Օնիկ Գասպարյան

Մենք պետք է ընտրություն կատարեինք շատ վատի և ողբերգության միջև. Օնիկ Գասպարյանի ուղերձը

743
(Թարմացված է 13:40 17.11.2020)
ԶՈւ գլխավոր շտաբի պետն ուղերձով է հանդես եկել` մանրամասներ ներկայացնելով մինչպատերազմյան իրավիճակի, ինչպես նաև պատերազմի օրերին իր աշխատանքի մասին։ Պատերազմի 4-րդ օրը Գասպարյանն ասել է, որ 2-3 օրերի ընթացքում պետք է կանգնեցնել պատերազմը։

ԵՐԵՎԱՆ, 17 նոյեմբերի - Sputnik. Բոլորի համար շատ ծանր պայմաններով համաձայնագիրն ընդունվել է իրոք իրադրության բազմակողմանի գնահատման արդյունքում: Պետք է ընտրություն կատարվեր շատ վատի և ողբերգության միջև։ Իր ուղերձում հայտնել է ՀՀ զինված ուժերի գլխավոր շտաբի պետ Օնիկ Գասպարյանը` անդրադառնալով պատերազմի ավարտն ազդարարող համաձայնագրի կնքմանը։

«Մենք նախընտրեցինք շատ վատը: Այդ օրը իմ կյանքի վատագույն օրն էր, ինձ համար անձնական ողբերգություն… Բայց գիտակցումը, որ այդ որոշման արդյունքում հաջողվեց պահպանել Արցախի մեծ մասը և պաշտպանության բանակի հիմնական ռազմական ներուժը, ասում է, որ մենք ընկճվելու իրավունք չունենք. պե´տք է համախմբվել, արագ վերականգնվել և պատրաստվել պայքարը շարունակելուն»,–ասում է Գասպարյանը։

Նա հայտնում է, որ որպես զինված ուժերի գլխավոր շտաբի պետ և անմիջական հրամանատար` պատասխանատվություն է կրում զինված ուժերի բոլոր հաջողությունների ու անհաջողությունների համար:

ՊԲ-ն հերքում է Ադրբեջանի զինուժի նոր գրոհի և զինվորների շրջափակման մեջ հայտնվելու լուրերը

Միաժամանակ, Գասպարյանը մանրամասներ է հայտնել դեռ պատերազմից առաջ իր իրականացրած քայլերի վերաբերյալ` հերքելով լուրերը, թե ԶՈւ–ի ղեկավարությունը պետության ղեկավարին ոչ իրատեսական վերլուծություն է ներկայացրել հակառակորդի գործողությունների հավանական բնույթի և նրա զինված ուժերի կարողությունների վերաբերյալ։

Գասպարյանը վստահեցնում է, որ իր` ԶՈւ ԳՇ պետի պաշտոնին նշանակվելուց 4 օր անց` հունիսի 12-ին, ՀՀ վարչապետին, իսկ մի քանի օր անց` նաև անվտանգության խորհրդին ներկայացրել է տարածաշրջանում ռազմաքաղաքական իրադրության վերլուծությունը և մեր զինուժի կարողությունները: Նա ներկայացրել է առաջարկություններ պետության ռազմական անվտանգության աստիճանը բարձրացնելու ուղղությամբ:

Մասնավորապես, հայտնել է, որ այլևս մեր հակառակորդը միայն Ադրբեջանը չէ, այլև Թուրքիան: Հետևաբար, 2 պետությունների ռազմական ներուժին ՀՀ–ն չի կարող արդյունավետ դիմակայել, և անհրաժեշտ է քաղաքական ու դիվանագիտական ողջ ներուժն ուղղել պատերազմից խուսափելուն կամ գոնե այն հետաձգելուն: Գասպարյանը հայտնում է` իր առաջարկն ընդունվել է, սակայն նրան հարց են ուղղել` ինչ կլինի, եթե չհաջողվի պատերազմից խուսափել։ Ի պատասխան Գասպարյանը նշել է, որ պարտադրված պատերազմում պետք է փորձել հնարավորինս սեղմ ժամկետներում հասցնել հակառակորդին մեծ կորուստներ և ստիպել հրաժարվել հետագա գործողություններից. երկարատև պատերազմից պետք է խուսափել` հաշվի առնելով մեր պաշարների առկայությունը: Հենց այդ ժամանակ էլ բարձրացվել է նաև 100 000 կազմ ունեցող աշխարհազորային միավորումների կազմավորման հարցը:

Ընդդիմությունը պահանջում է ԱԺ-ում քննարկել եռակողմ համաձայնագիրն ու վարչապետի հրաժարականը

