ԵՐԵՎԱՆ, 1 հունիսի – Sputnik. ՀՀ աշխատանքի և սոցիալական հարցերի նախարարությունը տեղեկացնում է, որ կենսաթոշակների և նպաստների հետ կապված ժամկետները կրկին երկարաձգվել են։
«Հաշվի առնելով կորոնավիրուսի տարածման տեմպերը և նպատակ ունենալով կանխել սոցապահովության ծառայության տարածքային բաժիններում մարդկային հնարավոր կուտակումները՝ կենսաթոշակների և նպաստների իրավունքի վերականգնման, վերանշանակման, վերահաշվարկի ժամկետներում տեղի են ունեցել փոփոխություններ։ Քաղաքացիները ստիպված չեն լինի այցելել տարածքային բաժիններ»,–նշված է հաղորդագրության մեջ:
Եթե կենսաթոշակ կամ նպաստ նշանակելու, կենսաթոշակ կամ խնամքի նպաստ ստանալու իրավունքը վերականգնելու, կենսաթոշակի և խնամքի նպաստը լիազորագրով վճարելու, կենսաթոշակը վերահաշվարկելու, տեսակը փոխելու դիմումը ներկայացնելու ժամկետը լրանում է 2020 թ.-ի մարտ, ապրիլ և մայիս ամիսներին, քաղաքացին նոր դիմումը կարող է ներկայացնել մինչև 2020 թ.-ի հունիսի 25-ը:
Եթե հաշմանդամության սահմանման ժամկետը լրանում է 2020 թ.-ի մարտ, ապրիլ կամ մայիս ամիսներին, այն կերկարաձգվի մինչև 2020 թ.-ի հուլիսի 1-ը:
Ընտանիքների անապահովության գնահատման համակարգում գրանցված բոլոր ընտանիքները, որոնց փաստագրման ժամկետը լրանում է 2020 թ.-ի մարտին, ապրիլին կամ մայիսին, կարող են փաստագրվել մինչև 2020 թ.-ի հունիս 25-ը: Մինչ այդ օրը նպաստի վճարումը չի դադարեցվի փաստագրման ուշացման հիմքով:
ՀՀ քաղաքացիները կկարողանան արտերկրից դեղեր ներմուծել կամ փոստով պատվիրել
Նախարարությունը հիշեցնում է, որ հունիսի կենսաթոշակների և նպաստների վճարումը հանրապետությունում կիրականացվի առանց ուշացումների, անխափան ընթացքով: Ընդ որում՝ կենսաթոշակները և նպաստները կանխիկ եղանակով վճարվելու են բացառապես շահառուի հաշվառման հասցեում:
Հիշեցնենք նաև, որ քաղաքացիներն առանձին ծրագրերով կարող են դիմում ուղարկել առցանց եղանակով, մասնավորապես՝ երեխայի ծննդյան միանվագ նպաստի, մինչև 2 տարեկան երեխայի խնամքի նպաստի, թաղման միանվագ նպաստի դիմումները:
Լայնածավալ կասեցումներ Գյումրիում. ովքեր են հայտնվել ԱԱՏՄ–ի թիրախում
