Կենտրոնում` Կարեն Ավետիսյանը

Sputnik–ի ու «Ոսկե ծիրանի» Կարենի անհավանական արկածները Երևանում, Փարիզում ու Դաքքայում

157
(Թարմացված է 22:21 06.07.2020)
Հոդվածը հիմնված է բացառապես իրական իրադարձությունների վրա։ Սիրով և թեթև սարկազմով` կինոքննադատ և մեր գործընկեր Կարեն Ավետիսյանի ձախորդությունների մասին։ Նման բաներ կարող էր պատահել միայն նրա հետ։

Ուղևորություն դեպի Բանգլադեշ, կողոպուտ Փարիզում, առանց հագուստի Իրանում և 5 հազար ռուբլի «կատակների բանկից»։ Եթե այս պատմություններն ընկնեին դասականների ձեռքը, ապա աշխարհն այսօր կընթերցեր ֆատալիզմի, սեփական անձի և կյանքի իմաստի փնտրտուքների մասին հերթական բեսթսելլերը։ Սակայն քանի որ այդ մասին գրում է շարքային լրագրողը, այն էլ իր շարքային (թեև բավական ինքնատիպ) գործընկերոջ և համատեղությամբ «Ոսկե ծիրան» կինոփառատոնի ծրագրային տնօրեն Կարեն Ավետիսյանի մասին, մեր պատմությունը համաշխարհային փառքի հավակնել չի կարող, սակայն հաստատ կարող է զարդարել երեկոն` մի լավ զվարճացնելով ձեզ։

Անկեղծ ասած` այս հոդվածը հազիվ թե գրվեր, եթե չլիներ վերջին դեպքը, որը պատահեց մեր լուսավոր Կարենի հետ։ Արկածների տուփը լցվեց. նրա անհաջողությունների մասին աշխարհին պատմելու ժամանակն է։

Յուրաքանչյուր մարդ իր «ֆիրմային» պատմությունն ունի, որը երկար տարիներ պատմում է ընկերներին ու բարեկամներին, իսկ ավելի ուշ արդեն` երեխաներին և թոռներին։ Թեև մեր հերոսը հազիվ թե հեռահար նպատակներով է նման դեպքերի կիզակետում հայտնվում։ Այնուամենայնիվ, քչերը կարող են պարծենալ բոլորովին տարբեր երկրներում իրենց հետ տեղի ունեցած ամենատարբեր պատմություններով։ Ճակատագի՞ր է սա, պարզունակ անհաջողությո՞ւն, թե՞ սովորական ցրվածություն, կարող եք դատել ինքներդ։ Իմ կարծիքով` մեր ընկերն իսկապես հաջողակ է։

16-ամյա «Ոսկե ծիրանն» ու նոր տարբերանշանը. տոնական ֆոտոշարք

Մի օր նա ասաց, որ կյանքի իմաստն այն «բովանդակալից ապրելու մեջ է»։ Որպեսզի հիշելու բան լինի։ Կարենն իր կյանքի ընթացքում բազմաթիվ ճամպրուկներ է կորցրել, ինչպես նաև մի շարք նյութական կորուստներ ունեցել, սակայն մեկ ճամպրուկ` լի արկածներով ու հուշերով, նա ամուր պահում է ձեռքում և ոչ մի դեպքում նրանից չի բաժանվի։

Պատմում ենք մեր հայկական Պիեռ Ռիշարի հետ տեղի ունեցած «ամենաաղմկոտ» պատմությունները։

COVID-19–ի դարաշրջանում

Այս պատմությունը տեղի է ունեցել օրեր առաջ։ Կարենը, ինչպես միշտ, զբոսնում էր Երևանի փողոցներից մեկում, երբ հանկարծ հայացքն ընկավ մայթին ընկած թղթադրամին։ Ռուսական 5000–անոցի հավանական տիրոջը գտնելու հույսով շուրջբոլորը զննելով, Կարենը հասկացավ, որ տերը հազիվ թե գտնվի։ Արդյունքում, ինչ մեղքներս թաքցնենք, նա այդ թղթադրամն իրեն վերցրեց։

Հաջորդ առավոտյան «գտածոյի» մասին պատմեց գործընկերներին։ Դե, բնականաբար, բոլորը զարմացան և ուրախացան, որ մի օր վերջապես Կարենը ոչ թե ինչ–որ բան կորցրել է, այլ գտել։ Բայց... Ամեն ինչ դրանով չավարտվեց։

Նա գնաց տարադրամի փոխանակման կետ` ակնկալելով, որ իրեն 35-37 հազար դրամ կտան այդ 5000-անոցի դիմաց։ Ուշադիր զննելով թղթադրամը` կետի աշխատողն այն պարզեց Կարենին` քմծիծաղով ավելացնելով. «Կարծում եմ` ձեզ հետ կատակ են արել»։

Պարզվեց` թղթադրամի վերևի աջ անկյունում մանր տառերով գրված է «կատակների բանկ»։

Մեր Կարենը Կարեն չէր լինի, եթե իրավիճակից յուրովի դուրս չգար. նա որոշեց 5 հազար ռուբլի գնել և թողնել մի տեղ փողոցում։

Սա տեսնել է պետք. Կանն եկած աստղերի զարդերն ու հանդերձանքը. լուսանկարներ

«Որպեսզի նա, ով կգտնի փողը, ոչ թե հիասթափվի ինձ պես, այլ ուրախանա», – ասաց Ավետիսյանը` ավարտելով պատմությունը։

Փարիզ, Կանն, ձեռնունայն

«Ամենաէքստրեմալ ֆորս մաժորային» դրվագը, Կարենի խոստովանությամբ, իր հետ տեղի է ունեցել Ֆրանսիայում։ Երեք տարի առաջ նա մեկնեց Կաննի միջազգային կինոփառատոն, ու շատերն այստեղ կարծես թե պետք է նախանձով լցվեին. չէ՞ որ ոչ բոլորին է բախտ վիճակվում հայտնվել համաշխարհային կինոյի աստղերի շրջապատում։

Կարճ ասած` բուն Կաննում ամեն ինչ քիչ թե շատ նորմալ անցավ և եկավ տուն վերադառնալու ժամանակը. Կարենը հավաքեց իրերն ու նստեց մինչև Փարիզ, իսկ ավելի կոնկրետ` մինչև «Օռլի» օդանավակայան ուղևորվող էքսպրես գնացքը։ Լուսադեմին աչքը կպավ։

«Բացեցի աչքերս օդանավակայան չհասած մի քանի կայարան առաջ և հայտնաբերեցի, որ չկա փառատոնային պայուսակս, որում բացարձակապես ամեն ինչն էր` դրամապանակս, կանխիկ գումարս, բանկային քարտերս, փաստաթղթերս և նույնիսկ վարորդական իրավունքն ու սոցքարտս, որոնք Փարիզում բոլորովին պետք չէին», – պատմեց Ավետիսյանը։

Մարդկության համար արժեք ստեղծողները կգան Հայաստան. Իսրայելյանի փառատոնը, աստղերն ու ռոքը

Նա զրկվել էր նաև հեռախոսի լիցքավորման լարից, հեռախոսն էլ ընդամենը 16% էր ցույց տալիս։ Վագոնում մեկ ուղևոր կար, որը նույնպես քնած էր եղել և կողոպուտի պահը չէր տեսել։

«Արդյունքում ես բացարձակ միայնակ մնացի օտար երկրում` առանց սեփական գոյությանս փաստն ապացուցելու հնարավորության», – պատմում է Կարենը։

«Օռլի» օդանավակայանում նրան խորհուրդ տվեցին կողոպուտի մասին դիմում գրել ոստիկանությունում։ Ոստիկանության բաժնում ստիպված եղավ սպասել 40 րոպե, որից հետո տեսուչը բավական սիրալիր հայտնեց, որ նրան գողոնի հայտնաբերման հետ կապված որևէ երաշխիք տալ չեն կարող։

«Նրանք ցույց տվեցին փաստաթղթերի, թղթապանակների և թղթերի մի հսկայական տրցակ։ Դրանք միայն վերջին երկու–երեք օրվա գողությունների և կորցրած իրերի մասին հաղորդումներն էին։ Միակ բանը, ինչով նրանք ինձ օգնեցին` փաստաթղթերի կորուստը հաստատող փաստաթղթի տրամադրումն էր», – պատմում է Կարենը։

Այդ թղթով մեր հերոսը մի կերպ հասավ Փարիզի կենտրոն և ուղևորվեց ընկերների տուն։ Ոստիկանության տրամադրած թուղթն այստեղ շատ տեղին էր։ Այն վայրից, որտեղ նա գտնվում էր, մինչև ընկերների տուն ստիպված էր մետրոյում և վերգետնյա հանրային տրանսպորտում հաղթահարել մոտ 9 կետ, իսկ տոմսի փոխարեն նա հսկիչներին ցույց էր տալիս փրկիչ փաստաթուղթը։ Մի տեղ, սակայն, այն չանցավ, Կարենը ստիպված էր 9 անգամ պատմել բոլոր արկածները, որոնք Փարիզում անհավանական «բինգո» էին տարել։

Մոնիկա Բելուչին, Ռոբերտ Դե Նիրոն և այլ աստղեր կոչ են արել համավարակից հետո փոխել կյանքը

Հաջորդ օրը Կարենը հասավ Հայաստանի դեսպանատուն, որտեղ նույնպես ստիպված էր տարատեսակ ու բազմաթիվ դիմումներ գրել։ Արդյունքում «սպիտակ անձնագրով»` զրկված գրեթե բոլոր փաստաթղթերից, սակայն չկորցնելով իր անփոխարինելի հմայքը, Ավետիսյանը հասավ տուն` նախատեսվածից չորս օր ուշ։

Այդ պահին ինքն իրեն ասոցացնում էր Սթիվեն Սփիլբերգի «Տերմինալ» ֆիլմից Թոմ Հենքսի մարմնավորած հերոսի հետ։

Բանգլադե՞շ, թե՞ 17-ից 1-ը

Հազիվ ուշքի գալով փարիզյան արկածներից, Կարենը ստիպված էր կրկին դասավորել ճամպրուկն ու ուղևորվել Բանգլադեշ` կինոգետների և կինոքննադատների գագաթնաժողովին, որն անցկացվում էր Դաքքա քաղաքում։ Նա հաջողությամբ վայրէջք կատարեց օդանավակայանում. կարծես ոչինչ փորձանք չէր գուժում։

Ուղեբեռը ստանալու բաժնում մեկ ժամ սպասելուց հետո, սակայն, պարզ դարձավ, որ իր մանրակրկիտ դասավորած ճամպրուկը նա այլևս երբեք չի տեսնի։ Կարենը դիմեց համապատասխան ծառայությանը, որտեղ նրան շատ սիրալիր հայտնեցին, որ Դաքքայի օդանավակայանում նման բան է պատահում յուրաքանչյուր 17-րդ ուղևորի հետ։

«Այդ 17-րդ ուղևորը ես էի։ Քաղաք էի գնում, մտորելով այն մասին, թե ինչպես պետք է ապրեմ հաջորդ մեկ շաբաթն առանց որևէ իրի։ Հետո հիշեցի, որ Բանգլադեշը հայտնի է իր բավական էժան և որակյալ տեքստիլով», – պատմում է Ավետիսյանը։

Շուկայում և խանութներում նա որոշակի հագուստ ձեռք բերեց` դրա վրա ծախսելով գրեթե ողջ օրապահիկն ու գործուղման ծախսերի համար նախատեսված գումարը։

Հռչակավոր աստղերն աշխարհին ցույց են տվել, որ հայ են. ազգային կերակուրների ֆլեշմոբ

Թեպետ այս ուղևորությունն ամբողջությամբ կատաստրոֆիկ անվանել չի կարելի. առավոտյան ուղեբեռը փոխհատուցվեց ոչ պակաս «բարիքներով»։

Իրանն ու գրանցման սեղանիկի մոտ հեռախոսազրույցների վտանգը

Բանգլադեշից անմիջապես հետո Ավետիսյանին գործուղեցին Իրան` մեր երկիրը ներկայացնելու Թեհրանի միջազգային կինոփառատոնին։

Հիշելով ուղեբեռի հետ կապված անախորժության մասին` Կարենն այս անգամ որոշել էր սահմանափակվել ձեռքի ուղեբեռով (բայց բոլորը հիշում են, չէ՞, թե ինչ եղավ դրա հետ Փարիզում)։

Մի խոսքով` մեր ընկերը որոշեց, որ այդպես ամեն ինչ ավելի ապահով կլինի։ Մտածեց ու նստեց օդանավ։ Քնեց և... մնացածը բոլորդ հասկացաք։ Դարձյալ մի փոքր ննջելով և իրեն ողջ ու առողջ հայտնաբերելով արդեն իրանական հողի վրա` իր «բարիքները» նա այդպես էլ չգտավ։

Լարելով իր կարճ, սակայն ոչ «աղջկական» հիշողությունը, կամքի տիտանական ջանքեր գործադրելով` մեր Կարենը հիշեց, որ ինքնաթիռ նստելուց առաջ հեռախոսային խոսակցությամբ տարված, պարզապես իր «ճամպրուկը» թողել էր գրանցման վերջին կետում։ Մի ձեռքում հեռախոսն էր, մյուսում` փաստաթղթերը. դե սեփական ուղեբեռն ո՞ւմ է ընդհանրապես հետաքրքիր։

Եվ մեր Կարենը ստիպված էր հերթական անգամ թարմացնել իր զգեստապահարանը։

Ովքեր են ստեղծում Sputnik Արմենիան. հոբելյանական տեսանյութ

Կարծում եք` այսքանով վե՞րջ։ Ո՛չ, ֆանտաստիկ մի պատմություն կա նաև կապված Բեռլինի ուղևորության հետ, իհարկե դեպի «Բեռլինալե», որտեղ մեր Կարենը հայտնվեց` բառացիորեն խաբելով ճակատագրին։ Սակայն այդ մասին` հաջորդիվ, որովհետև դրա մասին պետք է առանձին գրվի։ Բացի այդ, արդեն ոչ ոք չի էլ կասկածում, որ մինչև այդ չարաբաստիկ հաջորդ անգամը մեր Կարենն անպայման կհամալրի սեփական արկածների իր հավաքածուն հերթական` էլ ավելի հիասքանչ մի պատմությամբ։

157
թեգերը:
գողություն, փաստաթուղթ, փող, Իրանի Իսլամական Հանրապետություն, Փարիզ, Երևան, «Ոսկե ծիրան» կինոփառատոն, Sputnik, Կարեն Ավետիսյան
Ըստ թեմայի
Երևանի ու երևանցիների մասին պատմող «Ադապտացիա» ֆիլմը կփակի «Եվրասիա.DOC» կինոփառատոնը
Դանիել Վարուժանի մասին պատմող ֆիլմը ներկայացվել է Art Visuals and Poetry կինոփառատոնին
«Ոսկե ծիրան» միջազգային կինոփառատոնը կհետաձգվի. երբ կկայանա այն
Հենրիխ Մխիթարյան

«Ճանաչո՞ւմ ես ինձ, ճանաչիր Արցախը». Հենրիխ Մխիթարյանը նոր գրառում է արել

157
(Թարմացված է 19:46 31.10.2020)
Հայ ֆուտբոլիստը շարունակում է իր միջազգային ճանաչվածությունն օգտագործել` աշխարհին Արցախի դեմ սանձազերծված ագրեսիայի մասին պատմելու համար։

ԵՐԵՎԱՆ, 31 հոկտեմբերի - Sputnik. Հայաստանի ազգային հավաքականի և «Ռոմայի» կիսապաշտպան Հենրիխ Մխիթարյանը շարունակում է աշխարհի ուշադրությունը հրավիրել Արցախում շարունակվող պատերազմի վրա։ Facebook-ի իր էջում նա հերթական գրառումն է արել՝ պատմելով խաղաղ բնակչության դեմ իրականացվող ագրեսիայի մասին։

Նա կրկին դիմել է միջազգային հանրությանը՝ կոչ անելով ճանաչել Արցախի անկախությունը։

«Արցախի հայերը խաղաղություն են ուզում: Հակամարտության սրման, ինչպես նաև հայ անմեղ քաղաքացիների շարունակական թիրախավորման և նրանց ֆիզիկական ոչնչացման սպառնալիքի լույսի ներքո մենք միջազգային հանրությանը կոչ ենք անում ճանաչել Արցախի Հանրապետության անկախությունը և նրա ինքնորոշման իրավունքը»,- գրել է հայազգի աշխարհահռչակ ֆուտբոլիստը։

Նշենք, որ պատերազմի առաջին օրերից Հենրիխ Մխիթարյանն իր ճանաչվածությունը դարձրեց զենք հօգուտ ճշմարտության ու հայ ժողովրդի։ Նա բազմիցս իր հրապարակումներում անդրադարձել է Արցախում տիրող իրավիճակին։ Նա պարբերաբար սոցիալական ցանցերի իր էջերում գրառումներ է անում, լուսանկարներ հրապարակում՝ միջազգային հանրությանը կոչ անելով շտապ միջամտել Ադրբեջանի և Թուրքիայի կողմից սանձազերծված ագրեսիան դադարեցնելու համար։

Ավելի վաղ «Ռոմայի» գլխավոր մարզիչ Պաուլո Ֆոնսեկան էլ իր հերթին հայտնել էր, որ պատրաստ է Հենրիխ Մխիթարյանին հանգիստ տալ առաջիկա խաղերին, քանի որ նա մտքերով Արցախում է:

Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։

Հոկտեմբերի 31-ի ժամը 17։00-ի դրությամբ` հակառակորդի կրակոցների հետևանքով Արցախում զոհվել են 1166 զինծառայողներ և 45 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6947 զոհ ունի և բազմաթիվ վիրավորներ։ 

Ըստ վերջին տվյալների՝ Ադրբեջանի զինված ուժերը կորցրել են 25 ինքնաթիռ, 16 ուղղաթիռ, 239 անօդաչու սարք, 6 ՏՈՍ-1 «Սոլնցեպեկ» համազարկային կրակի ռեակտիվ համակարգ, 656 տանկ և ՀՄՄ:

Ես չգնամ, էլ ո՞վ գնա. Արցախից եկած մարզիկն ու մարզիչը պատմում են տղաների հերոսության մասին

Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։ 

Անմարդկային են կռվում․ հադրութցի Մարո բաբոն սպասում է հաղթանակին ու «հնդկական» երեկոներին

157
թեգերը:
Հենրիխ Մխիթարյան, Արցախ, Արցախյան պատերազմ
թեմա:
Հենրիխ Մխիթարյան
Ըստ թեմայի
Հենրիխ Մխիթարյանը դիմել է միջազգային հանրությանը
Հենրիխ Մխիթարյանի մտքերն Արցախում են. «Ռոման» աջակցում է հայ ֆուտբոլիստին
«Ծանր սրտով եմ գրում». Հենրիխ Մխիթարյանը բաց նամակ է հղել Պուտինին, Թրամփին ու Մակրոնին
Հիվանդանոց

Վիրավորների բուժմամբ զբաղվող հիվանդանոցներին օպերատիվ կտրամադրվի այն, ինչի կարիքը կա

69
(Թարմացված է 19:29 31.10.2020)
Անհրաժեշտ սարքավորումներն ու դեղորայքը ժամանակին են տեղ հասնում. մինչ օրս որևէ վիրավոր զինվորի բուժօգնություն չի տուժել այդ պատճառով։

ԵՐԵՎԱՆ, 31 հոկտեմբերի - Sputnik. ՀՀ առողջապահության նախարարությունը տեղեկացնում է, որ վիրավոր զինծառայողների բուժմամբ զբաղվող հիվանդանոցների կարիքները կբավարարվեն «կենտրոնացված ձևով»։

«Ցանկացած հիվանդանոցում, որտեղ ընթանում է Ադրբեջանի սանձազերծած լայնածավալ պատերազմի հետևանքով վիրավորում ստացած զինվորների բուժում և ընթացքում առաջանում է որևէ կարիք, որն այդ պահին բացակայում է հիվանդանոցում՝ խնդրում ենք հարցը լուծել կենտրոնացված ձևով»,- նշված է ԱՆ մամուլի ծառայության տարածած հաղորդագրության մեջ։

Հաջորդիվ նախարարությունը մանրամասնում է. «կենտրոնացված» նշանակում է՝ տվյալ հիվանդանոցի տնօրինության միջոցով պետք է կարիքը ներկայացվի նախարարություն։ Եթե անհրաժեշտ պարագան (սարքավորում, դեղորայք և այլն) ՀՀ ԱՆ «Մարդասիրական օգնության հանրապետական կենտրոնի» պահեստում կա, ապա անմիջապես կտրամադրվի։ Եթե չկա, ապա օպերատիվ կերպով ձեռք կբերվի և կմատակարարվի։