«Ինչևէ, պատերազմից չկարողացանք խուսափել, և սեպտեմբերի 27-ին թշնամին բազմակի անգամ գերազանցող ուժերով անցավ լայնածավալ հարձակման Արցախի ողջ ճակատով: Պատերազմի չորրորդ օրը` անվտանգության խորհրդի նիստի ժամանակ ներկայացրեցի մեր կորուստները և ստեղծված իրադրության վերաբերյալ զինված ուժերի գնահատականը` նշելով, որ 2-3 օրերի ընթացքում անհրաժեշտ է միջոցներ ձեռնարկել պատերազմը կանգնեցնելու համար»,–ասում է Գասպարյանը։

Նա զեկուցել է, որ պատերազմը չկանգնեցնելու դեպքում մեր ռեսուրսները սեղմ ժամկետում կսպառվեն, և յուրաքանչյուր հաջորդ օրերի ընթացքում ունենալու ենք բանակցային գործընթացի համար ոչ բարենպաստ պայմաններ: ԶՈւ գլխավոր շտաբի պետը հավաստիացնում է` նմանատիպ գնահատականներ բազմաթիվ անգամ ներկայացրել է նաև վարչապետի հետ աշխատանքի ընթացքում, ինչպես նաև ԱԽ–ի նիստերում: Սակայն պատերազմը որոշակի փուլում կանգնեցնելու բոլոր փորձերը և առաջարկությունները Թուրքիայի և Ադրբեջանի կողմից մերժվել են, և հայկական կողմը պարտադրված շարունակել է մարտական գործողությունները:

Իր խոսքն ամփոփելով` Գասպարյանը նշում է, որ չպե´տք է հուսահատվենք ու պե´տք է շարունակենք մեր հայրենյաց սահմանների պաշտպանությունը, լրջորեն վերլուծենք և անենք հետևություններ:

Հիշեցնենք` նոյեմբերի 9-ին ՌԴ նախագահ Վլադիմիր Պուտինը, ՀՀ վարչապետ Նիկոլ Փաշինյանը և Ադրբեջանի նախագահ Իլհամ Ալիևը համատեղ հայտարարություն ընդունեցին ռազմական գործողությունների դադարեցման վերաբերյալ։

Եռակողմ հայտարարության մեջ մասնավորապես նշվում է, որ մինչև նոյեմբերի 15-ը Ադրբեջանին է վերադարձնում Քելբաջարը (ավելի ուշ այդ ժամկետը 10 օրով երկարաձգվեց-խմբ.), մինչև նոյեմբերի 20-ը՝ Աղդամի շրջանը, մինչև դեկտեմբերի 1-ը՝ Լաչինի շրջանը` թողնելով միջանցք 5 կմ լայնությամբ, որը ապահովելու է Հայաստանի կապը, սակայն չի շոշափելու Շուշին։ 

Ինչ տվեց Արցախի վերաբերյալ եռակողմ հայտարարությունը․ քարտեզ

Շփման գծի երկայնքով Լեռնային Ղարաբաղում և Լաչինի միջանցքում հաստատվում են ռուսական խաղաղապահ ուժեր 1960 զինվորականի չափով, հրազենային զենքով, 90 զրահատրանսպորտային և 380 ավտոմեքենաներով և հատուկ տեխնիկայով։

Խաղաղապահները մնում են հինգ տարի ժամանակով` ավտոմատ երկարացման հնարավորությամբ, եթե հաջորդ հինգ տարվա համար կողմերը ժամկետի լրանալուց վեց ամիս առաջ չեն հայտարարում այս դրույթի կիրառությունը դադարեցնելու մասին։

Նշվում է նաև, որ ներքին տեղահանվածները և փախստականները վերադառնում են ԼՂ և հարակից շրջաններ, իրականացվում է ռազմագերիների փոխանակություն և մյուս պահվող անձանց փոխանակություն, ապաարգելափակվում են բոլոր տնտեսական և տրանսպորտային կապերը տարածաշրջանում։

743
թեգերը:
Օնիկ Գասպարյան, ուղերձ, Արցախյան պատերազմ
Ըստ թեմայի
Մնացականյանն ու Լավրովը քննարկել են Արցախի վերաբերյալ եռակողմ հայտարարության իրականացումը 
Փաշինյանն ասաց` ինչ շրջադարաձային փոփոխություն կլինի եռակողմ հայտարարության արդյունքում
Եռակողմ հայտարարությունից հետո Ադրբեջանն առնվազն 6 մարդ է պատանդ վերցրել. Ալավերդյան
ՀՀ ԱԱԾ

ԱԱԾ-ն խուզարկում է ԲՀԿ Երիտասարդների միության նախագահի բնակարանը

10
(Թարմացված է 19:47 26.11.2020)
Աշոտ Անդրեասյանը շեշտել է, որ խուզարկության հիմնավոր պատճառները բացակայում են։

ԵՐԵՎԱՆ, 26 նոյեմբերի - Sputnik. ԱԱԾ աշխատակիցներն այս պահին խուզարկում են ԲՀԿ Երիտասարդների միության նախագահ Աշոտ Անդրեասյանի բնակարանը: Տեղեկությունը հայտնում է ինքը՝ Աշոտ Անդրեասյանը Facebook-ի իր էջում։

