Ռաֆիկ Ղազինյանը

«Կեղտ չէ, հող է». նախկին պատգամավորը կյանքը «քաղցրացնելու» հետաքրքիր ձև է գտել

466
(Թարմացված է 00:18 30.07.2020)
Արցախյան պատերազմի մասնակից, Հայաստանի առաջին գումարման խորհրդարանի պատգամավոր Ռաֆիկ Ղազինյանը մեղրախոտ (ստեվիա) է աճեցնում․այդ բույսը շաքարի հայտնի փոխարինիչ է։ Հողը նա մշակում է հայրենի Ալավերդիում և սահմանամերձ Նոյեմբերյանում։

ԵՐԵՎԱՆ, 29 հուլիսի – Sputnik. Ի՞նչ պետք է անի նախկին պատգամավորը, եթե չի ուզում տանը նստել։ Կարելի է գանգատվել դառը քաղաքական ճակատագրից, բայց կարելի է և քաղցրացնել կյանքը՝ ինչպես սեփական, այնպես էլ այլոց։ Հենց այդ ճանապարհն է ընտրել Ռաֆիկ Ղազինյանը՝ Հայաստանի առաջին գումարման Ազգային ժողովի (այն ժամանակ՝ Գերագույն խորհրդի) պատգամավորը։ «Քաղցր կյանքի» հիմքը նա դրել է իր փոքր հայրենիքում՝ Լոռու մարզում, ինչպես նաև Տավուշում։

Горшки со стевией в ферме Рафика Казиняна в городе Алаверди, Лори
© Sputnik / Asatur Yesayants
Ռաֆիկ Ղազինյանի աճեցրած մեղրախոտը

Այդ նպատակի համար նա ընտրել է ոչ թե խաղողը, թուզը կամ խուրման (որոնցից այստեղ շատ կա), այլ մեղրախոտը`ստեվիան։ Շատերին հայտնի շաքարի այս փոխարինիչը շատ քաղցր է, ընդ որում՝ շաքար չի  պարունակում։ Մեղրախոտի հայրենիքը Հարավային Ամերիկան է։ Հայաստանում, իհարկե, արևադարձային անտառներ չկան, բայց Ալավերդիում և Նոյեմբերյանում կլիման մոտ է մերձարևադարձայինին՝ ամռանը տաք է, իսկ ձմռանը գրեթե միշտ զրոյից բարձր։

Հիմա Ղազինյանի ջերմոցներում տնկիները խիտ են աճում, հազիվ է հասցնում կտրել։ Սակայն միշտ այդպես չի եղել։ Ամենադժվարը սերմերից տնկիներ ստանալն է։ Դրա համար պետք է մշտապես տաք և փոքր-ինչ խոնավ եղանակ լինի։ Բացի այդ, պետք է իմանալ, թե ինչ օրգանական պարարտանյութ խառնել և ինչ պայմաններում պահել։ Ղազինյանն ասում է, որ այդ պատճառով սերմերի մոտ 50 տոկոսն էր ծլում, և դրանցից էլ միայն կեսն էր տնկիների վերածվում։

Պարզ ու հին տարբերակ. ցուրտ Աշոցքում գյուղացին հնդկաձավար ու նույնիսկ ելակ է աճեցնում

Խորհուրդ ստանալու համար նա դիմեց Ստավրոպոլի ագրարային համալսարան (Ստավրոպոլում և Ղրիմում մեղրախոտի  փորձնական ցանք են անում), նրան հաճույքով օգնեցին, գաղտնիքներ բացեցին, նկարագրեցին։

«Ուզում եմ շնորհակալություն հայտնել նրանց, ինձ շատ օգնեցին։ Դրանից հետո ամեն ինչ կարգավորվեց, տնկիները սկսեցին աճել»,-ասում է Ղազինյանը։

Горшки со стевией в ферме Рафика Казиняна в городе Алаверди, Лори
© Sputnik / Asatur Yesayants
Ռաֆիկ Ղազինյանի աճեցրած մեղրախոտը

Հետո անալիզի համար նա ռուսաստանցի ագրոնոմներին ուղարկեց պատրաստի տնկիների օրինակները։ Պատասխանը գերազանցեց բոլոր սպասելիքները․ակտիվ նյութերի (ստեվիոզիդ և այլն) պարունակությունը Հայաստանից ուղարկված օրինակներում կազմում էր 74-76%՝ դա լավագույն արդյունքներից մեկն է աշխարհում։ Այդ նյութերի շնորհիվ մեղրախոտը շաքարից 200 անգամ քաղցր է դառնում։ Ինչպես են կազմավորվում այդ միացությունները, ինչպես են ազդում համի զգայարանների վրա, արդյո՞ք ունեն կողմնակի ազդեցություններ՝ այս ամենն ուսումնասիրում են քիմիկոսներն ու կենսաբանները։ Իսկ Ղազինյանն իր սեփական, պարզ տեսությունն ունի․այդ քաղցրությունը հողից է ծնվում։

«Ինձ մի անգամ հարցրին․«Դու բարձրագույն կրթություն ունես, ինչի՞դ է պետք կեղտը եղունգներիդ տակ»։ Ես պատասխանեցի․ «Սա կեղտ չէ, հող է։ Գնա, Մաթևոսյան կարդա այդ թեմայով, եթե կրթության մասին ես խոսում»։ Նա, ով սիրում է հողը և հասկանում է դրա արժեքը, այլ կերպ է նայում աշխարհին։ Չի կարող խաբել, նախանձել, չարանալ։ Ես այդպես եմ կարծում»,-ասում է Ղազինյանը։

Նրա հետ միասին աշխատում են Ալավերդու կամավորական ջոկատի ընկերները, 90-ականներին նրանց հետ միասին կռվել է Արցախում։ Նրանցից մեկը հետագայում կադրային զինվորական էր դարձել, բայց թոշակի անցնելով որոշեց ինչ-որ բանով զբաղվել։ Հիմա ջերմոցում օգնում է Ղազինյանին:

Արդեն մի քանի տարի է, ինչ Ղազինյանը մեղրախոտ է  աճեցնում։ Անցած տարի բաց հողում նրա ցանքի մեծ մասը կարկտահար եղավ։ Բայց չհիասթափվեց, շարունակեց ցանել` Ակոռի գյուղում՝ Ալավերդու մոտակայքում, ինչպես նաև Նոյեմբերյանում՝ հայ-ադրբերջանական սահմանից ոչ հեռու։ Տարեկան ընդամենը 400-500 կգ բերք է հավաքում, իսկ դա քիչ է, անգամ Հայաստանի համար։

Հայաստանում շաքարային դիաբետից մահացությունը կազմում է մահերի ընդհանուր թվի 5%-ը, 1990 թ․-ի համեմատ հիվանդացության ցուցանիշները կրկնապատկվել են։  Ղազինյանը նշում է, որ Ներքին շուկայի պահանջարկը գոնե մասամբ ապահովելու համար 5-10 հեկտար է պահանջվում, ռուսական շուկա դուրս գալու համար՝ գոնե դրա կրկնակին:

Горшки со стевией в ферме Рафика Казиняна в городе Алаверди, Лори
© Sputnik / Asatur Yesayants
Ռաֆիկ Ղազինյանի աճեցրած մեղրախոտը

«Հիմա տնկիներ ենք աճեցնում, ինչ-որ մեկին վաճառում ենք, մյուսին՝ նվիրում։ Ուզում ենք ֆերմերներին փոխանցել, որպեսզի իրենք նույնպես աճեցնեն։ Ես պատրաստ եմ ինքս ցույց տալ, թե ինչպես է պետք աճեցնել։ Լավ եկամուտ կստանան, բայց նաև կարկտից պաշտպանել է պետք, իսկ հակակարկտային ցանցերը էժան բան չեն, այդ է խնդիրը»,-ասում է նա։

