ԵՐԵՎԱՆ, 26 նոյեմբերի – Sputnik. ՀՀ վարչապետ Նիկոլ Փաշինյանը կընդունի անհետ կորած զինծառայողների ծնողներին։ Կառավարությունից դուրս գալուց հետո հայտարարեց անհետ կորած զինվորներից մեկի հայրը։
Հայտնել էինք, որ կառավարության առջև բողոքի ակցիա է. անհետ կորած զինծառայողների ծնողները պահանջում են, որ իրենց երեխաներից որևէ տեղեկություն տրամադրեն։ Նրանք փորձել էին Փաշինյանի ավտոշարասյունը կանգնեցնել ու վարչապետի հետ զրուցել, սակայն նա հեռացել էր։ Դրանից հետո բողոքի ակցիա անողներից մեկին հրավիրեցին ներս` կառավարության ներկայացուցչի հետ զրույցի։
«Գնում ենք վարչապետի հետ հանդիպման։ Ինձ ասացին` 10 հոգանոց խումբ կազմեք, որ գնանք հանդիպենք։ Պիտի ամեն ինչ ասենք Փաշինյանին, պետք է մեզ տան այն հնարավորությունը, որ մասնակցենք բոլոր գործընթացներին»,–ասաց անհետ կորած զինվորից մեկի հայրը։
Նա հորդորեց մյուսներին սպասել իրենց կառավարության առջև` հանդիպման արդյունքներն ամփոփելու համար։
Հիշեցնենք, որ Նիկոլ Փաշինյանը օրերս կրկին ընդունել էր բողոքի ակցիա անող ծնողներին։ Սակայն ծնողները հայտնել էին` հանդիպումն իրենց չի բավարարել, քանի որ վարչապետն ընդհանուր պատասխաններ է տվել իրենց հարցերին։
Սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում սկսեց արցախա–ադրբեջանական սահմանի ողջ երկայնքով։ Նոյեմբերի 9-ին ՀՀ վարչապետ Նիկոլ Փաշինյանի, ՌԴ նախագահ Վլադիմիր Պուտինի ու Ադրբեջանի նախագահ Իլհամ Ալիևի միջև ստորագրված հայտարարության համաձայն` ռազմական գործողությունները դադարեցվեցին։
Նոյեմբերի 20-ի տվյալներով՝ Արցախի ՊԲ-ն հրապարակել է 1678 զոհվածների անունները։
Վերջին տվյալներով` քաղաքացիական անձանց շրջանում կա 50 զոհ ու 148 վիրավոր։
Անհետ կորածների, գերիների ու վիրավորների մասին պաշտոնական տվյալներ չկան։
