Աշակերտ

ԿԳՄՍՆ–ն հայտնում է` երբվանից և ինչպես կվերսկսվի ուսումնական գործընթացը

641
(Թարմացված է 15:45 12.11.2020)
Բարձրագույն, նախնական և միջին մասնագիտական հաստատություններն ուսուցումը կկազմակերպեն հեռավար եղանակով, բացառությամբ որոշ մասնագիտություններով գործնական պարապմունքների։

ԵՐԵՎԱՆ, 12 նոյեմբերի – Sputnik. Նոյեմբերի 13-ից Հայաստանում վերսկսվում է ուսումնական գործընթացը։ Տեղեկությունը հայտնում է ՀՀ կրթության, գիտության, մշակույթի և սպորտի նախարարությունը։

Բարձրագույն, նախնական և միջին մասնագիտական հաստատություններում ուսուցումը կիրականացվի հեռավար եղանակով, բացառությամբ որոշ մասնագիտություններով գործնական պարապմունքների, որոնք կկազմակերպվեն կիսամյակի վերջում և կանցկացվեն հաստատված հակահամաճարակային կանոնների պահպանմամբ։

Ինչ վերաբերում է դպրոցներին, այն համայնքներում, որտեղ գործում է  ներհամայնքային տրանսպորտ, 5-12-րդ դասարանների ուսուցումը կիրականացվի հեռավար կարգով։ Իսկ տրանսպորտ չունեցող համայնքների 5-12-րդ դասարաններում ուսուցումն իրականացվելու է դպրոցում` սահմանված սանիտարական նորմերով (անհատական պաշտպանիչ միջոցներ, ջերմաչափում)։

1-4-րդ դասարաններում ուսուցումը հեռավար կազմակերպելը նախարարությունը նպատակահարմար չի գտնում, հետևաբար առաջարկում է այն իրականացնել առկա տարբերակով` վերոհիշյալ նորմերի պահպանմամբ։

Ինչ է սպասում դպրոցականներին աշնանային արձակուրդից հետո․ մանրամասնում է ԿԳՄՍ փոխնախարարը

Նախադպրոցական հաստատություններում, հաշվի առնելով այն հանգամանքը, որ հեռավար տարբերակն անհնար է կիրառել, իսկ գործունեության դադարեցումը բազմաթիվ ընտանիքների համար լրացուցիչ սոցիալ-տնտեսական խնդիրներ կառաջացնի, նախարարությունը որոշել է նոյեմբերի 13-ից վերսկսել նախադպրոցական հաստատությունների գործունեությունը։

Արվեստի, գեղարվեստի, երաժշտական դպրոցներում ևս դասերը առկա եղանակով կվերսկսվեն նոյեմբերի 13-ից (վերոհիշյալ պատճառաբանությամբ)։

Հայ աշակերտն ԱՄՆ-ում շախմատի օգնությամբ դրամահավաք է կազմակերպել Արցախին օգնելու համար

Արցախի Հանրապետությունից Հայաստան տեղափոխված հազարավոր երեխաների կրթության, պատերազմական և հետպատերազմյան պայմաններում երեխաների զարգացման, հոգեկան առողջությունն ու անհրաժեշտ աջակցության նպատակով, ՀՀ ԿԳՄՍ նախարարությունը ԵՊՀ անձի հոգեբանության ամբիոնի և Մանկական հոգեբանների ասոցիացիայի հետ համատեղ իրականացնում է բոլոր հանրակրթական ուսումնական հաստատությունների մանկավարժների վերապատրաստումներ։

Հիշեցնենք, որ հաշվի առնելով համավարակի տարածմամբ ստեղծված իրավիճակը և ՀՀ առողջապահության նախարարության ցուցումը՝ ՀՀ կրթության, գիտության, մշակույթի և սպորտի նախարարությունը որոշում էր կայացրել երկարաձգել աշնանային արձակուրդը ևս երկու շաբաթով՝ մինչև նոյեմբերի 12-ը ներառյալ:

Նախատեսվածից 2 շաբաթ ավելի արձակուրդից հետո ուսումնական տարին կավարտվի մի փոքր ուշ` հունիսի 18-ին, իսկ առաջին կիսամյակը կամփոփվի հունվարի 31-ին։ Դա չի վերաբերում 12-րդ դասարանցիներին. նրանք ուսումնական տարին կամփոփեն հունիսի 4-ին։

641
թեգերը:
բուհ, դպրոց, Հայաստան
Ըստ թեմայի
Նրանց աչքերում հույս ու սպասում կա. պատերազմ տեսած արցախցի փոքրիկների լուսանկարները
Հաղթում ենք նաև միջազգային օլիմպիադաներում. հայ դպրոցականները 4 մեդալ են նվաճել
Արցախցի դպրոցականներն ու ուսանողներն առանց կրթության չեն մնա․ ի՞նչ քայլեր են ձեռնարկվում
Акция протеста (30 ноября 2020). Еревaн

