ԵՐԵՎԱՆ, 4 դեկտեմբերի - Sputnik. Դեկտեմբերի 5-ին և 6-ին՝ ժամը 07:00-14:00-ը, Մյասնիկյան պողոտայի մի հատվածը միակողմանի երթևեկելի չի լինի։ Տեղեկությունը հայտնում է «Կանաչապատում և շրջակա միջավայրի պահպանություն» ՀՈԱԿ-ի մամուլի ծառայությունը Facebook-ի պաշտոնական էջում։
«Մյասնիկյան պողոտայի՝ «Բելաջիո» ռեստորանային համալիրից կենդանաբանական այգի ընկած միակողմանի հատվածում, երթևեկությունը ժամանակավորապես կդադարեցվի»,- նշված է հաղորդագրության մեջ։
Պատճառն այն է, որ Կենտրոն և Նորք Մարաշ վարչական շրջանի ստորաբաժանման աշխատակիցները այդ հատվածում իրականացնելու են ծառերի սանիտարական էտման աշխատանքներ։
«Կանաչապատում և շրջակա միջավայրի պահպանություն» ՀՈԱԿ-ը հայցում է վարորդների ներողամտությունը պատճառվող ժամանակավոր անհարմարության համար։
