերը:
Հայաստան, ՀՀ ՄԻՊ, ինքնահրկիզում, տղամարդ
Ըստ թեմայի
Երևանում տղամարդն իր 3 մանկահասակ երեխաների աչքի առաջ փորձել է ինքնահրկիզվել. տեսանյութ
Մանրամասներ դատավորների գործից. տուժած քաղաքացին փորձել էր ինքնահրկիզվել
Տրանսգենդերն ինքնահրկիզման փորձ է արել Թբիլիսիի քաղաքապետարանի դիմաց. տեսանյութ