Նարեկ Մեսրոպյանը կնոջ` Աննայի հետ

«Գնում եմ Արցախ, որ հետո տղաս չգնա». բժիշկ Նարեկն Ապրիլյանից վերադարձավ, հիմա չստացվեց

2753
(Թարմացված է 18:41 29.11.2020)
31-ամյա Նարեկ Մեսրոպյանի համար պատերազմը նոր երևույթ չէր. նա Ապրիլյան պատերազմին Թալիշում է եղել, հարյուրավոր կյանքեր փրկել։ Արցախցի բժիշկն այս անգամ էլ մինչև զոհվելը շատերին է օգնություն ցուցաբերել...

Պատերազմի ժամանակ զոհված ռազմական բժիշկ Նարեկ Մեսրոպյանենց տանն ենք։ Տանը Նարեկի կինը` Աննան, և քույրը` Դիանան են։ Ինչքան էլ պատրաստվել եմ հարցազրույցին, մեկ է` զրույցը սկսելն ամենադժվարն է։ Ծաղկի անուշ հոտ եմ զգում ու նկատում` հյուրասենյակում, որտեղ նստած ենք, բժշկի հիշատակի անկյունն է. 31–ամյա տղայի նկարն է սև շրջանակի մեջ` առջևում հայկական եռագույնը, կան նաև մանկության և ընտանեկան նկարներ, ալբոմներ, մեդալներ ու անգամ դեռ դպրոցական տարիներին ստացած «Լավագույն փրկարար» պատվոգիրը։ Սեղանին դեղին վարդերի փունջ կա. անուշ բուրում է...

Уголок с фотографиями Нарека Месропяна
© Sputnik
Նարեկի անկյունը...

–Իսկ երեխաները տանը չե՞ն,–հարցնում եմ` մի բան ասած լինելու համար։

–Տղաս քոլեջում է, փոքրս էլ` աղջիկս, քնած է,–ժպիտով պատասխանում է Նարեկի կինը։

Ժպիտից ոգևորվում եմ, հավաքում ինձ ու անցնում զրույցին։

Պատերազմական օրերին մասնագիտական պարտքը կատարելիս 15 բժիշկ է զոհվել

Պատերազմը սկսվելուց մի քանի օր անց «Միքայելյան» համալսարանական հիվանդանոցում փնտրում էին Նարեկ Մեսրոպյանին` Արցախ ուղեգրելու համար, այնինչ նա արդեն հասցրել էր շատ զինվորների կյանքեր փրկել։ Աննան պատմում է` Նարեկը հենց սեպտեմբերի 27-ին էր Արցախ մեկնել։

«Երբ իմացավ, որ պատերազմ է, տեղը չէր գտնում` զանգում էր սրան–նրան, որ իրեն կանչեն։ Համազգեստն արդուկել տվեց, ասաց` գնանք տան համար առևտուր անենք։ Չնայած իր համար գնալու հրաման չեկավ, բայց ընկերներին դիմեց, մեքենա գտավ և մեկնեց Արցախ։ Արդեն Գորիս էր հասել, զանգեցի ու խնդրեցի, որ վերադառնա, բայց ասաց` ես հիմա գնում եմ, որ տղաս` Տիգրանը, վաղը չգնա»,–պատմեց Աննան։

Արցախ գնալու մասին Նարեկի ղեկավարությունից ոչ ոք չի իմացել։ Օրեր անց միայն հրաման է եկել, որ նա պետք է մեկնի։ Այցելել են նրա աշխատավայր` «Միքայելյան» համալսարանական հիվանդանոց, ասել` չեն գտնում Նարեկին։ Հիվանդանոցից, բնականաբար, տեղեկացրել են, որ Նարեկն առաջին իսկ օրն է Արցախ մեկնել։ 

Ընտանիքին Նարեկը խաբել էր` ասելով, որ Ստեփանակերտի հոսպիտալում է։ Միայն զոհվելուց հետո են իմացել, որ Խոջալուի հրետանային գնդի բուժծառայության պետն է եղել։ Նարեկի կինն ասում է, որ նույն իրավիճակն էր նաև Ապրիլյան պատերազմի օրերին, երբ ամուսինը Թալիշում է եղել, սակայն ընտանիքին ասել է, թե հանգիստ նստած են ապահով մի տեղ, ուր վիրավոր էլ չկա։ Ի դեպ, Ապրիլյան պատերազմի ժամանակ Նարեկն «Արիության մեդալ» է ստացել, աշխատել հայտնի հրամանատար Կարեն Ջալավյանի` Քյոխի հրամանատարության ներքո։

Нарек Месропян с семьей
© Photo : provided by Anna Simonyan
նարեկ Մեսրոպյանն ընտանիքի հետ

«Քյոխն ասում էր` 100-ից ավել զինծառայողի կյանք է փրկել Նարեկն Ապրիլյանի ժամանակ։ Ավելին, զոհվածների մեծ մասին հենց ինքն է դուրս բերել մարտադաշտից։ Այդ ժամանակ էլ մազից են փրկվել. շտապօգնության մեքենան վերջում շարքից դուրս է եկել` բենզինի բաքի չորս կողմում ԱԹՍ–ի թողած անցքերն էին, բայց բաքին ոչինչ չէր եղել»,–ասում է Աննան ու աչքերը թրջվում են. այս անգամ Նարեկի բախտը չի բերել։

Нарек Месропян с супругой Анной Симонян
© Photo : provided by Anna Simonyan
Նարեկն ու Աննան

Զրույցը շարունակում է Նարեկի քույրը` Դիանան, պատմելով, որ Նարեկն այս անգամ կարծես զգացել էր, որ իր հետ ինչ–որ բան է պատահելու։ Հոկտեմբերի 11-ին վիրավորներին օգնության հասնելու հերթական կանչն են ստացել։ Կանչին ընկերն է փորձել գնալ, սակայն Նարեկը մեքենայից իջեցնել է տվել նրան` ասելով, որ ինքը պիտի գնա։

Տասնմեկ բժիշկներ պարգևատրվել են «Արիության համար» և «Մարտական զինծառայության» մեդալներով

Պատմում են, որ նա կանչի գնալիս միշտ իրերը` բանալիներ, դրամապանակ, հեռախոս, հետը տանելիս է եղել։ Այդ օրն առաջին անգամ բուժկետի սեղանին է թողել ամեն ինչ։

Нарек Месропян с семьей
© Photo : provided by Anna Simonyan
Նարեկն ու Աննան երեխաների հետ

Կեսգիշերն անց վիրավորներին վերցրել ու ճանապարհվել են հոսպիտալ։ Հակառակորդը սկսել է «Գրադով» հարվածներ է հասցնել ճանապարհին։ Մեքենայի լույսերն անջատել են, որ թշնամու թիրախում չհայտնվեն։ Գնդակոծության տակ հոսպիտալ շտապող մեքենային դեմ հանդիման ավտոբուս է դուրս եկել։ Փորձել են խուսափել բախումից, բայց շտապօգնության մեքենան շրջվել է, ու Նարեկը լուրջ վնասվածքներ է ստացել։ Միայն ինքը։ Տղային նախ Ստեփանակերտի հիվանդանոց են տարել, հետո ուղղաթիռով Երևան` Էրեբունի ԲԿ տեղափոխել, որտեղ էլ վիրահատել են։

Վիրահատությունից հետո նրան տեսակցելու է գնացել կինը` Աննան։

–Պատերազմը վերջացա՞վ,–հարցրել է կնոջը։

–Այո, հաղթել ենք,–պատասխանել է նա, քանի որ ուզել է մի փոքր ուրախացնել ամուսնուն...

Նարեկը չի թողել, որ մայրն իրեն այցելի` ասելով, թե մի փոքր կլավանա, նոր, իսկ գնդապետ հայրն այդ ժամանակ Գլխավոր շտաբում է եղել։

Ծնողները Նարեկին այդպես էլ չեն տեսել...

Нарек Месропян в детстве
© Photo : provided by Anna Simonyan
Նարեկը մանկության տարիներին

«Նարեկը միշտ բոլորիս կողքին էր։ Մեր փրկիչն էր։ Ինչ լինում էր, ինքն էր օգնության հասնում։ Նույնիսկ հիմա, երբ մայրս գիշերներն իրեն լավ չի զգում, երբեմն ինձ բռնացնում եմ այն մտքի վրա, որ ուզում եմ գնալ Նարեկենց սենյակի դուռը թակել ու նրան օգնության կանչել»,–ասում է քույրը...