«Խուզարկության հիմնավոր պատճառները բացակայում են: Նշեմ նաև, որ գիշերը կրկին անգամ ապօրինի կերպով մեքենաս բերման են ենթարկել կենտրոնի ոստիկանական բաժանմունք առանց որևէ ծանուցման և հիմքի։

Ապօրինաբար բացել են մեքենայիս դռները և խուզարկել են այն վնասելով իմ անձնական գույքը»,-նշված է գրառման մեջ։

Անդրեասյանը նշել է, որ այդ ամենը խոսում է «երկրում տիրող ամենաթողության և խուլիգան ղեկավար ունենալու մասին»։

«Քաղաքական շինծու հետապնդումներով չեք լռեցնելու մեզ և չեք կոծկելու ձեր դավաճանությունը»,-եզրափակել է նա։

Հավելենք, որ նոյեմբերի 9-ին եռակողմ հայտարարության ստորագրումից հետո ընդդիմադիր կուսակցությունները բողոքի ակցիաներ են սկսել՝ վարչապետ Նիկոլ Փաշինյանի հրաժարականի պահանջով։ Այդ ընթացքում ընդդիմության բազմաթիվ ներկայացուցիչներ բերման են ենթարկվել ու որոշ ժամանակ անց ազատ արձակվել, ոմանց բնակարաններում խուզարկություն է անցկացվել։

Իսկ ՀՅԴ անդամ Գեղամ Մանուկյանը, ՍԴ նախկին դատավոր Կիմ Բալայանն ու Անահիտ Կիրակոսյանն անժամկետ հացադուլ են հայտարարել՝ Փաշինյանի հրաժարականի պահանջով։

 

10
Զինվորականի հագուստ

Զոհվել է «Արցախի հերոսի» կոչմանն արժանացած Դավիթ Գրիգորյանը

735
(Թարմացված է 16:57 26.11.2020)
Դավիթ Գրիգորյանը Ֆիզուլիի և Կարախանբելիի հատվածում 15 տանկ և մեկ միավոր հետևակային մարտական մեքենա էր խոցել։

ԵՐԵՎԱՆ, 26 նոյեմբերի – Sputnik. Սարդարապատի համայնքապետարանը տեղեկացնում է, որ զոհվել է «Արցախի հերոսի»  կոչմանն արժանացած Դավիթ Գրիգորյանը։ Դավիթը Սարդարապատ համայնքի բնակիչ էր։

Հարութը երազում էր շատ երեխաներ ունենալ. ռազմական բժիշկը զոհվեց` 2 վիրավորներին փրկելով

«Մեր Դավիթ, մեր հերոս, մեր սարդարապատցի Դավիթ դու հաղթեցիր, մենք պարտվեցինք քանզի մեր մեջ քիչ էր քո տեսակը։ Խոնարհվում ենք քո առաջ, քո կատարած սխրանքների առաջ, դու պետք է մնայիր ու կրթեիր մի ողջ ժողովուրդ»,–նշված է համայնքապետարանի ֆեյսբուքյան էջում։

Սարդարապատի համայնքի ղեկավար Բաբկեն Վարդանյանը Sputnik Արմենիայի հետ զրույցում հայտնեց` Դավիթ Գրիգորյանը զոհվել էր դեռ նոյեմբերի 2-ի լույս 3-ի գիշերը։ Տղայի դին, սակայն, նոր են դուրս բերել։

Դավիթ Գրիգորյանի հոգեհանգստի արարողությունը տեղի կունենա այսօր` Սարդարապատ համայնքի Սուրբ Աստվածածին եկեղեցում։

Հիշեցնենք, որ դեռ հոկտեմբերի 4-ին Արցախի նախագահը հայտարարել էր, որ «Արցախի հերոսի» կոչմանն է արժանացել Դավիթ Լյովայի Գրիգորյանը։ Նա սեպտեմբերի 27-ից մասնակցելով մարտերին` Ֆիզուլիի և Կարախանբելիի հատվածում 15 տանկ և մեկ միավոր հետևակային մարտական մեքենա էր խոցել։ Հարությունյանը հայտնել էր, որ Գրիգորյանը շարունակում է մնալ առաջնագծում։

735
թեգերը:
«Արցախի հերոս» բարձրագույն կոչում, Արցախյան պատերազմ, Արցախ, Զոհ, Սարդարապատ
Ըստ թեմայի
Դեռ երկար ժամանակ վատ է լինելու. թեժ քննարկում ԱԺ-ում ռազմական դրությունը չեղարկելու շուրջ
Հայաստանն ու Ադրբեջանը ԵՄ-ի համար «երկրորդ կարգի» երկրներ են․ Լավրով
«Արցախն Ադրբեջանին է հանձնում ոչ թե 121, այլ 181 բնակավայր». ԱԺ փոխնախագահ