ԵՐԵՎԱՆ, 29 մայիսի — Sputnik. Երևանին հարակից մի քանի գյուղեր մնացել են առանց տրանսպորտի:
Sputnik Արմենիայի խմբագրություն դիմած գյուղաբնակներն ահազանգում են, որ մնացել են արտաքին աշխարհից կտրված:
«Ոչ մի հնարավորություն չունենք Երևան հասնելու` ո՛չ աշխատանքի ենք կարողանում գնալ,ո՛չ երեխաներին մանկապարտեզ տանել»,- նշում է Արմավիրի Հայանիստ գյուղի բնակչուհի Անյուտա Ուկլեինան:
35 համարի ավտոբուսը, նրա խոսքով, մինչ այժմ իրենց գյուղ հասնող միակ տրանսպորտն է եղել, որը հիմա գյուղերով չի անցնում: Քաղաքի հետ հարակից գյուղերի կապն ապահովում է նաև միջմարզային 487 միկրոավտոբուսը, բայց դրա վերջին կանգառը հարևան գյուղում է:
«Ստիպված ենք 1.5 կմ քայլել արագընթաց մայրուղով մինչև ամենամոտ կանգառը: Իսկ այդ հատվածում մեքենաները 100 կմ ժամ արագությամբ են երթևեկում»,- ասաց մեզ դիմած քաղաքացին:
Բարձրացված խնդրի շուրջ պարզաբանում ստանալու համար Sputnik Արմենիան դիմել է քաղաքային իշխանություններին, բայց մեր զանգերն առայժմ մնում են անպատասխան:
Տրանսպորտում ու փակ տարածքներում դիմակ չկրողները կտուգանվեն 10 000 դրամով
Նշենք, որ այս հարցի շուրջ այլ հրապարակումներում պատասխանատուները նշել էին, որ մայրաքաղաքային երթուղիները սպասարկող ավտոբուսները մինչև հիմա խախտումով են հասել մայրաքաղաքի հարակից որոշ գյուղեր, իսկ այժմ, համավարակով պայմանավորված, նրանց արգելվել է դուրս գալ Երևանի սահմաններից:
Ինչ վերաբերում է կոնկրետ 35 համարի ավտոբուսին, նշենք, որ Երևանի քաղաքապետարանի պաշտոնական կայքում հրապարակված ուղևորափոխադրումների երթուղային ցանցում 35 համարի երթուղին անցնում է Արգավանդ -Գեղանիստ - Ազատաշեն - Խաչփառ -Հայանիստ գյուղերով:
