ԵՐԵՎԱՆ, 3 հուլիսի - Sputnik. Սննդաբանները պնդում են, որ մոռն ունի հակաօքսիդանտ հատկություն։ Այն օգնում է ոչ միայն մաքրել օրգանիզմը, այլև նիհարել, քանի որ այս հատապտղի կալորիականությունը շատ ցածր է։ Թարմ մոռի 100 գրամը 52 կկալ է պարունակում, առանց շաքարի սառեցրածը՝ 55, շաքարային օշարակում պահածոյացվածը՝ 91, չորացրածը՝ 111 կկալ։ Սակայն թարմ վիճակում այն ամենաօգտակարն է։
Օգնում է բորբոքումների դեմ
Մոռի մուրաբայով թեյը թերևս մրսածության ու անգինայի դեմ ամենալավ դեղն է։ Բացի այդ՝ համեղ ըմպելիքը հարուստ է վիտամին C-ով ու սալիցիլաթթվով, որը հիանալի ջերմիջիցնող ու քրտնացնող միջոց է համարվում։ Մոռն ասպիրինի դեր է կատարում, սակայն ի տարբերություն հաբի՝ քիմիական նյութեր չի պարունակում։
Նվազեցնում է սրտային հիվանդությունների ռիսկը
Հատապտուղը պարունակում է բետա-սիտոստերին, որը կանխում է անոթների պատերի վրա խոլեստերինի կուտակումները, իսկ ֆիտոստերինները նպաստում են աթերոսկլերոզի նախապահպանությանը։ Մոռի կանոնավոր օգտագործումը կարգավորում է արյան կոագուլացումը։ Հատապտղի մեջ եղած մագնիումը լավացնում է սրտամկանի աշխատանքը, իսկ վիտամին K-ն ամրացնում է մազանոթները։ Վարդագույն հատապտուղները կարող են դադարեցնել երկարատև արյունահոսությունն ու կարգավորել արյան բարձր ճնշումը։
Լավացնում է նյարդային համակարգի աշխատանքը
Հատապտուղը պարունակում է մեծ քանակությամբ միներալներ ու պղինձ, որոնք օգնում են հաղթահարել մշտական սթրեսներն ու էմոցիոնալ ծանրաբեռնվածությունը։ Բացի այդ, մոռը հանգստացնող նշանակություն ունի, ու մի բաժակ մուրաբայով թեյը կամ 100 գրամ հատապտուղները թույլ կտան հաղթահարել դեպրեսիվ վիճակն ու հանկարծակի տագնապի զգացողությունը։
Կարգավորում է մարսողական համակարգի աշխատանքը
Մոռը ոչ միայն ախորժակ է բացում, այլև խնձորի, կիտրոնի և այլ թթուների պարունակության շնորհիվ խթանում է աղիների աշխատանքը։ Մոռն օգտակար է փորկապության դեպքում: Բույսի տերևների թունդ թուրմը նպաստում ստամոքսի խոցի բուժմանը։
Օգտակար է կանանց համար
Մոռի մեջ գտնվող А ու Е վիտամինները լավացնում են մաշկի որակը, փափկացնում ու խոնավեցնում են այն, իսկ ջուրն ու մրգային թթուները հարթեցնում են կնճիռներն ու պահպանում բնական ճկունությունը։ Մագնիումը նպաստում է մազերի աճին։
Մոռի թեյերը արդյունավետ են դաշտանի կարգավորման ու այդ օրերին ցավը մեղմացնելու համար։ Ֆոլաթթուն, որը նույնպես կա մոռի մեջ, օգնում է պտղի նորմալ ձևավորմանը։ Մոռի տերևների թուրմը արգելվում է օգտագործել հղիության 36-րդ շաբաթից հետո։ Դաշտանադադարից առաջ մոռը մասնակցում է հորմոների սինթեզին, կատարելագործում է ռեպրոդուկտիվ օրգանների աշխատանքը, ինչը բարենպաստ է կնոջ համար ցանկացած տարիքում։
Մոռն օգտակար է նաև տղամարդկանց համար
Հակաօքսիդանտների, ասկորբինաթթվի ու մագնիումի շնորհիվ մոռը կանխում է անպտղությունը, բարձրացնում է տեստոստերոնի մակարդակը։ Բջջանյութն ու պեկտինը խթանում են աղեստամոքսային տրակտի աշխատանքը, իսկ մրգային թթուները բարձրացնում են ստամոքսի թթվայնությունը։ Ֆլավոնոիդները, միներալները, վիտամիններն ու շաքարներն ապահովում են տղամարդկանց սթրեսակայունությունը։ Իսկ ֆիտոնուտրիենտները լավացնում են հիշողությունն ու բարձրացնում տրամադրությունը։
Հակացուցումները
Պետք է խուսափել չափազանց շատ մոռ ուտելուց, քանի որ որոշ դեպքերում դա կարող է անցանկալի հետևանքների ու հիվանդությունների սրացման հանգեցնել։ Մոռը սննդակարգից պետք է բացառել հետևյա դեպքերում․
- շաքարային դիաբետ
- բրոնխիալ ասթմա
- ենթաստամոքսային գեղձի բորբոքում
- ստամոքսի խոց
- միզաքարային հիվանդություն
- հոդատապ
- ալերգիաներ
-արգանդի հիպերտոնուսով հղիության դեպքում
Ինչպե՞ս ընտրել մոռ
Լավ ու համեղ մոռերը պետք է լինեն չոր ու ունենան վառ կարմիր գույն։ Եթե մոռը փափուկ ու մուգ է, չարժե ուտել այն։
Ինչպե՞ս պահել մոռը
Սկզբում պետք է հատ-հատ շարել հատապտուղները ափսեի մեջ մեկ-երկու շերտով, փակել թղթե անձեռոցիկով ու դնել սառնարան։ Այսպես մոռը մոտ երկու օր կարող է մնալ։ Այն պետք է շատ զգույշ լվանալ ուտելուց ու սառեցնելուց առաջ։ Սառեցնելուց պետք է այն մեկ շերտով շարել ու դնել սառցախցիկում։ Երբ հատապտուղները սառեն, դրանք կարելի է հանել, տեղափոխել տոպրակների մեջ ու շարունակել պահել սառացախցիկում։
