ԵՐԵՎԱՆ, 14 մայիսի –Sputnik. Ֆին համերգային մենեջեր Յուհա Մաթիլան դեռ 80-ականների սկզբին էր Խորհրդային միություն ֆիննական ռոք–խմբեր տանում։ Ցավոք, երկիրը փլուզվեց, բայց Մաթիլան այսօր էլ հաճույքով շրջագայում է արդեն նախկին ԽՍՀՄ հանրապետություններով` հիմնականում Ռուսաստան է այցելում, և ոչ միայն։ Տեղեկությունը հայտնում է Helsinkin Sanomat–ը։
2015 թվականին նա օգնել էր Երևանում կազմակերպել System of a Down խմբի համերգը, որը մնաց և՛ երևանցիների, և՛ Թբիլիսիից ու Իրանից ժամանած հյուրերի հուշերում։
Առաջին համերգը Մաթին կազմակերպել էր Տոհոլամփիում, երբ 14 տարեկան էր։ Դրա համար նա ավելի քան 300 ֆիննական մարկ էր ստացել․ 70-ականների սկզբին դպրոցականի համար այն հսկայական գումար էր։ Շուտով Մաթիլային հրավիրեցին քաղաքային դիսկոտեկ` երգացանկն ընտրելու համար։ 80-ականների սկզբին Մաթին տեղափոխվեց Հելսինկի, որտեղ նա մասնակցում էր ընդհատակյա գիշերային ակումբների գործունեության կազմակերպմանը։
«Մենք հաջողակ էինք, ոստիկանները մեզ մոտ ոչ մի անգամ չէին գալիս», – հիշում է նա պարբերականին տված հարցազրույցում։
Սերժ Թանկյանը միացել է հայ դպրոցականներին օգնելու արշավին
Դրանից հետո Մաթիլան որոշում է «ուժերը փորձել» Խորհրդային Միության տարածքում։
«Ամեն ինչ սկսվեց Էստոնիայից։ Մենք այնտեղ ֆիննական ռոք–խմբեր էինք տանում։ Հրաշալի էր։ Երբեմն մեզ ոչ թե գումարով էին վճարում, այլ խավիարով և կուբայական սիգարով», – հիշում է նա։
Խորհրդային Միության հետ ծանոթությունն օգնեց նրան հետագայում հաջող աշխատանք ծավալել Ռուսաստանում։
«Բյուրոկրատիա այնտեղ կա, սակայն կաշառակերություն չկա, իսկ մարդիկ ուղղակի հրաշալի են։ Կաշառքի մասին․ մի անգամ ինքս վճարեցի, երբ Ռուսաստան Էլիս Քուփերին բերեցի, և նրա համերգային ավտոբուսը ճանապարհին գերազանցեց արագությունը», – ժպտալով հավելել է նա։
Մաթիլայի կարծիքով՝ Ռուսաստան ավելի հեշտ է ֆիննական խմբեր տանելը։ Արևմտյան հարևանների մոտ, օրինակ՝ Շվեդիայում դժվար է համերգներ կազմակերպել. այնտեղ սեփական հզոր ռոք, այդ թվում` մեթալ–խմբերը շատ են։ Իսկ Ռուսաստանում միշտ պատրաստ են լսել ֆիններին։
Նա լավ հիշում է նաև այն, թե ինչպես է կազմակերպել System of a Down–ի ելույթը Երևանում 2015 թվականին։ Այն ժամանակ Հանրապետության հրապարակում նրանց լսելու էր եկել ավելի քան 10 հազար մարդ։
Այժմ Մաթիլան սպասում է՝ երբ է ավարտվելու կորոնավիրուսի համավարակը, որպեսզի կրկին մեկնի ընկերների մոտ` արևելք։ Ընդ որում՝ նա մտածում է ոչ միայն Ռուսաստան, այլև Չինաստան համերգներ կազմակերպելու մասին։