ԵՐԵՎԱՆ, 30 հուլիսի – Sputnik. Արդարադատության նախարարության քրեակատարողական համակարգում չկա նոր կորոնավիրուսային վարակի կանխարգելման ռազմավարություն կամ գործողությունների ծրագիր՝ գործառույթների հստակ տարանջատմամբ։ Նման եզրահանգման է եկել մարդու իրավունքների պաշտպանի գրասենյակը, որի աշխատակիցները չհայտարարված այց են կատարել «Արմավիր» ՔԿՀ։
«Քրեակատարողական ծառայողները կորոնավիրուսի պայմաններում աշխատանքին վերաբերող վերապատրաստման դասընթացներ չեն անցել։ Բացի այդ, կորոնավիրուսի կանխարգելման նկատառումով խցերի մաքրման աշխատանքների համար ազատությունից զրկված անձանց չեն տրամադրվում հատուկ ախտահանիչ միջոցներ»,–նշված է հաղորդագրության մեջ։
Միաժամանակ ՔԿՀ–ում չի եղել օդափոխության ընդհանուր համակարգ, իսկ պատժախցերում ու կարանտինային բաժանմունքում արձանագրվել են սանիտարահիգիենիկ անբավարար պայմաններ։
Արձանագրվել են նաև ՔԿՀ–ում բժշկական գաղտնիքի պահպանմանն առնչվող լուրջ խնդիրներ, մասնավորապես դեղորայք տրամադրելիս, բժշկական զննություն իրականացնելիս և այլ բժշկական միջամտություններին ներկա են գտնվում քրեակատարողական ծառայողներ։ Իսկ ՔԿՀ–ն ոչ ամբողջական է համալրված անհրաժեշտ դեղերով և այլ բժշկական պարագաներով։
Տաքսու վարորդը դատապարտյալին Vitamin C- ի պլաստմասսե տարայով փորձել է հերոին փոխանցել
ՔԿՀ–ում տրանսպորտի խնդիր է եղել` ինչպես տեղաշարժման դժվարություններ ունեցողներին դատական նիստերին տեղափոխելու, այնպես էլ քաղաքացիական հիվանդանոցներ տեղափոխելու հետ կապված։
Սակայն խնդիրներին զուգահեռ ՄԻՊ–ը նաև դրական տեղաշարժ է նկատել. կորոնավիրուսի թեմայով կրթական միջոցառումները և դասընթացները կազմակերպվել են առցանց եղանակով։ Բացի այդ, ազատությունից զրկված անձինք գոհ են եղել սննդով ապահովելու գործառույթով պատվիրակված մասնավոր ընկերության պատրաստած սննդի որակից, քանակից և բազմազանությունից։ Ավելացել է նաև տեսազանգից օգտվող ազատությունից զրկված անձի թիվը (թեև ազատությունից զրկված որոշ անձինք շարունակում են անտեղյակ լինել տեսազանգից օգտվելու հնարավորության մասին):
Վերհանված խնդիրները քննարկվել են քրեակատարողական հիմնարկի վարչակազմի, ինչպես նաև «Քրեակատարողական բժշկության կենտրոն» ՊՈԱԿ-ի համապատասխան ստորաբաժանման բժշկական անձնակազմի հետ: Արձանագրված խնդիրները սահմանված կարգով կամփոփվեն և դրանց լուծմանն ուղղված առաջարկների հետ կներկայացվեն ոլորտի իրավասու մարմիններին:
«Լիրիկա» էր բերել կալանավորին. պլաստմասսե բաժակներով թմրամիջոցի փոխանցման փորձը կանխվել է