Նախարարությունից նաև տեղեկացնում են, որ մատակարարվել են անհրաժեշտ բոլոր սարքավորումներն ու դեղորայքը, և որևէ վիրավորի բուժօգնություն չի տուժել դրա պատճառով։

Հիշեցնենք` սեպտեմբերի 27-ի վաղ առավոտյան Ադրբեջանը Թուրքիայի աջակցությամբ լայնածավալ ռազմական հարձակում է սկսել արցախա–ադրբեջանական սահմանի ողջ երկայնքով։

Հոկտեմբերի 31-ի ժամը 17։00-ի դրությամբ` հակառակորդի կրակոցների հետևանքով Արցախում զոհվել են 1166 զինծառայողներ և 45 քաղաքացիական անձինք։ Ադրբեջանի կենդանի ուժի վերաբերյալ պաշտոնական տեղեկություններ չկան, սակայն հայկական կողմը հայտնում է, որ հակառակորդը 6947 զոհ ունի և բազմաթիվ վիրավորներ։ 

Ըստ վերջին տվյալների՝ Ադրբեջանի զինված ուժերը կորցրել են 25 ինքնաթիռ, 16 ուղղաթիռ, 239 անօդաչու սարք, 6 ՏՈՍ-1 «Սոլնցեպեկ» համազարկային կրակի ռեակտիվ համակարգ, 656 տանկ և ՀՄՄ:

Ես չգնամ, էլ ո՞վ գնա. Արցախից եկած մարզիկն ու մարզիչը պատմում են տղաների հերոսության մասին

Սեպտեմբերի 29–ից սկսած ադրբեջանական զինուժը մերթընդմերթ կրակ է բացում նաև Հայաստանի ուղղությամբ։ 

Անմարդկային են կռվում․ հադրութցի Մարո բաբոն սպասում է հաղթանակին ու «հնդկական» երեկոներին

69
թեգերը:
զինծառայող, Վիրավոր, Հայաստան
Ըստ թեմայի
Պատերազմն ու կորոնավիրուսը. ՀՀ առողջապահության նախարարությունը պատասխանել է քննադատությանը
Առողջապահության նախարարությունը ահազանգում է` կորոնավիրուսը կարող է վնասել մեր զինվորներին
Ով կարող է արյան դոնոր դառնալ վիրավորների համար
Թևան Պողոսյան

ՌԴ–ին պաշտոնական նամակով դիմելն ավելի կարևոր էր, քան Ժնևի հանդիպումը. Պողոսյան

0
(Թարմացված է 23:17 31.10.2020)
Թևան Պողոսյանը կարծում է, որ ժնևյան պայմանավորվածությունները «դրսի աշխարհի համար» խուսափելու տեղ թողնող ձևակերպումներ են և Ադրբեջանին թույլ են տալիս խուսանավել։
Պողոսյան. «Որևէ մեկս պատրանքներ չունեինք, որ Ադրբեջանը պահպանելու է պայմանավորվածությունները»

«Մարդկային զարգացման միջազգային կենտրոնի» ղեկավար Թևան Պողոսյանը պաշտոնական նամակով Ռուսաստանի Դաշնությանը դիմելն ավելի կարևոր է համարում, քան Ժնևի հանդիպումը, որովհետև, նրա խոսքով, որևէ մեկը պատրանքներ չուներ, որ Ադրբեջանը պահպանելու է պայմանավորվածությունները։

«Հանդիպման արդյունքները նույնն էին, ինչ նախկին բոլոր քննարկումներում։ Կա ինչ–որ փաստաթուղթ, որի վրա միգուցե ապագայում պատմության մեջ կասեն` նայեք` փորձեր ենք ունեցել։ Բայց քանի որ մենք այս պահին խոսում ենք արդեն այն փաստից հետո, երբ նույն այդ հանդիպումից հետո կրակել են Ստեփանակերտի շուկայի ու Շուշիի վրա, հանդիպման արդյունքը գնահատում եմ` կրակելը Ստեփանակերտի շուկայի վրա»,– մեկնաբանելով Ժնևում կայացած Մնացականյան–Բայրամով հանդիպումը` Sputnik Արմենիային ասաց Պողոսյանը։

Նշենք, որ Ժնևում կողմերը պայմանավորվել են միջազգային մարդասիրական իրավունքին համապատասխան միտումնավոր հարձակումներ չգործել քաղաքացիական բնակչության կամ ոչ ռազմական օբյեկտների վրա։

Ըստ «Մարդկային զարգացման միջազգային կենտրոնի» ղեկավարի` այդ պայմանավորվածությունները «դրսի աշխարհի համար» խուսափելու տեղ թողնող ձևակերպումներ են և Ադրբեջանին թույլ են տալիս խուսանավել։

«Եթե կպնի` պատահաբար է կպել, դա կոնկրետ թիրախավորած չէր։ Որ հարցնես, ադրբեջանցիներն ասելու են` դե, ուզում էինք ուրիշ տեղ կպնել, այդտեղ կպանք, ներողություն։ Մոտավորապես այսպիսի մի բան։ Կամ եթե վաղը մերոնք էլ կրակեն, նույն կերպ կարող են պատասխանել` դուք մեզ հարցնում եք` նպատակաուղղված թիրախավորե՞լ եք, մենք ասում ենք` ո՛չ, պատահաբար է ստացվել, ու թեման փակվում է»։

ԵԱՀԿ Մինսկի խմբի համանախագահների հայտարարության մեջ նշված էր նաև, որ համանախագահները շարունակելու են ինտենսիվ աշխատանքը կողմերի հետ՝ փորձելով գտնել հակամարտության խաղաղ կարգավորման ուղիներ։

«Ես շատ ուրախ կլինեի նման աշխատանքի համար, երբ Ստեփանակերտի շուկայի վրա առաջին իսկ կրակոցից հետո, լուսանկարների հրապարակումից նույնիսկ մեկ րոպե չանցած իրենց օգնականները արթնացնեին մարդկանց տարբեր ժամային գոտիներում և ասեին` դե, հիմա հայտարարություն արեք։ Ես կհասկանայի, որ իրենք շատ ակտիվ աշխատում են։ Այլ պարագայում ակտիվ աշխատանքներն ի՞նչ է` սկանդինավյան խաղաղապահներին բերելու խնդիրն է, որ քննարկվում է, թե ինչ–որ այլ բաներ... Կան գործիքակազմեր, որոնցով իրենք կարող են ազդել»,– ասաց Պողոսյանը։

Նրա խոսքով` ոնց որ թե բոլորն էլ գիտեն, որ այնտեղ կան միջազգային ահաբեկիչներ` ոչ մի բան չեն անում, բոլորը գիտեն, որ դա Թուրքիայի ներգրավվածությունն է` ոչ մի պատժամիջոց, ոչ մի հայտարարություն Թուրքիայի դեմ։

«Դեռ հակառակը` թուրքերն են վախեցնում, հրաման են տալիս, գնում, եկեղեցում մարդու վիզ են կտրում Եվրոպայի մեջտեղը քսանմեկերորդ դարում»,– նշեց Պողոսյանը։

«Մարդկային զարգացման միջազգային կենտրոնի» ղեկավարն այս պարագայում մատնանշում է դիվանագիտական դաշտում պատերազմի յուրահատկությունների հանգամանքը։ «Այո՛, նրանք աշխատում են իրենց շահերից, կարողություններից ելնելով, բայց խնդիրն այն է, որ այսօր մեր հայրենիքում պատերազմ է, մենք մեր Հայրենական պատերազմը պետք է տանենք։ Եվ ինձ համար, օրինակ, շատ ավելի հետաքրքիր ու կարևոր լուր էր, որ ի վերջո Հայաստանի Հանրապետությունը պաշտոնական նամակով դիմեց Ռուսաստանի Դաշնությանը։

Պողոսյանի խոսքով` Ռուսաստանին պաշտոնական նամակով դիմելը ավելի կարևոր էր, քան Ժնևի հանդիպումը։

0
թեգերը:
Թևան Պողոսյան, Ադրբեջան, Հայաստան
Ըստ թեմայի
Զոհրաբ Մնացականյանի և Ջեյհուն Բայրամովի ժնևյան հանդիպումը 6 ժամ է տևել
Հայկական զինված ուժերը մշակում են հրադադարի վերֆիկացիայի առաջարկներ. Արծրուն Հովհաննիսյան
«Ադրբեջանը ջրից չոր դուրս գալու անհաջող ճիգեր է անում». ՀՀ Պն խոսնակի արձագանքը