ԵՐԵՎԱՆ, 19 հունիսի - Sputnik. Գյումրեցի Ջուլիետա Ղուկասյանի մահվան գործով դատական նիստն այսօր կրկին հետաձգվեց: Կնոջ սպանության մեջ մեղադրվող Անդրեյ Ռազգիլդեևի պաշտպան Նարինե Ռշտունին դիմել էր Շիրակի մարզի առաջին ատյանի դատարան՝ դատական նիստը հետաձգելու խնդրանքով, քանի որ նախկինում իր ներկայացրած մեկ այլ, այն է՝ իր պաշտպանյալի նկատմամբ պաշտպանական միջոց կիրառելու միջնորդությունը, առաջին ատյանի դատարանը մերժել էր, իսկ պաշտպանը այն բողոքարկել է վերաքննիչ դատարանում:
«Նարինե Ռշտունին վերաքննիչ բողոք է ներկայացրել միջնորդության վերաբերյալ: Նշված հանգամանքի հետ կապված, քանի դեռ վերաքննիչ դատարանը պետք է քննի բողոքը, Ռշտունին խնդրել է դատական նիստը հետաձգել և նշանակել մեկ այլ օր»,- Sputnik Արմենիայի հետ զրույցում ասացին դատարանի աշխատակազմից:
Նշենք, որ սույն գործով դատական նիստերն արդեն քանիցս հետաձգվում են՝ անբաստանյալի՝ դատարան չներկայանալու պատճառով: Նրա պաշտպանը պնդում է, որ գործն աղմկահարույց է, ամբաստանյալի ցանկացած տեղափոխություն ռիսկային է և անվտանգության երաշխիք է պահանջում։
Նիստերից մեկի ժամանակ էլ դատարանը Գյումրիում տեղակայված ռուսական 102-րդ ռազմաբազայից գրություն էր ստացել, որ ամբաստանյալի տեղափոխությունը դատարան կկատարվի միայն ՌԴ պաշտպանության նախարարության հրամանի դեպքում: Փաստաթուղթը ներկայացրել էր ռազմաբազայի կողմից լիազորված, ռազմաբազայի իրավաբանական բաժնի ղեկավար, փոխգնդապետ Ալեքսանդր Գլադիշչևը։
Գյումրիում ավարտվել է 57-ամյա Ջուլիետա Ղուկասյանի սպանության գործի նախաքննությունը
«Ամբաստանյալին ռազմաբազայից Շիրակի մարզի ընդհանուր իրավասության դատարանի դահլիճ տեղափոխելը կկատարվի միայն ՌԴ ՊՆ հրամանից հետո, որի համար հիմք կհանդիսանա ՀՀ կառավարության կողմից ամբաստանյալի անվտանգության գրավոր երաշխիքը: ՌԴ պաշտպանության նախարարությունը ամբաստանյալին և նրան ուղեկցող անձանց անվտանգության գրավոր երաշխիք չի ստացել ՀՀ ղեկավարությունից»,- նշված էր փաստաթղթում:
Պաշտպանի խոսքով՝ ամբաստանյալը գտնվում է 102-րդ ռազմաբազայի` կալանավորված անձանց պահման վայրում:
Ի դեպ, քանի որ առջևում արձակուրդներ են, ամենայն հավանականությամբ, հաջորդ դատական նիստը կնշանակվի օգոստոսին:
Հիշեցնենք, որ Անդրեյ Ռազգիլդեևին մեղադրանք է առաջադրվել, որ նա 2018 թվականի դեկտեմբերի 2-ին` ժամը 07-ի սահմանում, ալկոհոլի ազդեցության տակ, գտնվելով Գյումրի քաղաքի Մայակովսկի փողոցում և տեսնելով նույն փողոցով Շահումյան փողոց տանող ուղղությամբ քայլող Գյումրի քաղաքի Աճեմյան փողոցի 26-րդ շենքի 12-րդ բնակարանի բնակիչ, 02.12.1961 թվականին ծնված Ջուլիետա Ստյոպայի Ղուկասյանին, հետևել է նրան:
Ղուկասյանը, խուսափելով Ռազգիլդեևից, փոխել է իր քայլերի ուղղությունը և քայլել նույն փողոցի 28-րդ և 30-րդ հասցեներում գտնվող սեփական տների ուղղությամբ, որտեղ էլ Անդրեյ Ռազգիլդեևը, հասնելով Ջուլիետա Ղուկասյանին, դիտավորությամբ բազմաթիվ հարվածներ է հասցրել նրա գլխին և մարմնի տարբեր մասերին` պատճառելով մարմնական վնասվածքներ։ Ղուկասյան դեպքի վայրից տեղափոխվել է Գյումրի բժշկական կենտրոն ՓԲ ընկերություն, որտեղ նույն օրը` ժամը 11:30-ին, մահացել է:
«Հուսով եմ` արդար քննություն կանցկացվի». Կոպիրկինը` Գյումրիում տեղի ունեցած դեպքի մասին
