Կրակի դեմ կռիվ տվողները. ինչպես երկու ընկեր որոշեցին հրշեջ–փրկարար դառնալ
(Թարմացված է 20:20 04.09.2020)
Հրշեջ–փրկարար դառնալը հեշտ չէ. լինում են դեպքեր, որ կես ճանապարհից մարդիկ հետ են կանգնում իրենց որոշումից։ Արմեն Գևորգյանն ու Արայիկ Հակոբյանը որոշել են ու միասին մի ամբողջ ճանապարհ անցել։ Հեռավոր 1980-ականներին երկու ընկեր` Արմեն Գևորգյանն ու Արայիկ Հակոբյանը, որոշեցին հրշեջ–փրկարար դառնալ և ընդունվեցին ԽՍՀՄ ՆԳՆ Խարկովի հրշեջ տեխնիկական ուսումնարան։ Ուսումնարանն ավարտելուց հետո, սակայն, Գևորգյանն աշխատանքի անցավ Գյումրիում, իսկ Հակոբյանը` Երևանում։ Տասնյակ տարիներ անց նրանց ճանապարհները հատվեցին, ու այժմ երկուսն էլ աշխատում են Երևանում` Արտակարգ իրավիճակների նախարարությունում։
©
Sputnik / Asatur Yesayants
Արմեն Գևորգյանն ու Արայիկ Հակոբյանը
Այսօր ԱԻՆ աշխատակցի օրն է, և Sputnik Արմենիան զրուցել է ԱԻՆ–ի երկու հնաբնակների` 38 տարվա աշխատանքային փորձ ունեցող Փրկարարական ուժերի վարչության պետ Արմեն Գևորգյանի ու Հրդեհաշիջման և փրկարարական աշխատանքների կազմակերպման բաժնի ավագ հրահանգիչ Արայիկ Հակոբյանի հետ։
Հրշեջի գործը երակներում, կամ ինչու են փրկարարներին Գյումրիում «գիժ» կոչում
Արմեն Գևորգյանը պատմեց, որ այդ մասնագիտությունն է ընտրել, քանի որ մեծ եղբայրը հրշեջ–փրկարար էր։ Եղբորից ոգեշնչված` որոշել է նրա ճանապարհով գնալ։
«1985-ին նշանակվեցի Գյումրու հրշեջ փրկարարական ջոկատում որպես հերթափոխի պետ. դրանից կարճ ժամանակ հետո այդ աշխատանքից ինձ դժվար էր դուրս բերել։ Ավելին, 1988-ի երկրաշարժի հետևանքների վերացման աշխատանքների ժամանակ հաստատապես համոզվեցի` ճիշտ մասնագիտություն եմ ընտրել»,–ասաց Գևորգյանը։
©
Sputnik / Asatur Yesayants
Արմեն Գևորգյանն ու Արայիկ Հակոբյանը
Հրշեջ–փրկարարն իր աշխատանքի մեջ ծանր դեպքեր շատ է տեսել` մահեր, խոշոր հրդեհներ, սակայն ամենադժվարը հենց երկրաշարժի օրերին աշխատելն է եղել։ Նրա խոսքով` ցավալին այն է, որ եթե ունենային այն տեխնիկան, ինչ հիմա, 1988-ին շատ կյանքեր կփրկվեր։
©
Sputnik / Asatur Yesayants
Արմեն Գևորգյանն աշխատակիցների հետ
Սակայն Գևորգյանն ասում է, որ փրկարարը դժվարություններից, սարսափելի տեսարաններից երբեք չի խուսափում, և անգամ տարիների ընթացքում քերծվածք-այրվածք ստանալը դառնում է սովորական երևույթ։ Ավելին, քանի որ հրշեջ–փրկարարների աշխատանքային գրաֆիկն անկանխատեսելի է, տան անդամները սովորել են նրանց երկար բացակայություններին։
Օրվա կադր. փողոցային երաժիշտը շոկոլադե սալիկ է նվիրում ԱԻՆ ենթասպային և շնորհավորում նրան