Տաք կլիմայի պայմաններում (այսինքն՝ հենց նույն Ալավերդիում և Նոյեմբերյանում) մեղրախոտի թփերը հասնում են գրեթե մարդու հասակի բարձրության՝ մոտ 1,5 մետր։ Տեղական պայմաններում մեկ հեկտարից կարելի է 4-5 տոննա բերք ստանալ։ Եթե նվազագույնով հաշվենք (երեք տոննա, հանած մեկը՝ ծախսերին), ապա որպես մաքուր եկամուտ երկու տոննա է մնում։

Թունավորված մեղուների առեղծվածը. ինչպես է գյուղացին ունքը շինելու տեղ աչքը հանում

«Իսկ մեկ կիլոգրամ չոր տերևներն ամենաքիչը 15-20 հազար արժեն, այսինքն՝ մեկ հեկտարից կարելի է 10-15, անգամ 20 միլիոն դրամ ստանալ։ Ուղղակի կարկուտի վտանգը կա, իսկ հակակարկտային ցանցերը թանկ են՝ մեկ հեկտարը 15-20 միլիոն դրամ։ Որպեսզի բանկը նման գումար տա, թանկարժեք գրավ է պետք, իսկ ո՞ր գյուղացին նման բան ունի»,-ավելացնում է Ղազինյանը։

Горшки со стевией в ферме Рафика Казиняна в городе Алаверди, Лори
© Sputnik / Asatur Yesayants
Ռաֆիկ Ղազինյանի աճեցրած մեղրախոտը

Նա հավատացնում է, որ եթե հակաճգնաժամային աջակցության շրջանակներում հաջողվի այդպիսի վարկեր ստանալ, ապա միաժամանակ մի քանի նոր արտադրություններ կարող են ի հայտ գալ։ Մեկը կչորացնի տերևները, մյուսը դրանցից «հաբեր» կսարքի՝ շաքարի կտորների փոխարեն, մարդ կա՝ անգամ ուզում է խառնել այն հայկական թեյի խոտաբույսերի հետ և «երկուսը մեկում» մթերք ստանալ։

«Այդպես կարող էին հարյուրավոր աշխատատեղեր ստեղծվել։ Բայց դատարկ տեղը չխոսենք...միանգամից ամեն ինչ չի ստացվի՝ կամաց-կամաց կաշխատենք։ Ավելի լավ է, քան ոչինչ չանելը»,-ասում է Ղազինյանը։

Տնկիները նա ուզում է փոխանցել ոչ միայն Հայաստանի, այլև Արցախի ֆերմերներին, որտեղ նույնպես մեղրախոտ աճեցնելու փորձեր են եղել։ Բարեբախտաբար, Արցախում ևս կլիման դրա համար միանգամայն համապատասխան է։

466
թեգերը:
Ալավերդի, Լոռի, Տավուշ, Հայաստան, Պատգամավոր, մեղրախոտ, Ռաֆիկ Ղազինյան
Ըստ թեմայի
Բարձրակարգ «հյուրանոց» մեղուների համար, կամ գորիսեցի պապիկի հնարամտությունը
Էժան տուրերն անորակ են և հիասթափեցնո՞ւմ են զբոսաշրջիկներին. տուրիզմում գոյի խնդիր է
Ուրբաթը շաբաթից շուտ եկավ. տուրիզմի ոլորտին «ռեանիմատոլոգներ» են պետք
Զինվորականի հագուստ

Բեմադրված հարցազրույցները միշտ էլ եղել են․ փորձագետը` գերիների փոխանակման մասին

244
(Թարմացված է 21:20 24.10.2020)
Երբ գերիներին ստիպում են նախապես պատրաստած տեքստ ասել, դա Ժնևյան կոնվենցիաների խախտում է։

ԵՐԵՎԱՆ, 24 հոկտեմբերի — Sputnik. Արցախյան առաջին պատերազմի տարիներին՝ 90-ականներին, գերիների փոխանակումն իրականացվել է նույնիսկ մարտական գործողությունների ընթացքում, այժմ դժվար է նման բան պատկերացնել։ Sputnik Արմենիայի հետ զրույցում ասաց Գերիների, պատանդների և անհետ կորածների հարցերով զբաղվող հանձնաժողովին կից աշխատանքային խմբի ղեկավար Արմեն Կապրիելյանը։

Ավելի վաղ ադրբեջանական ԶԼՄ-ներում ու սոցցանցերում հայ գերիների մասնակցությամբ տեսանյութեր էին հրապարակվել։ Կադրերում ութ հայ զինծառայողներ էին երևում, որոնք հերթով ասում էին` Ղարաբաղը Ադրբեջանն է։ Բացի այդ, տեսանյութեր էին հրապարակվել Վալերա Հայրապետյանի ու Էդիկ Տոնոյանի մասնակցությամբ, որոնք պատմում էին՝ ինչպես են գերի ընկել։

Կապրիելյանի խոսքով՝ նման տեսագրությունները, որոնցում ռազմագերիների ակնհայտ իրավունքների խախտում կա, մարդասիրական իրավունքի, Ժնևյան կոնվենցիաների կոպիտ ոտնահարում են։ ԶԼՄ-ներում չպետք է գերիների վիճակի մասին տվյալներ հրապարակվեն, հատկապես հարցազրույցներ ու տեսանյութեր։

«Ցավոք, նման միջադեպեր միշտ էլ եղել են։ Ամեն անգամ, երբ Ադրբեջանի մոտ ռազմագերի կամ քաղաքացիական անձ է հայտնվել, նման բեմադրություններ են արվել, նախապես պատրաստված տեքստեր են ձայնագրվել։ Այս ամենը Ժնևյան կոնվենցիաների տեսակետից անթույլատրելի է» - շեշտեց Կապրիելյանը։

Ընդ որում՝ բոլոր միջազգային կառույցները, որոնք կապ ունեն դրա հետ, սահմանափակվել են դեկլարատիվ հայտարարություններով։ Կոչեր են հնչեցրել, բայց Ադրբեջանը որևէ իրական պատասխանատվություն չի կրել նման խախտումների համար։

Նրա խոսքով՝ Ադրբեջանի իշխանության որոշ գործողություններ կարող են հայտնվել Մարդու իրավունքների եվրոպական դատարանի իրավասության տակ, գերիները կարող են յուրաքանչյուր դեպքով հայց ներկայացնել։ Այդ դեպքում դատարանի որոշումները պետության համար պարտադիր կլինեն։

Ադրբեջանն ունի բազմաթիվ զոհեր ու չի ցանկանում, որ այդ զոհերը հասնեն իրենց ընտանիքներին

Ինչ վերաբերում է գերիների փոխանակմանը կամ նրանց վերադարձնելուն, ապա 2000-ականների կեսերին կողմերի միջև դեռ ուղիղ կապ կար, իսկ դրանից հետո գործընթացն իրականացվում է Կարմիր խաչի միջազգային կոմիտեի միջոցով (փոխանակում է եղել նաև ԵԱՀԿ նախագահի գործող ներկայացուցչի անձնական միջնորդությամբ)։

Ի դեպ, Կարմիր խաչը չի ընդունում «փոխանակում» եզրույթը։ Ռազմագերին կամ քաղաքացիական անձը, հումանիտար իրավունքի համաձայն, պետք է առանց պայմանների վերադարձվի։

«Ժամանակին ռազմագերիների փաստացի փոխանակման տարբեր նախադեպեր են եղել։ Եղել է դեպք, երբ ողջ մարդու փոխարեն Ադրբեջանը մեզ փոխանցել է գերիի դին», - ասաց Կապրիելյանը։

90-ականներին հրամանատարները երբեմն փոխանակում են իրականացնել` գործը բարձրագույն հրամանատարությանը չհասցնելով։ Նրանք իրար հետ են պայմանավորվել։ Եղել են դեպքեր, երբ հայ գերիներին հաջողվել է վերադարձնել պարենի կամ վառելիքի դիմաց։

Բայց այդ ամենը 90-ականներին սկզբին էր։ Հիմա ամեն ինչ անցնում է «կենտրոնով» ու ԿԽՄԿ-ով։ Սկզբում պետք է հասնել մարտական գործողությունների դադարին։

Ավելի վաղ Մարդու իրավունքների պաշտպանի գրասենյակից Sputnik Արմենիային հայտնել էին, որ Արցախի օմբուդսմենը հայ զինծառայողների մասնակցությամբ տեսանյութն ու նրանց մասին անհրաժեշտ տեղեկությունն ուղարկել է Կարմիր խաչի միջազգային կոմիտե։

Կոմիտեի հայաստանյան գրասենյակի հանրային կապերի պատասխանատու Զառա Ամատունին էլ մեր հարցին ի պատասխան հայտնել էր, որ տարբեր ճանապարհներով մեզ հասած տեղեկությունը պետք է նաև հաստատվի հակառակ կողմից, որից հետո միայն ԿԽՄԿ-ն կարող է դիմել այդ անձանց այցելելու համար։

«Վախի ազդեցության տակ է եղել». աղմկահարույց տեսանյութի Ազնիվն իրոք գերեվարվել է. ԱԱԾ

244
թեգերը:
Արցախ, ռազմագերի, գերի, Ադրբեջան, Հայաստան
Ըստ թեմայի
Պատերազմն Ադրբեջանի իշխանության գիտակցված ընտրությունն է. ԱՀ ԱԳՆ–ի կոչն աշխարհին
Թշնամու հերթական խոցված անօդաչուն. ՊԲ–ն լուսանկար է հրապարակել
Զոհրաբ Մնացականյանն ու Մինսկի խմբի համանախագահները հանդիպել են
Ինչպես կարող է Ալիևն այդքան ցինիկ լինել. Սարգսյանը` ադրբեջանական շոուի մասին
Օգտատերը կեղծ տեղեկություն է կարդում

Ադրբեջանցիները հայ գերիների սոցցանցային էջերից նյութեր են տարածում. ՄԻՊ–ն ապացույցներ ունի

491
(Թարմացված է 21:55 24.10.2020)
Հայաստանի մարդու իրավունքների պաշտպանի ձեռք բերած ապացույցները վկայում են, որ սոցիալական ցանցերի այդ էջերը կամ օգտահաշվիներն ակտիվացվում են ադրբեջանական IP (Internet Protocol) տիրույթից:

ԵՐԵՎԱՆ, 24 հոկտեմբերի - Sputnik. Հայաստանի մարդու իրավունքների պաշտպանը ձեռք է բերել և հրապարակել օբյեկտիվ բնույթի ապացույցներ այն մասին, որ ադրբեջանցիներն ապօրինաբար տիրանում են սոցիալական ցանցերի հայկական օգտահաշիվների գաղտնաբառերին ու սկսում են կառավարել այդ էջերը: ՀՀ ՄԻՊ Արման Թաթոյանը գրառում է արել Facebook-ի իր էջում։

«Այս պահին հրապարակում եմ ընդամենը մի քանի ապացույց: Այս պահի մեր ուսումնասիրությունները ցույց են տալիս, որ խոսքը գերեվարված կամ այլ կերպ Ադրբեջանում հայտնված մեր հայրենակիցների մասին է:Այս և մյուս բոլոր նյութերը փաստագրված են Հայաստանի մարդու իրավունքների պաշտպանը կողմից՝ միջազգային մարմիններին ըստ իրավասության ուղարկելու նպատակով»,–գրել է Թաթոյանը:

Նրա խոսքով`ապացույցները վկայում են, որ սոցիալական ցանցերի այդ էջերը կամ օգտահաշվիներն ակտիվացվում են ադրբեջանական IP (Internet Protocol) տիրույթից:

Նշենք, որ հայկական օգտատերերի նշված էջերից տարածվում է ատելություն: Տարածվում են նաև Հայաստանում և Արցախում հասարակական ու քաղաքական ներքին թշնամանք հրահրող, հասարակությունում լարվածություն, խուճապ ու տագնապ առաջացնող նյութեր:

Ադրբեջանն ունի բազմաթիվ զոհեր ու չի ցանկանում, որ այդ զոհերը հասնեն իրենց ընտանիքներին

Հայաստանի մարդու իրավունքների պաշտպանի ուսումնասիրությունը վեր է հանել դեպքեր, երբ այդ նյութերն արժանանում են հայկական օգտահաշիվների արձագանքի՝ ակնհայտորեն չիմանալով, որ էջը կառավարվում է Ադրբեջանից:

Թաթոյանը հորդորում է բացառիկ զգուշություն ցուցաբերել սոցիալական ցանցերով տարածվող նյութերից օգտվելիս կամ դրանք տարածելիս:

Ադրբեջանցի ռազմագերու վիրահատությունը բարեհաջող է անցել. Շուշան Ստեփանյան

491
թեգերը:
Արման Թաթոյան, գերի, Հայաստան
Ըստ թեմայի
Ռազմագերիներին ստիպողաբար խոսեցնելը թշնամու անզորության հստակ ցուցիչն է. Հովհաննիսյան
Արտակ Բեգլարյանը մի քանի խնդրանքով դիմել է հայրենակիցներին
Ադրբեջանցի ռազմագերին պատմում է` ինչպես են իրեն վիրավոր թողել ռազմի դաշտում ու փախել
Պարգև սրբազան

Պարգև սրբազանը դիմել է Մակրոնին, Թրամփին ու Պուտինին. տեսանյութ

10
(Թարմացված է 21:54 24.10.2020)
Արցախի թեմի առաջնորդի խոսքով`խաղաղությունից լավ բան չկա, աշխարհի ամենավատ բանը պատերազմն է, իսկ բոլոր պատերազմները ուշ թե շուտ ավարտվում են:

ԵՐԵՎԱՆ, 24 հոկտեմբերի – Sputnik. Հայ առաքելական եկեղեցու Արցախի թեմի առաջնորդ Պարգև արքեպիսկոպոս Մարտիրոսյանը կոչով դիմել է միջազգային հանրությանը՝ ԵԱՀԿ Մինսկի խմբի համանախագահող երկրների ղեկավարներին` Արցախի Հանրապետությունում պատերազմը կանգնեցնելու ու կյանքեր փրկելու համար։

Նա նշում է, որ արդեն գրեթե մեկ ամիս է` դաժան պատերազմ է գնում Արցախում, Թուրքիան իր ամբողջական ուժով ուղղակի ներգրավվել է պատերազմում և սատարում է Ադրբեջանին, մոտ 4 հազար միջազգային ահաբեկիչներ է ուղարկել այս տարածք և հիմա էլ 1200 հատուկ ծառայողներ է ուղարկել, որոնք լեռնային, անտառային մասնագետներ են:

«Ես դիմում եմ ԵԱՀԿ Մինսկի խմբի համանախագահ երկրների ղեկավարներին՝ պարոն Մակրոնին, պարոն Թրամփին ու պարոն Պուտինին, որ իրենց վճռական ձայնը բարձրացնեն և կանգնեցնեն այս նոր ցեղասպանությունը: 100 տարի անց Թուրքիան փորձում է երկրորդ ցեղասպանությունը կատարել այստեղ և ինչպես 1988-1990 թվականներին Սումգայիթում, Բաքվում Ադրբեջանը փորձեց ցեղասպանություն անել հայության նկատմամբ»,–ասում է Պարգև արքեպիսկոպոսը:

Նրա խոսքով`Էրդողանն ունի մեծ երազանք՝ նեոօսմանյան կայսրություն ստեղծել Թուրքիայից մինչև Չինաստան: Եվ այդ խաչմերուկի վրա Հայաստանն ու Արցախն են, նա կամենում է մաքրել հայությունն այս տարածքից, ճանապարհ հարթել դեպի Հյուսիսային Կովկաս, Կասպից ծովի հյուսիսային մասը և մտնել Միջին Ասիա, այնտեղից էլ գնալ Չինաստան:

«Ես դիմում եմ նաև աշխարհի բոլոր ղեկավարներին, բոլոր կրոնապետներին, քաղաքագետներին, բարի կամք ունեցող մարդկանց, որ իրենց վճռական ձայնը բարձրացնեն և վերջացնեն այս արյունահեղությունը. երկկողմանի ժողովուրդ է զոհվում, քաղաքացիական մարդիկ, երիտասարդներ, երեխաներ ու կանայք: Ես հույս ունեմ` ինչպես 1990-ականներին, 2016-ի ապրիլին Մոսկվային հաջողվեց երկու անգամ դադարեցնել պատերազմը, այս անգամ էլ ավելի վճռական խոսքով կկասեցնի այս երրորդ պատերազմը Արցախի տարածքում»,–ասել է նա:

Արցախի թեմի առաջնորդի խոսքով`խաղաղությունից լավ բան չկա, աշխարհի ամենավատ բանը պատերազմն է, իսկ բոլոր պատերազմները ուշ թե շուտ, ավարտվում են:

«Մարդը բանական էակ է, Աստված իրեն տրամաբանություն է տվել, միշտ կարելի է խոսքով հարցեր լուծել, սեղանի շուրջ մի օպտիմալ լուծում գտնել: Գործեք։ Դիմում եմ ձեզ, որպեսզի կյանքեր փրկենք: Ամենայն բարիք բոլորիդ»,- ասել է Պարգև սրբազանը։

Հիշեցնենք` սեպտեմբերի 27-ի վաղ առավոտյան Ադրբեջանը լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։

Հոկտեմբերի 24-ի ժամը 17։00-ի դրությամբ` հակառակորդի կրակոցների հետևանքով Արցախում զոհվել են 963 զինծառայողներ և 37 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6614 զոհ ունի և բազմաթիվ վիրավորներ։ 

Ըստ վերջին տվյալների՝ Ադրբեջանի զինված ուժերը կորցրել են 24 ինքնաթիռ, 16 ուղղաթիռ, 217 անօդաչու սարք, 6 ՏՈՍ-1 «Սոլնցեպեկ» համազարկային կրակի ռեակտիվ համակարգ, 600 տանկ և ՀՄՄ:

Հայը, «սիրիացին» ու բելառուսը. «հին գելերը» մեկնել են առաջնագիծ

Սեպտեմբերի 29–ին և հոկտեմբերի 1–ին ադրբեջանական զինուժը կրակ է բացել նաև Հայաստանի ուղղությամբ։ Մասնավորապես թիրախավորվել են Վարդենիսն ու Մեծ Մասրիկը։ 

Պատերազմ Արցախում` առանց սեփական զինվորների. ո՞րն է Էրդողանի գերնպատակը

10
թեգերը:
Դոնալդ Թրամփ, Էմանուել Մակրոն, Վլադիմիր Պուտին, Պարգև սրբազան (Արցախի թեմի առաջնորդ), Արցախ
Ըստ թեմայի
Պուտինն օրը մի քանի անգամ հեռախոսազրույց է ունենում Փաշինյանի հետ
Չի կարելի մոռանալ հայ ժողովրդի ապրած ողբերգությունը. Պուտինը խոսել է Ղարաբաղի մասին
Պեսկովն ասել է` ինչի է ձգտում Պուտինը Ղարաբաղի հարցում