Ծանր պատմությունից հետո մեր լռությունը ցրում է Նարեկի 11 ամսական աղջիկը` Սառան, որն արթնացել ու հասկացնում էր` եկեք, խաղալ եմ ուզում։ Նայում էր շուրջբոլորն ու լայն ժպտում։ Պարզ է` փոքր է, դեռ չի հասկանում կատարվածը, իսկ 5-ամյա Տիգրանը հասկացել է ամեն ինչ։ Մոր պատմածը լսել է ու ասել.

–Մամ, ես գիտեմ, որ պապան էլ հետ չի գալու, բայց երբ հարցնում եմ` ասա կգա, որ ես չլացեմ...

Нарек Месропян с семьей
© Photo : provided by Anna Simonyan
Նարեկն ու Աննան որդու` Տիգրանի հետ

Ի դեպ, թե՛ Նարեկը, թե՛ Աննան Ստեփանակերտից են։ Ժամանակավոր տեղափոխվել էին Երևան, որ Նարեկն ավարտեր օրդինատուրան (դիմածնոտային վիրաբույժ էր)։

Նարեկն Արցախը շատ էր սիրում և Երևանում մնալու ցանկություն չի ունեցել։ Սակայն հիմա, երբ նա Եռաբլուրում է, ընտանիքը որոշել է այստեղ մնալ...

ԱՀԿ-ն կոչ է արել Ղարաբաղյան հակամարտության գոտում պաշտպանել բժիշկներին

2753
թեգերը:
Նարեկ Մեսրոպյան, Արցախյան պատերազմ, Զոհ, բժիշկ
Ըստ թեմայի
Կյանքեր են փրկել իրենց կյանքի գնով. Թորոսյանի ուղերձը ռազմական բժիշկների օրվա առթիվ
Հարութը երազում էր շատ երեխաներ ունենալ. ռազմական բժիշկը զոհվեց` 2 վիրավորներին փրկելով 
Քանի՞ բժիշկ է մեկնել Արցախ պատերազմի օրերին. նախարարությունն ամփոփում է
ԱԱԾ շենք

Ակնհայտ սուտ է. ԱԱԾ-ն հերքում է Միքայել Մինասյանի մեղադրանքներն Արարատ Միրզոյանի հասցեին

236
(Թարմացված է 00:09 17.01.2021)
ԱԱԾ-ն զգուշացնում է, որ քրեադատավարական կառուցակարգեր են գործադրվելու Մինասյանի հրապարակման հիման վրա։

ԵՐԵՎԱՆ, 17 հունվարի - Sputnik. Հայաստանի Ազգային անվտանգության ծառայությունն արձագանքել է ՀՀ նախկին դեսպան Միքայել Մինասյանի մեղադրանքներին՝ ուղղված ԱԺ նախագահ Արարատ Միրզոյանի հասցեին։

ԱԱԾ-ն հերքում է Մինասյանի մեղադրանքներն ու ընդգծում, որ նրա «Արարատ Միրզոյանի՝ հատուկ ծառայությունների գործակալ լինելուն և տարածված այլ փաստաթղթերին վերաբերող տեղեկատվությունն ակնհայտ սուտ է ու իրականության հետ որևէ աղերս չունի»։

«ՀՀ ազգային անվտանգության ծառայությունն ինչպես տվյալ անձին, այնպես էլ համանման անթույլատրելի գործելաոճ կիրառող բոլոր անհատներին ու կազմակերպություններին կոչ է անում բացառել հանրությանն ապատեղեկատվություն հրամցնելու կամ մոլորության մեջ գցելու վարքագիծը, իսկ մեր հայրենակիցներին հորդորում՝ այս պարագայում ևս տուրք չտալ մտացածին և ստահոդ նմանօրինակ հրապարակումներին ու ապավինել Հայաստանի Հանրապետության պատկան մարմինների կողմից տրամադրվող պաշտոնական տեղեկությունների բովանդակությանը»,- նշված է հաղորդագրության մեջ։

ՀՀ ազգային անվտանգության ծառայությունը զգուշացնում է Միքայել Մինասյանին. օրենքով նախատեսված թույլատրելի գործիքակազմի կիրառմամբ գործադրվելու են քրեադատավարական կառուցակարգեր։ ԱԱԾ-ն նաև հորդորում է ցուցաբերել բացառապես իրավահպատակ վարքագիծ:

236
թեգերը:
ՀՀ ազգային անվտանգության ծառայություն. ԱԱԾ, Արարատ Միրզոյան, Միքայել Մինասյան
Ըստ թեմայի
Փաշինյանը 1.5 տարի առաջ Արցախի նախագահին պատմել է Արցախի հետ կատարվելիքի մասին. Մինասյան
Սուրեն Պապիկյանը Միքայել Մինասյանի «սուտ մատնության» հարցով դիմելու է դատախազություն
«Արարատ Միրզոյանը Թուրքիայի հատուկ ծառայությունների գործակալ է». Միքայել Մինասյան
Արարատ Միրզոյան

Մինասյանը պետք է պատասխան տա. Արարատ Միրզոյանը՝ լրտեսության մեղադրանքի մասին

260
(Թարմացված է 23:27 16.01.2021)
Ավելի վաղ Վատիկանում ՀՀ նախկին դեսպանը մեղադրել էր ԱԺ նախագահին կրկնակի գործակալ լինելու մեջ։

ԵՐԵՎԱՆ, 16 հունվարի - Sputnik. ՀՀ Ազգային ժողովի նախագահ Արարատ Միրզոյանը Facebook-ի իր էջում արձագանքել է Վատիկանում ՀՀ նախկին դեսպան Միքայել Մինասյանի՝ իր հասցեին հնչեցրած մեղադրանքներին։ Մինասյանի պնդումները նա «ցնդաբանություն» է անվանել։

«Մ.Մինասյանի հերթական ցնդաբանությունը պետք է արժանանա պատշաճ քրեաիրավական գնահատականի և Մինասյանը պետք է պատասխան տա նաև այս սուտ մատնության համա»,- գրել է Արարատ Միրզոյանը։

Հիշեցնենք՝ Facebook-ի իր էջի ուղիղ եթերում Միքայել Մինասյանն ասել էր, թե Արարատ Միրզոյանը Թուրքիայի հատուկ ծառայությունների գործակալ է։ Նրա պնդմամբ՝ այդ մասին իմացել է Հայաստանի Ազգային անվտանգության ծառայությունն ու Միրզոյանն սպառնացել՝ կամ դառնալու двойной агент և աշխատելու է ԱԱԾ-ի համար, կամ պատասխան է տալու պետական դավաճանության համար։

Միքայել Մինասյանը նաև հրապարակել էր մի ձեռագիր դիմում, որն, ըստ նրա, գրել է հենց Արարատ Միրզոյանը 2007 թվականին։ Դիմումում Միրզոյանը խոստանում է «ՀՀ Սահմանադրության և օրենքների շրջանակում և իմ հնարավորությունների սահմանում աջակցելու ՀՀ Ազգային անվտանգության ծառայությանը»։

ԱԱԾ–ն Արարատ Միրզոյանի ծեծի թեմայով գաղտնալսված խոսակցություններ է հրապարակել. տեսանյութ

260
թեգերը:
լրտես, Արարատ Միրզոյան, Միքայել Մինասյան
Ըստ թեմայի
Արարատ Միրզոյանը հանդիպել է Գարեգին Բ-ի հետ
Ազգային ժողովը շարունակում է հերթական քառօրյան. նիստը վարում է Արարատ Միրզոյանը
ՀՀ նախագահն այցելել է ԱԺ, Արարատ Միրզոյանի հետ քննարկել երկրում ստեղծված իրավիճակը
C-400 «Տրիումֆ

Ռուսական C-400-ը «գրավում է» չորրորդ երկիրը. իսկ հետո՞

188
(Թարմացված է 00:11 17.01.2021)

Ռուսական արտադրության C-400 զենիթահրթիռային համակարգերի խաղաղ էքսպանսիան Եվրասիայի նորանոր երկրներ է ընդգրկում։  Չինաստանից, Թուրքիայից, Հնդկաստանից հետո «Տրիումֆ»-ով վերազինման են պատրաստվում Բելառուսի Հանրապետության Ռազմաօդային ուժերն ու ՀՕՊ-ը։ C-400 համակարգերի ձեռքբերման գործընթացում են նաև Իրաքը, Քաթարը և Մարոկկոն (Աֆրիկյան մայրցամաքի հյուսիս-արևմուտք): Մոլորակում C-400 զենիթահրթիռային համակարգի հաջող տարածման հիմքը մոտ անալոգների բացակայությունն է, բացառիկ մարտական բնութագրերը։

Ալեքսանդր Խրոլենկո, ռազմական վերլուծաբան

Բելառուսի Հանրապետության զինված ուժերի ռազմաօդային ուժերի և հակաօդային պաշտպանության զորքերի հրամանատար, գեներալ-մայոր Իգոր Գոլուբը հունվարի 14-ին հայտարարել է C-400 «Տրիումֆ» նորագույն համակարգերով ՀՕՊ ստորաբաժանումների վերազինման մասին, որոնք հատուկ մշակված են ԱՄՆ-ի ռազմաօդային ուժերի հինգերորդ սերնդի F-22 և F-35 կործանիչների մարտական հնարավորությունների հաշվառմամբ (ՆԱՏՕ-ն պլանավորում Է Եվրոպայում հարյուրավոր F-35-ներ տեղակայել):

Բացի այդ, զորքերում ընթանում են «Панцирь-С» զենիթահրթիռային-հրանոթային համալիրի յուրացման նախապայմանագրային աշխատանքները։ Կնքվել են Մի-35 բազմանպատակային հարվածային ուղղաթիռների և ռուսական արտադրության Սու-30ՍՄ կործանիչների երկրորդ խմբաքանակի մատակարարման պայմանագրեր: Բելառուսական զորքերը 2021 թվականին սպառազինության մեջ կներառեն  «Противник-Г» և «Восток» նոր ռադարները:

Ավելի վաղ երկրի օդային տարածքի պահպանության մարտական հերթապահության էր անցել (Բարանովիչի շրջանում) ռուսական արտադրության S-դիապազոնի նոր «Сопка-2» եռակոորդինատային ռադիոլոկացիոն համալիրը: Արևմուտքի պատժամիջոցներն ու տնտեսական դժվարությունները Ռուսաստանը բելառուսական բանակի համար դարձնում են սպառազինության միակ մատակարարը։

Բելառուսի Հանրապետության երկինքն անառիկ ամրություն է դառնում ցանկացած ագրեսորի համար։ ՌՕՈւ-ի և ՀՕՊ-ի զորքերը սովորում են մարտական խնդիրներ լուծել ամենաբարդ իրադրությունում՝ հաշվի առնելով հակառակորդի կողմից հրթիռային զենքի և անօդաչու թռչող սարքերի կիրառման սիրիական, լիբիական և ղարաբաղյան փորձը:

Լավատեսական դինամիկա

Ռուսաստանի հետ ակտիվ ռազմատեխնիկական համագործակցությունն ամրապնդում է աշխարհի հիսուն երկրների, այդ թվում՝ ԱՊՀ յոթ երկրների անվտանգությունն ու ինքնիշխանությունը։ Արտերկրի մասնագետներն առավել արդյունավետ պաշտպանական գործիքներ են համարում ՌԴ արտադրության մարտական ինքնաթիռներն ու ՀՕՊ համակարգերը։

Չինաստանը դարձավ  С-400 «Триумф» զենիթահրթիռային համակարգերի առաջին արտասահմանյան պատվիրատուն։ С-400 ԶՀՀ-ների երկու գնդային փաթեթների մատակարարման ռուս-չինական պայմանագրի մասին հայտնի է դարձել 2014 թվականի նոյեմբերին: Մեկ փաթեթի կազմում են շարժական հրամանատարական կետը, արձակման կայանքների երկու դիվիզիոնը, ռադիոլոկացիոն կայանները և երկու տեսակի ավելի քան 120 նորագույն զենիթային կառավարվող հրթիռներ:

«Տրիումֆներից» առաջին հաջող կրակոցները չինացի մասնագետները կատարել են 2018 թվականի դեկտեմբերին, և մոտ 250 կմ հեռավորության վրա խոցել են 3000 մ/վ արագությամբ թռչող բալիստիկ թիրախը: С-400 համակարգերի երկրորդ գնդային կոմպլեկտը Չինաստանը ստացել է 2019 թվականի դեկտեմբերին։

Չինաստանում ռուսական «Տրիումֆների» հիմնական առավելություն են համարում մինչև 400 կիլոմետր գործողության հեռահարությունը (ինչը չի կարող աշխարհի ոչ մի «երկիր-օդ» հրթիռային համակարգ), հակառակորդի անօդաչու թռչող սարքերի ոչնչացման ունակությունը՝ մարտական գործողությունների ընթացքում թիրախավորումը  և մեծ հեռավորությունից լրտեսությունը կանխելու համար: C-400 համակարգերը թույլ են տալիս հուսալիորեն վերահսկել ծայրամասային և վիճելի շրջանները ՉԺՀ-ի շուրջ։

Ռուսաստանն ու Թուրքիան С-400 «Триумф» ԶՀՀ մատակարարումների մասին պայմանավորվել են 2017 թվականին, պայմանագրի գինը՝ 2,5 մլրդ դոլար: Դա լուրջ ճգնաժամ առաջացրեց թուրք-ամերիկյան հարաբերություններում։ Սպառնալով պատժամիջոցներ կիրառել, ինչպես նաև հանել Թուրքիային ամերիկյան F-35 կործանիչների արտադրության ծրագրից՝ Վաշինգտոնը պահանջում էր հրաժարվել գործարքից և ձեռք բերել բացառապես ամերիկյան Patriot համալիրները։ Անկարան չկատարեց ԱՄՆ-ի վերջնագրային պահանջները, և 2019 թվականի ամռանը ստացավ C-400 զենիթահրթիռային համակարգերի չորս դիվիզիոն (առաջին փաթեթ):

Թուրքիան մտադիր է ձեռք բերել երկրորդ փաթեթը և ձևավորել  ամենահուսալի և ժամանակակից համակարգը՝ երկրում կարևոր օբյեկտները պաշտպանելու համար: Անկարայի մոտ տեղակայված C-400 համակարգը փորձարկումների ընթացքում F-16 Fighting Falcon կործանիչ է հայտնաբերել ՌՏԿ-ի գործողության գոտու սահմանին՝ 600 կիլոմետր հեռավորության վրա:

Ինչպես զսպել ԱՄՆ-ի և ՆԱՏՕ-ի «ախորժակը»․ ՌԴ միջուկային ուժերի զորավարժությունները

Այսինքն, մարտական հերթապահության ռեժիմում, երբ օդային թիրախների հայտնաբերումն ու ոչնչացումն իրականացվում է ավտոմատ ռեժիմով, F-16 Fighting Falcon կործանիչները կարող են «Տրիումֆի» կողմից ոչնչացվել Անկարայից 400 կմ հեռավորության վրա։ Թուրքիային С -400 զենիթահրթիռային համակարգերի երկրորդ փաթեթ (գնդի) մատակարարելու վերաբերյալ սկզբունքային համաձայնություն է ձեռք բերվել 2020 թվականի հունիսին:

Հնդկաստանը 2018 թվականի հոկտեմբերին C-400-ի հինգ գնդային փաթեթների մատակարարման 5,43 մլրդ դոլարի պայմանագիր է կնքել: Դելիում վճռական են տրամադրված՝ չնայած ԱՄՆ-ի աննախադեպ ճնշմանը։ The Times Of India հրատարակության տվյալներով՝ ռուսական «Տրիումֆները» կտեղակայվեն Հնդկաստանի արևմտյան, հյուսիսային և արևելյան շրջաններում (հաշվի առնելով Չինաստանի եւ Պակիստանի կողմից սպառնալիքների դաշտը) և հեղափոխություն կդառնան երկրի ՀՕՊ համակարգում:

С-400 զենիթահրթիռային համակարգի շահագործման և մարտական կիրառման ուսուցման համար 100 հնդիկ մասնագետներից կազմված առաջին խումբը Ռուսաստան կժամանի մինչև 2021 թվականի հունվարի վերջը: Հնդկաստանում «Տրիումֆների» առաջին գնդային փաթեթը նախատեսվում է սպառազինության վերցնել 2021 թվականի վերջին: Ռուսաստանը մտադիր է մինչև 2025 թվականը մատակարարել C-400 ԶՀՀ-ների բոլոր հինգ գնդային փաթեթներ:

Հաղթական հեռանկարներ

«Տրիումֆների» ձեռքբերման բանակցություններ են վարում Մարոկկոն, Քաթարը, Իրաքը։ Ավելի վաղ ռուսական C-400 զենիթահրթիռային համակարգի ձեռքբերման հարցում շահագրգռվածություն էին հայտնել Ալժիրը, Վիետնամը, Եգիպտոսը, Սաուդյան Արաբիան, ընդհանուր առմամբ՝ 12 երկիր:

Արտասահմանյան պահանջարկը գերազանցում է արտահանողի առաջարկը (վերազինման գերակայությունը շարունակում են մնալ Ռուսաստանի Օդատիեզերական ուժերը)։ Թեև ԱՄՆ-ի Պատժամիջոցների միջոցով հակառակորդներին հակազդելու մասին օրենքով (նախագահ Դոնալդ Թրամփի կողմից ստորագրվել է 2017 թվականի օգոստոսին) այդ պետությունների դեմ կարող են պատժամիջոցներ սահմանել: Ոչինչ չի կանգնեցնի աշխարհի լավագույն C-400 մեծ հեռահարության հակաօդային պաշտպանության համակարգին իր ճանապարհին։

«Տրիումֆ» համակարգերը փոխում են աշխարհը։ Եթե C-400 զենիթահրթիռային համակարգերը ձեռք բերի, օրինակ, Իրանը, Պարսից ծոցի գոտում ԱՄՆ-ի ավիակիրներն անօգուտ խաղալիքների կվերածվեն։ Վաշինգտոնն անխուսափելիորեն ստիպված կլինի շտկել աշխարհայացքի հայեցակարգը, «վերաիմաստավորել իր ոճը» Իրանի հետ երկխոսության հարցում։ Եվ դա արդեն տեղի է ունենում Իրաքում։

Իրաքում ԱՄՆ դեսպանատունն ու ռազմակայանները պարբերաբար հրթիռակոծվում են։ Ամերիկյան զենիթահրթիռային համալիրները չեն կարողացել անդրադարձնել հրթիռային հարձակումները։ Հրթիռները պայթել են Բաղդադի «կանաչ գոտում», ինչը ԱՄՆ-ին ստիպել է տարհանել դիվանագիտական անձնակազմի մեծ մասը և իրաքցիներից վարձակալել Ռուսաստանից ձեռք բերված «Панцирь-С» ԶՀՀ-ն:

Սակայն վերադառնանք C-400 զենիթահրթիռային համալիրներին։ «Տրիումֆի» կարևոր առավելություններն են ՌՏԿ-ի շրջանաձև տեսադաշտը և չորս տեսակի հրթիռների կիրառման ճկունությունը (բազմամակարդակ ՀՕՊ-ի ձևավորում): Տարբեր տիպի հրթիռների օգտագործումը թույլ է տալիս արդյունավետ կերպով խոցել գերձայնային թիրախները, մարտական ավիացիան, անօդաչու սարքերը, թևավոր, տակտիկական և բալիստիկ հրթիռները բարձրությունների ողջ մատչելի տիրույթում՝ 5 մետրից մինչև 30 կմ, և հեռահարության տիրույթում՝ 400 կմ-ից մինչև 2 կմ:

Ադրբեջանում թուրքական ավիաբազաների տեղակայումն ուղղակի մարտահրավեր է ՌԴ–ին և Իրանին

«Տրիումֆի» մեկ մարտկոցը կարող է ունենալ մինչև 72 հրթիռ և միաժամանակ գնդակոծել մինչև 36 թիրախ, որոնք թռչում են մինչև 4800մ/վրկ արագությամբ: С -400 համակարգը կարող է ինտեգրել տարբեր տիպի զենիթահրթիռային համակարգերը (С-300, Панцирь-С1, Тор-М1) և կառավարել տարբեր հեռահարության ՀՕՊ միջոցների ցանցը՝ ռադիոէլեկտրոնային հակազդման ցանկացած պայմաններում:

Ի դեպ, արդեն 2021 թվականին ռուսական զորքերը կստանան C-500 հեղափոխական համակարգը, որը պատրաստ է պատերազմի մինչև 200 կմ բարձրություններում: Ռազմատեխնիկական համագործակցության գծով Ռուսաստանի գործընկերներին ժամանակն է տեղ զբաղեցնել նոր հերթում:

188
թեգերը:
սպառազինություն, Ռուսաստան, զենիթահրթիռային համալիր
Ըստ թեմայի
Ամենակարևորն այն է, որ Արցախում կողմերին ստիպեն չկրակել. նախկին խաղաղապահ Դեմուրենկո
Ի հեճուկս մարտահրավերների․ հետագա ինտեգրումը ոչ միայն Երևանին է պետք, այլև Մոսկվային
2020-ի արդյունքները․ ինչպես Ղարաբաղը Կովկասը վերադարձրեց լրահոսի առաջին հորիզոնական