Գևորգյանը հիշեց` նախորդ տարի կնոջ ծննդյան օրը երեկոյան, երբ արդեն պետք է հյուրերը գային, իրեն լուր են տվել, որ Խոսրովի անտառում խոշոր հրդեհ է բռնկվել։ Գևորգյանը մեկնել է դեպքի վայր և 2-3 օր այնտեղ անցկացրել։
«Երկու տղա ունեմ, որոնք էլ կնոջս ծննդյան օրը փոխարինել էին ինձ. ոչ մի սարսափելի բան չկա, կինս էլ ըմբռնումով է մոտենում։ Տանն ինձ լավ են հասկանում` երկու տղաներս էլ ուսադիր են կրում»,–ասաց Գևորգյանը` հավելելով, որ վերջին շրջանում միայն հայրն է ասում, որ հանգստի գնալու ժամանակն է։
Երկար տարիների փորձ ունեցող հրշեջ–փրկարարը 57 տարեկան է և գիտի, որ ամեն ինչ իր վերջն ունի, և եթե մի օր զգա, որ ուժերն այլևս չեն ներում համակարգում աշխատելու համար, թոշակի գնալու դիմում կգրի և իր տեղը կզիջի ավելի երիտասարդներին։
©
Sputnik / Asatur Yesayants
Արմեն Գևորգյան
Գևորգյանի ընկերը` Արայիկ Հակոբյանը, ինչպես արդեն ասացինք, նույնպես 38 տարվա աշխատանքային փորձ ունի։ Նա պատմեց` սկզբում որոշել էր իրավաբան դառնալ, սակայն քանի որ իր հայրն ու Գևորգյանի հայրն ընկերներ են, իսկ Գևորգյանն արդեն իսկ որոշել էր հրշեջ–փրկարար դառնալ, ինքն էլ է մտափոխվել ու ընկերոջ հետ Խարկովի հրշեջ տեխնիկական ուսումնարանն է ընդունվել։
«Հիմա լինում են դեպքեր, որ Գևորգյանի հետ ենք լինում դեպքի վայրում։ Իհարկե, ընկերական հարաբերություններն օգնում են, քանի որ իրար կես բառից հասկանում ենք` ինչ է անհրաժեշտ անել, և շատ արագ կազմակերպվում է ամեն ինչ։ Նման դեպքերից մեկն էլ 2013-ին «Սպայկայում» բռնկված խոշոր հրդեհն էր, երբ իրար աչքի պոչով նայելիս էլ պարզ էր երկուսիս համար, թե ինչ պիտի անենք»,–ասաց Հակոբյանը։
Նրա խոսքով` աշխատանքի ընթացքում շատ բան է սովորել, որոնցից ամենակարևորն այն է, որ փրկարարը պետք է սրտացավ լինի։ Հակոբյանն ասում է` պատասխանատվությունը, գիտելիքը կարևոր երևույթներ են իրենց գործում, բայց միաժամանակ պետք է նաև սրտացավ լինես, որովհետև մարդկային կյանքերի հետ գործ ունեն։
©
Sputnik / Asatur Yesayants
Արայիկ Հակոբյանը
Հրշեջ–փրկարար դառնալու համար խիզախությունը պարտադիր պայմաններից մեկն է, և դա ուղղակի խոսք չէ. Հակոբյանը պատմեց` քիչ չեն եղել դեպքեր, երբ ծանր կանչեր սպասարկելուց հետո աշխատանքից ազատվելու դիմում են գրել։ 2018-ին, օրինակ, երբ Մարալիկից դեպի Բարձրաշեն լեռնային հատվածում մարտական ինքնաթիռ էր ընկել, փրկարարները գիշերն աշխատել էին այդ հատվածում։ Երբ լույսը բացվել էր, և փրկարարներից մեկը տեսել էր, որ գիշերը զոհված անձնակազմի մարմինների վրայով է քայլել (զոհված տղաների վրա բազմաթիվ իրեր կային), վերադարձել և աշխատանքից ազատվելու դիմում էր գրել։
