ԵՐԵՎԱՆ, 14 օգոստոսի – Sputnik. Արարատի մարզի գյուղերից մեկում 42-ամյա կնոջ տնային մայրական մահ է արձանագրվել: Տեղեկությունը Facebook-ի իր էջում հայտնել է ՀՀ առողջապահության նախարարի մամուլի խոսնակ Ալինա Նիկողոսյանը։
«Կնոջ դիակի փորձաքննությամբ հայտնաբերվել է 8-9 ամսական հղիություն` մահացած պտղով: Մահվան պատճառ է հանդիսացել սրտամկանի սուր ինֆարկտը: Նշեմ, որ կինը անձնական հայացքներից ելնելով չի դիմել առողջության առաջնային պահպանման օղակ կամ որևէ այլ բժշկական կազմակերպություն»,–գրել է նա:
Sputnik Արմենիայի տեղեկություններով` ամուսինը տեղյակ չի եղել, որ կինը հղի է, այդ մասին իմացել է միայն դիահերձման ժամանակ։ Իսկ կինը բժիշկներին չի դիմել, քանի որ ինչ-որ աղանդի հետևորդ է եղել, որն արգելում է բժշկական միջամտությունը։
Առողջապահության նախարարությունը կոչ է անում առողջական վիճակին վերաբերող ցանկացած հարցի դեպքում դիմել բժշկի` անցանկալի և, երբեմն աղետալի հետևանքներից խուսափելու համար:
Հղիության ժամանակ կորոնավիրուսը կարո՞ղ է մորից երեխային փոխանցվել. պարզաբանում է բժիշկը
2020 թվականի ընթացքում սա թվով 2-րդ մայրական մահվան դեպքն է` կրկին ոչ մանկաբարձական պատճառով:
