ԵՐԵՎԱՆ, 3 դեկտեմբերի – Sputnik. Արցախյան պատերազմին մասնակցած ուանողներն ու մասնակիցների ուսանող երեխաները կազատվեն 2020թ-ի 2-րդ կիսամյակի ուսման վարձից: Այս մասին այսօր կառավարության նիստում հայտարարեց ՀՀ վարչապետ Նիկոլ Փաշինյանը՝ նշելով, որ որոշում, ամենայն հավանականությամբ, կկայացվի կառավարության հաջորդ նիստում:
«Ես հույս ունեմ, որ կառավարության արդեն հաջորդ նիստում դե յուրե մենք այդ որոշումը կընդունենք»,- ասաց Փաշինյանը:
Իսկ մինչ որոշման ընդունումը վարչապետը ԿԳՄՍ նախարարին հրահանգեց ամեն ինչ անել, որ այդ կատեգորիայի ուսանողները ուսման վարձերի հետ կապված որևէ խնդիր չունենան:
Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։ Նոյեմբերի 9-ին ՀՀ վարչապետ Նիկոլ Փաշինյանի, ՌԴ նախագահ Վլադիմիր Պուտինի ու Ադրբեջանի նախագահ Իլհամ Ալիևի միջև ստորագրված հայտարարության համաձայն` ռազմական գործողությունները դադարեցվեցին։
Համացանցում լուր տարածվեց, որ հայկական կողմն ունի 4750 զոհ ու անհետ կորած։ ՀՀ առողջապահության նախարար Արսեն Թորոսյանը նոյեմբերի 18-ին ԱԺ–ում լրագրողներին հայտնեց, որ պատերազմի առաջին օրվանից մինչև նոյեմբերի 17-ի երեկոյան պաշտոնապես հաստատված զոհված զինծառայողների թիվը 2425 է։
Դեկտեմբերի 2-ի տվյալներով՝ Արցախի ՊԲ-ն հրապարակել է 1746 զոհվածների անունները։
Վերջին տվյալներով` քաղաքացիական անձանց շրջանում կա 50 զոհ ու 148 վիրավոր։
Ինչո՞ւ են ադրբեջանցիներն ուրախացել․ ռուսական խաղաղապահների հրամանատարի կենսագրությունը
