ԵՐԵՎԱՆ, 27 նոյեմբերի – Sputnik. Արցախում ժամկետային ծառայություն անցնող զինվորների ծնողներն այսօր բողոքի ակցիա էին կազմակերպել ՀՀ պաշտպանության նախարարության դիմաց։ Նրանք հայտարարեցին, որ հետո էլ մեծածավալ ակցիա են իրականացնելու կառավարության շենքի մոտ։
Ծնողները պահանջում են, որ մինչև սահմանի փակումն ու տարածքները Ադրբեջանին հանձնելը վերադարձնեն իրենց երեխաներին։
«Մենք տեղեկություն ենք ստացել, որ Բերձորը պետք է հանձնվի դեկտեմբերի 1-ին։ Այդ պատճառով թող այսօր հետ բերեն մեր էրեխեքին, մենք երաշխիքներ չունենք, որ տարածքները հանձնելուց հետո նրանք չեն արժանանա նույն ճակատագրին, ինչ մարտերին մասնակցած մյուս զինվորները», – ասաց զինծառայողներից մեկի մայրը։
Մեկ ուրիշ ծնող էլ ավելացրեց` չի ցանկանում, որ իր երեխան էլ անհետ կորչի կամ հայտնվի հակառակորդի գերության մեջ։ Նա իշխանությանը հորդորեց ժամանակին արձագանքել։
«Նրանցից ոչ ոք չի կարող երաշխավորել, որ մեր երեխաները ողջ–առողջ կվերադառնան նոյեմբերի 30-ից հետո», – ասաց երրորդը` կոչ անելով մտահոգ մարդկանց միանալ ակցիային։
Բերձորի համայնքի ղեկավար Նարեկ Ալեքսանյանն ավելի վաղ Sputnik Արմենիայի հետ զրույցում ասել էր, որ Բերձոր, Աղավնո և Սուս համայնքի բնակիչները կարող են շարունակել ապրել իրենց տներում։ Միևնույն ժամանակ նա ընդգծել էր, որ չի կարող երաշխավորել, որ մեկ ժամից իրավիճակը չի փոխվի։
Հիշեցնենք` նոյեմբերի 25-ին Բերձորի բնակիչներին զգուշացրել են, որ անհրաժեշտ է հավաքել ունեցվածքն ու լքել քաղաքը, քանի որ համայնքն անցնում է ադրբեջանական կողմին։ Ավելի ուշ Քաշաթաղի (Լաչինի շրջան) սոցցանցի էջում տեղեկություն հայտնվեց, որ մինչև նոյեմբերի 30-ը ոչ ոք ստիպված չէ լքել քաղաքը։ Սակայն որոշ ժամանակ անց այդ հաղորդագրությունը հեռացվեց։
Ի դեպ, Բերձոր քաղաքով է անցնում այս պահին Հայաստանն ու Արցախը կապող միակ ճանապարհը։
Նոյեմբերի 9-ին ՀՀ վարչապետ Նիկոլ Փաշինյանի, ՌԴ նախագահ Վլադիմիր Պուտինի ու Ադրբեջանի նախագահ Իլհամ Ալիևի միջև ստորագրված հայտարարության համաձայն` ռազմական գործողությունները դադարեցվեցին։