Ոստիկանները բարձրացան ավտոբուսի վրա՝ բերման ենթարկելու Փաշինյանի հրաժարականը պահանջողներին

22
(Թարմացված է 18:28 01.12.2020)
Քաղաքացիներից մի քանիսը բարձրացել էին փակված փողոցի պատճառով կանգնած ավտոբուսի վրա՝ «Նիկոլ, դավաճան» վանկարկելով։

ԵՐԵՎԱՆ, 1 դեկտեմբերի - Sputnik. Մի քանի տասնյակ քաղաքացիներ Մաշտոցի պողոտայում փողոց են փակել վարչապետ Նիկոլ Փաշինյանի հրաժարականի պահանջով։ Ոստիկանները սկսել են նրանց բերման ենթարկել։

Քաղաքացիներից մի քանիսը բարձրացել էին փակված փողոցի պատճառով կանգնած ավտոբուսի վրա՝ «Նիկոլ, դավաճան» վանկարկելով։ Ոստիկանները բարձրացան ավտոբուսի վրա՝ բերման ենթարկելու տղաներին։

Նրանց իջեցնելուց հետո մարդկանց միջև սկսվեց հրմշտոց, որի ժամանակ տուժեցին նաև ԶԼՄ–ների ներկայացուցիչներ։ Նրանցից մի քանիսին ոստիկանները փորձում էին անգամ բերման ենթարկել։ Ոստիկանության գնդապետ Արթուր Խուդինյանը միջադեպը մեկնաբանեց՝ ասելով․

«Պահի տակ ա ստացվել»։

ՀՅԴ երիտմիության անդամ Քրիստինե Վարդանյանը լրագրողների հետ զրույցում ասաց, որ ակցիաները շարունակվելու են՝ ինչ էլ որ լինի։

«Որքան էլ մարդկանց բերման ենթարկեն ու շինծու գործեր կարեն, իշխանությունները պետք է համակերպվեն, որ իրենց հաշված ժամեր են մնացել։ Եթե նրանք այնպես, ինչպես պաշտպանում են իրենց աթոռը, պաշտպանեին մեր հայրենիքը, մենք այս իրավիճակը չէինք ունենա», - ասաց նա։

Տասնյակ քաղաքացիներին բերման ենթարկելուց հետո՝ ոստիկանությանը հաջողվեց Մաշտոցի պողոտան երթևեկելի դարձնել։ Դրանից հետո ակցիայի մասնակիցները սկսեցին քայլերթ Թումանյան փողոցով։

22
Նիկոլ Փաշինյան. արխիվային լուսանկար

Ինչպես է Փաշինյանի «հիվանդագին ինքնասիրությունը» խափանել նախկին նախագահների ծրագրերը

27
(Թարմացված է 18:13 01.12.2020)
Արցախի ու Հայաստանի նախկին նախագահները որոշել էին Նիկոլ Փաշինյանին աջակցող հայտարարություններ անել, բայց նա խափանել է այդ ծրագրերը:

ԵՐԵՎԱՆ, 1 դեկտեմբերի - Sputnik. Արցախի ու Հայաստանի բոլոր նախկին նախագահները պատրաստ են եղել իրենց աջակցությունը հայտնել ՀՀ վարչապետ Նիկոլ Փաշինյանին: ՀԱԿ մամուլի խոսնակ Արման Մուսինյանը Facebook-ում գրառում է արել, որում, անդրադառնալով Արցախի պաշտոնաթող նախագահներ Բակո Սահակյանի ու Արկադի Ղուկասյանի այսօրվա հայտարարությանը, ի հավելումն հայտնում է, որ պայմանավորվածություն էր ձեռք բերվել առ այն, որ աջակցության նույնպիսի հրապարակային ուղերձներով պետք է հանդես գային նաև ՀՀ նախկին նախագահներ Լևոն Տեր-Պետրոսյանը, Ռոբերտ Քոչարյանն ու Սերժ Սարգսյանը, որպեսզի Փաշինյանի որոշումը անհապաղ հրադադարի վերաբերյալ, Մուսինյանի մեկնաբանությամբ, չդիտվեր որպես նրա անձնական նախաձեռնություն, և դրա ամբողջ պատասխանատվությունը չընկներ նրա վրա:

«Ավելի պարզ ասած` նրա դեմքը փրկելու համար,- գրում է Մուսինյանը և շարունակում,- Դժբախտաբար, Փաշինյանի հիվանդագին ինքնասիրությունը նրան թույլ չտվեց հասկանալ այս քայլի կարևորությունը, և նա կտրականապես արգելեց հրապարակել Արայիկ Հարությունյանի նամակը, դրանով խափանելով նաև Արցախի և Հայաստանի նախկին նախագահների աջակցության ուղերձների հրապարակումը»:

Մուսինյանը նշում է, որ Տեր-Պետրոսյանը նույնիսկ պատրաստել էր իր գրավոր հայտարարությունը, որը նույն պատճառով այն ժամանակ չէր հրապարակվել: Բայց այսօր ՀԱԿ խոսնակն այն ներկայացնում է ընթերցողների ուշադրությանը.

«Ղարաբաղյան շարժման առաջին օրվանից «Ղարաբաղ» կոմիտեն, ՀՀՇ-ն և Հայաստանի հետագա բոլոր իշխանությունները Ղարաբաղյան հակամարտության կարգավորման հարցում ոչ մի քայլ չեն արել առանց Լեռնային Ղարաբաղի ղեկավարության համաձայնության: Այնպես որ, Հայաստանի ներկայիս իշխանությունները չեն կարող, ավելին` իրավունք չունեն անտեսելու Արցախի իշխանությունների պահանջը. Լևոն Տեր-Պետրոսյան»:

Մենք չենք պատրաստվում փախչել որևէ տեղ. Նիկոլ Փաշինյան

Մուսինյանը հիշեցնում է, որ այդ ամենը տեղի է ունեցել հոկտեմբերի 19-ին, երբ դեռ պատերազմի վիճակը կատաստրոֆիկ չէր, և եթե այդ պահին կրակը դադարեցվեր, հայկական կողմը կխուսափեր հազարավոր նոր զոհերից և տարածքային հետագա կորուստներից:

Հիշեցնենք` այսօր ավելի վաղ հայտարարությամբ էին հանդես եկել նաև Արցախի պաշտոնաթող նախագահներ Արկադի Ղուկասյանն ու Բակո Սահակյանը: Նրանք հայտնել էին, որ հոկտեմբերի 18-ին Արայիկ Հարությունյանը դիմել է իրենց աջակցությանը։ Պատերազմական գործողությունների դադարեցման հարցում Արցախի նախագահները կարևորել էին նաև Հայաստանի պաշտոնաթող նախագահների աջակցությունը:

Հոկտեմբերի 19-ին, անսալով նրանց խորհրդին, Արցախի նախագահ Արայիկ Հարությունյանը պատերազմի դադարեցման և ԵԱՀԿ Մինսկի խմբի շրջանակներում բանակցային գործընթացի վերսկսման վերաբերյալ համապատասխան նամակներ է պատրաստել՝ ուղղված ԵԱՀԿ Մինսկի խմբի համանախագահող երկրների նախագահներին և ՀՀ վարչապետին: Սակայն վարչապետ Փաշինյանը պատճառաբանել է, որ Ադրբեջանի քաղաքականության հետևանքով ստեղծված իրավիճակի պայմաններում սույն նամակների հղումը կորցրել է իր նպատակահարմարությունը:

Հիշեցնենք՝ նոյեմբերի 29-ին ՀՀ վարչապետ Նիկոլ Փաշինյանը Facebook-ի իր էջում գրառում էր արել՝ նշելով, թե հոկտեմբերի 19-ին իրեն զանգահարել է Արցախի նախագահ Արայիկ Հարությունյանը և ասել, որ պետք է կանգնեցնել պատերազմը: Փաշինյանի խոսքով՝ նա նշել է, որ փոխանցում է ոչ միայն իր տեսակետը, այլև ԼՂՀ պաշտոնաթող նախագահներ Արկադի Ղուկասյանի, Բակո Սահակյանի, նաև Ռոբերտ Քոչարյանի, Սերժ Սարգսյանի, Լևոն Տեր-Պետրոսյանի անունից:

Փաշինյանը նշել է, որ զանգահարել է ՌԴ նախագահին, ասել, որ համաձայն է պատերազմը դադարեցնել:

«Ասաց, որ մինչև առավոտ կքննարկի Ալիևի հետ ու ետ կզանգի: Հաջորդ օրը Բակո Սահակյանը և Արկադի Ղուկասյանն ինձ հետ հանդիպման ժամանակ ասացին, որ համաձայն չեն առանց Արցախի կարգավիճակի ճշգրտման կամ ճշգրտման մեխանիզմի որևէ համաձայնության գալուն: Ըստ էության՝ ասացին նաև Ռ. Քոչարյանի, Ս. Սարգսյանի և Լ. Տեր-Պետրոսյանի անունից»,–գրել է նա:

Վարչապետը հավելել է, որ այդ ամենը կարևոր չի եղել այդ պահին, որովհետև ինքը կայացրել էր իր որոշումը և պատրաստվում էր այն տանել մինչև վերջ:

«Մենք կարող ենք այդ թուղթը պատռել և գցել մի կողմ, բայց...». Նիկոլ Փաշինյան

27
թեգերը:
Նախագահ, Հայաստան, Արցախ, Արկադի Ղուկասյան, Լևոն Տեր–Պետրոսյան, Նիկոլ Փաշինյան
թեմա:
Իրադրությունը Հայաստանում և Արցախում հայտարարության ստորագրումից հետո
Ըստ թեմայի
Արշակ Զաքարյանը հացադուլ հայտարարեց. նա պահանջում է պատասխանատվության ենթարկել Փաշինյանին
Ոստիկանությունը բերման է ենթարկել 33 քաղաքացու. նրանք պահանջում էին Փաշինյանի հրաժարականը
Վարչապետի գրառումը ևս մեկ ապացույց էր, որ դատախազությունը Փաշինյանի խամաճիկն է. Ալումյան
Бутылка оливкового масла с нарезанными овощами

Արմավենու յուղի վերաբերյալ նոր պահանջներ են քննարկվում ԵԱՏՄ–ում

0
Սահմանափակվելու է գլիցիդիլային եթերների պարունակությունը, որոնք առաջանում են բուսայուղերի, այդ թվում` արմավենու յուղի զտման ընթացքում:

ԵՐԵՎԱՆ, 1 դեկտեմբերի – Sputnik. ԵԱՏՄ–ում նոր պահանջներ են մտադիր սահմանել սննդամթերքում արմավենու յուղի պարունակության վերաբերյալ։  Այս մասին այսօր Sputnik Արմենիա մուլտիմեդիոն մամուլի կենտրոնում կազմակերպված Մոսկվա-Երևան-Մինսկ-Բիշքեկ-Նուր-Սուլթան առցանց տեսակամրջի ժամանակ ասաց Եվրասիական տնտեսական հանձնաժողովի տեխնիկական կարգավորման և ստանդարտացման վարչության պետ Անդրեյ Պոլոզկովը։

Մասնավորապես, սահմանափակվելու է գլիցիդիլային եթերների պարունակությունը, որոնք առաջանում են բուսայուղերի, այդ թվում` արմավենու յուղերի (որոնք առավել հաճախ օգտագործվում են ) զտման ընթացքում:

Առավելագույն թույլատրելի կոնցենտրացիան ուզում են նշել «Սննդամթերքի անվտանգության մասին», «Սննդամթերքի մակնշում», «Որոշակի մասնագիտացված սննդամթերքների, այդ թվում` դիետիկ թերապևտիկ և դիետիկ կանխարգելիչ սննդի անվտանգության վերաբերյալ» կանոնակարգերում, ինչպես նաև ճարպայուղային մթերքի վերաբերյալ տեխնիկական կանոնակարգում։

Պոլոզկովը նշեց, որ տեխնիկական նորմատիվների ընդունման նախորդ փորձից ելնելով` նոր կանոնների սահմանումը կարող է 1-1.5 տարի պահանջել։ Ըստ նրա` պետք է հաշվի առնել նաև այն, որ արտադրողներին ժամանակ է պետք յուղի ռաֆինացման տեխնիկական  գործընթացներն ու ձևերը վերակարգավորելու, իսկ վերահսկող մարմիններին` ստուգումների ընթացակարգին նախապատրաստվելու  համար։

ԵԱՏՄ օրակարգում միասնական արժույթի հարց չկա. ԿԲ ներկայացուցիչ

ԵԱՏՄ 5 երկրներից 4-ը (Բելառուսից բացի) Համաշխարհային առևտրային կազմակերպության անդամ են, իսկ դա նշանակում է, որ նրանք պետք է ՀԱԿ–ի գլխամաս հայտնեն այս փոփոխությունների մասին, որպեսզի նրանց առևտրային գործընկերները նույնպես հասցնեն նախապատրաստվեն կամ իրենց առարկությունները հայտնեն։

0
թեգերը:
յուղ, Եվրասիական տնտեսական միություն (ԵԱՏՄ)
թեմա:
Հայաստան և ԵԱՏՄ
Ըստ թեմայի
Հայաստանն առաջարկում է Թուրքիային զրկել ԵԱՏՄ սակագնային արտոնություններից
Թուրքիայի փոխարեն՝ ԵԱՏՄ երկրներ. ինչ է առաջարկում ՊԵԿ նախագահը
Ռուսաստանում նորից տեղ կգտնվի ԵԱՏՄ երկրների միգրանտների համար․ ԵԱԶԲ փորձագետներ