ԵՐԵՎԱՆ, 22 օգոստոսի — Sputnik. Լոռու մարզում այսօր առավոտյան ուժգին կարկուտ է տեղացել։ Տեղեկությունը Facebook–ի իր էջում հայտնել է Շրջակա միջավայրի նախարարության Հիդրոօդերևութաբանության և մոնիտորինգի կենտրոնի տնօրենի տեղակալ Գագիկ Սուրենյանը և կից լուսանկարներ հրապարակել։
«Լոռու մարզի Ջրաշեն գյուղում լուսադեմին տեղացած կարկուտը։ Լուսանկարները՝ Արթուր Շահնազարյանի»,–գրել է Սուրենյանը։
Ավելի վաղ նա կատակել էր, որ երկու օրով հոկտեմբերը գալու է ու հետ գնա։
ՀՀ ԱԻՆ տվյալներով` օգոստոսի 22-23-ը հանրապետության տարածքում ժամանակ առ ժամանակ շրջանների զգալի մասում, 24-ին առանձին շրջաններում սպասվում է անձրև և ամպրոպ, ամպրոպի ժամանակ՝ քամու ուժգնացում՝ 15-20 մ/վ արագությամբ, առանձին վայրերում հնարավոր է կարկուտ:
Երևան քաղաքում օգոստոսի 22-23-ը ժամանակ առ ժամանակ սպասվում է անձրև և ամպրոպ, ամպրոպի ժամանակ՝ քամու ուժգնացում՝ 15-20 մ/վ արագությամբ:
