ԵՐԵՎԱՆ, 6 նոյեմբերի - Sputnik. Հայաստանում ռազմական դրության օրերին շարունակվում է ուժեղացված վերահսկողությունը ջրամատակարարման անվտանգության նկատմամբ։
ՀՀ առողջապահության և աշխատանքի տեսչական մարմնի մամուլի ծառայության հաղորդմամբ՝ մասնագետները ստուգել են Կոտայքի և Գեղարքունիքի մարզերի խմելու ջրի որակը։ Ջրառների, օրվա կարգավորիչ ջրամբարների անվտանգության ապահովմամբ պայմանավորված՝ զննումներ են իրականացվել Մեղրաձոր համայնքի Մեղրաձոր, Փյունիկ, Ուլաշիկ և Արտավազ գյուղերում։
«Ձեռնարկված այս միջոցառումները հաջորդել են նշված մարզերի մարզպետարաններում ԱԱՏՄ նախաձեռնությամբ ջրի անվտանգության հարցերի շուրջ քննարկումներին՝ համաձայն ձեռք բերված պայմանավորվածությունների»,- նշված է հաղորդագրության մեջ։
Որպես սանիտարահամաճարակային կանխարգելիչ միջոցառումների նկատմամբ վերահսկողություն իրականացնող մարմին՝ արձանագրվող շեղումների դեպքում ԱԱՏՄ-ն իրավասու է ջրի օգտագործումը կասեցնելու կարգադրագիր տալ։ Խոսքը վերաբերում է ոչ միայն խմելու, այլև կենցաղային, տնտեսական, արտադրական, տեխնիկական կարիքների համար օգտագործվող ջրին։ Նշվում է, որ կարգադրագիրը գործում է մինչև շեղումները բացառվեն, եթե, իհարկե, դրանք գրանցում են։
Վիրավոր զինվոր, թե Covid-ով հիվանդ. առողջապահական համակարգը պարալիզացման եզրին է
ԱԱՏՄ-ն տեղեկացնում է, որ ջրի անվտանգության վերահսկողական միջոցառումները խստացվել են ռազմական դրության ընթացքում՝ ջրային բնույթի բռնկումների կանխարգելման նպատակով։