Սակայն հրշեջ–փրկարարների կյանքում նաև հետաքրքիր դեպքեր են լինում. Հակոբյանը ծիծաղով է նշում, որ «ամենապատասխանատու» պահերից մեկն այն է եղել, երբ զոքանչն է զանգել ու օգնության կանչել։ «Զոքանչիս ոտքն էր կոտրվել, պետք է հիվանդանոց տանեին նրան։ Ես մեր աշխատակիցներին դիմեցի, ու եկան–տարան զոքանչիս։ Կարևորը` զոքանչս շատ գոհ էր մնացել»,–ասում է Հակոբյանը։
Ավագ հրահանգիչը երկու աղջիկ ունի. անկեղծանում է` իր ունեցած փորձից ելնելով էլ նրանցից որևէ մեկին չէր ուզի տեսնել փրկարար ծառայությունում. այլ հարց կլիներ տղայի դեպքում։Երկու ընկերները` Հակոբյանն ու Գևորգյանը, ավելի շատ իրենց փորձն են փոխանցում նորեկներին, քանի որ որքան էլ սովորես, կան մանրուքներ, որոնց մասին կարող ես իմանալ միայն տարիների ընթացքում կուտակվող փորձի արդյունքում։
Հրշեջ–փրկարարների հետ զրույցն ընդհատվում է ահազանգով. պետք է շտապել դեպքի վայր...
©
Sputnik / Asatur Yesayants
Արմեն Գևորգյանն ու Արայիկ Հակոբյանը
թեգերը:
Եղվարդի բնակիչը պատերազմի օրերին գնված 17 մլն դրամի զինվորական հանդերձանքը փորձել է այրել
(Թարմացված է 11:12 05.03.2021)
Եղվարդի 30-ամյա բնակչին, սակայն, չի հաջողվել ամբողջությամբ այրել զինվորական հանդերձանքը, քանի որ քաղաքացիները նկատել են հրդեհը։
ԵՐԵՎԱՆ, 5 մարտի - Sputnik. ՀՀ քննչական կոմիտեն տեղեկացնում է, որ Եղվարդ քաղաքի բնակչին մեղադրանք է առաջադրվել զինվորական հանդերձանքը դիտավորությամբ ոչնչացնելու փորձ կատարելու համար։
©
Sputnik / Laura Sarkisyan, Aram Nersesyan
«Եղվարդի 30-ամյա բնակիչը 2020թ. նոյեմբերի 11-ին՝ ժամը 02:30-ի սահմաններում, դիտավորյալ և վառելանյութի օգտագործմամբ փորձել է հրկիզել Եղվարդի Ազատամարտիկների փողոցում գտնվող, քաղաքացիական նախաձեռնության անդամների կողմից ձեռք բերված 17.375.000 դրամ արժողության զինվորական հանդերձանքը: Սակայն իր կամքից անկախ հանգամանքներում հանցագործությունն ավարտին չի հասցրել, քանի որ հրդեհը նկատվել է քաղաքացիների կողմից և մարվել»,–նշված է հաղորդագրության մեջ։
Եղվարդ քաղաքի 30-ամյա բնակչին մեղադրանք է առաջադրվել՝ ՀՀ քրեական օրենսգրքի 34-185-րդ հոդվածի (գույքը դիտավորությամբ ոչնչացնելու կամ վնասելու փորձ) 3-րդ մասի 1-ին կետով:
Նա կալանավորվել է։
Նախաքննությունը շարունակվում է:
Առաքելյանն ասաց` Հայաստանիդ վարչապետին բողոքիր. կամավորներն իրենց հասանելիք փողն են ուզում
442 նոր դեպք, 7 մահ` մեկ օրում. կորոնավիրուսային հիվանդության ընթացքը Հայաստանում
(Թարմացված է 10:47 05.03.2021)
Հիվանդությունների վերահսկման և կանխարգելման ազգային կենտրոնը հրապարակել է Հայաստանում կորոնավիրուսային վարակի վերաբերյալ վերջին մեկ օրվա տվյալները:ԵՐԵՎԱՆ, 5 մարտի - Sputnik. Հայաստանում կորոնավիրուսով վարակվածների թիվը վերջին մեկ օրում ավելացել է 442–ով և դարձել 173 749։ Տեղեկությունը հայտնում է Հիվանդությունների վերահսկման և կանխարգելման ազգային կենտրոնը։
Այս պահին փաստացի բուժում է ստանում 5249 մարդ, կատարվել է 744863 թեստավորում, առողջացել են վարակվածներից 164463-ը։ Գրանցվել է մահվան 3215 դեպք (+7)։ Կորոնավիրուսով վարակված, բայց այլ պատճառով մահացածների թիվը վերջին մեկ օրում ավելացել է 2-ով և հասել 822-ի։
Հիշեցնենք` 2020թ.–ի մարտի 16–ից Հայաստանում արտակարգ դրություն էր սահմանված, որը մի քանի անգամ երկարաձգվեց և տևեց մինչև սեպտեմբերի 11–ը։ Երկարաձգված արտակարգ դրության պայմանները որոշակի փոփոխությունների ենթարկվեցին։
Տնտեսական շատ գործունեություններ թույլատրվեցին, բայց սահմանվեցին պարտադիր պահանջներ։
Հանրային բաց տարածքներում դիմակ դնելը պարտադիր էր։ Դիմակ կարող էին չդնել միայն մինչև 6 տարեկան երեխաները, հեծանիվ վարողները, ֆիզիկական վարժություններ անողները և խրոնիկ շնչառական հիվանդություններ ու սրտային անբավարարություն ունեցողները։
2020թ.–ի սեպտեմբերի 11–ին ՀՀ կառավարությունը որոշեց, որ երկրում սեպտեմբերի 12–ից մինչև 2021թ.–ի հունվարի 11–ը կգործի կարանտինի ռեժիմ։ Որոշ սահմանափակումներ մեղմացվեցին, բայց հասարակական վայրերում դիմակ դնելու պահանջը շարունակեց գործել։
Գիտնականներն ասել են, թե մարդկությունը քանի տարի է կորցրել կորոնավիրուսի պատճառով
Հաշվի առնելով կորոնավիրուսի 3–րդ ալիքի գոյությունն աշխարհում և այն փաստը, որ Հայաստանում վարակակիրների թիվը շարունակում է բարձր մնալ` 2021թ.–ի հունվարի 11–ին ՀՀ կառավարությունը որոշեց երկրում կարանտինային ռեժիմը երկարաձգել ևս 6 ամսով։ Այն կտևի մինչև 2021թ.–ի հուլիսի 11–ը։
Հայտնի է` ինչի հետևանքով է կործանվել թուրքական ռազմական ուղղաթիռը
ԵՐԵՎԱՆ, 5 մարտի – Sputnik. Թուրքիայի արևելքում ռազմական ուղղաթիռը վթարի է ենթարկվել եղանակային պայմանների վատթարացման պատճառով։ Տեղեկությունը հայտնել է Թուրքիայի պաշտպանական գերատեսչության ղեկավար Հուլուսի Աքարը, փոխանցում է ՌԻԱ Նովոստին։
©
Sputnik / Karen Avetisyan
«Նախնական տվյալներով և ականատեսների վկայությամբ՝ վթարը տեղի է ունեցել եղանակային պայմանների կտրուկ վատթարացման պատճառով։ Ուղղաթիռի կործանման փաստով հետաքննություն է սկսվել` պատահարի ճշգրիտ պատճառը պարզելու համար», - հայտարարել է Աքարը։
Ինչպես արդեն հայտնել էինք, երեկ` մարտի 4–ին, Թուրքիայում Cougar տիպի ուղղաթիռ է կործանվել, որի հետևանքով զոհվել է 9 թուրք զինծառայող, 4-ը վիրավորվել են: