ԵՐԵՎԱՆ, 22 հուլիսի – Sputnik. Արտաշատում տեղի ունեցած երեխայի վաճառքի գործով մեղադրանք է առաջադրվել 5 անձի։ Տեղեկությունը հայտնում են ՀՀ Քննչական կոմիտեի լրատվական ծառայությունից։
2020թ. հուլիսի 16-ին Արարատի մարզի բնակչուհին հաղորդում էր ներկայացրել այն մասին, որ նույն մարզի բժշկական հաստատության աշխատակցի միջոցով պայմանավորվածություն է ձեռք բերել և 2020թ. հուլիսի 13-ին իր նորածին դստերը 2.000 ԱՄՆ դոլարով վաճառել է երևանաբնակ ամուսինների:
«Դեպքի առթիվ ՀՀ ոստիկանության Արտաշատի բաժնում հարուցվել է քրեական գործ՝ ՀՀ քրեական օրենսգրքի 168-րդ հոդվածի (խնամքը ստանձնելու նպատակով երեխայի առքը կամ ստանձնողի խնամքին հանձնելու նպատակով երեխայի վաճառքը) 1-ին մասով, որը նախաքննություն կատարելու համար ուղարկվել է ՀՀ քննչական կոմիտեի Արարատի մարզային քննչական վարչություն»,–նշված է հաղորդագրության մեջ:
Արտաշատի ԲԿ–ում նորածնի վաճառք չէր կարող տեղի ունենալ. պարզաբանում
Պայմանավորվածության համաձայն՝ Արարատի բնակչուհին ընդունվել է Երևանի բուժհաստատություններից մեկը, որտեղ 2020թ. հուլիսի 8-ին ծննդաբերել է աղջիկ երեխա և բուժհաստատությունից դուրս գրվելուց հետո՝ 2020թ. հուլիսի 13-ին, երեխային հանձնել է գնորդին՝ Երևանի բնակչուհուն:
Երեխային վաճառող կնոջը և գնորդին մեղադրանք է առաջադրվել ՀՀ քրեական օրենսգրքի 168-րդ հոդվածի 1-ին մասով (Խնամքը ստանձնելու նպատակով երեխայի առքը կամ ստանձնողի խնամքին հանձնելու նպատակով երեխայի վաճառքը), Երևանի բնակչուհու ամուսնուն և բուժաշխատողներին՝ ՀՀ քրեական օրենսգրքի 38-168-րդ հոդվածի 1-ին մասով (Կատարողի հետ մեկտեղ հանցակիցներ են համարվում կազմակերպիչը, դրդիչը և օժանդակողը)։
Վերջինները տվել են խոստովանական ցուցմունքներ:
ՀՀ քննչական կոմիտեի նախագահի հանձնարարությամբ՝ քրեական գործի հետագա նախաքննությունը հանձնարարվել է ՀՀ քննչական կոմիտեի հատկապես կարևոր գործերի քննության գլխավոր վարչությանը:
Նախաքննությունը շարունակվում է:
Հիշեցնենք` երեկ Արտաշատի բուժկենտրոնը հանդես եկավ հայտարարությամբ, որ նորածնի վաճառքը չէր կարող տեղի ունենալ իրենց բուժկենտրոնում, քանի որ մարտի 31-ից ԲԿ–ն վերապրոֆիլավորվել է ինֆեկցիոն կենտրոնի և սպասարկում է բացառապես կորոնավիրուսային հիվանդությամբ ախտորոշված պացիենտներին։
Ի դեպ, նշենք, որ ոստիկանության հաղորդագրության մեջ չէր նշվում, որ դեպքը տեղի է ունեցել հենց ԲԿ–ում, կամ էլ կինը ծննդաբերել է ԲԿ–ում։
Ոստիկանությունը հայտնել էր միայն, որ ԲԿ–ի բժշկուհիներից մեկի հետ է ծննդկանը համաձայնության եկել։
