ԵՐԵՎԱՆ, 7 մայիսի - Sputnik. Արմավիրում ծանրամարտի ժամանակակից մարզադահլիճ կկառուցվի. կառավարությունն այսօր հավանության արժանացրեց ՀՀ կրթության, գիտության, մշակույթի և սպորտի նախարարության նախագիծը։
«Ծանրամարտի աշխարհի չեմպիոն Սիմոն Մարտիրոսյանը և նրա մարզիչն ու գործընկերները դիմել էին մեզ, որպեսզի Արմավիրում մարզադահլիճ կառուցվի։ Այս տարածաշրջանում ծանրամարտի հետ կապված կա հետաքրքրություն, սակայն չկան համապատասխան պայմաններ։ Ուստի որոշեցինք մարզադալիճ կառուցել»,–ասաց Հարությունյանը։
Արմավիրում մարզադահլիճի կառուցումը, ըստ Հարությունյանի, լրացուցիչ խթան կհանդիսանա տարածաշրջանում մարզաձևի զարգացմանը։ Իսկ Սիմոն Մարտիրոսյանն էլ անմիջական մասնակցություն կունենա մարզադահլիճի հետագա գործունեությանը։
Նրա խոսքով` իրենք տեղեկություններ ունեն, որ 2016-ի օլիմպիական խաղերի ժամանակ երկրորդ տեղ գրաված Սիմոն Մարտիրոսյանը հնարավոր է ոսկե մեդալ ստանա, քանի որ առաջին տեղ գրաված մարզիկը դոպինգի պատճառով որակազրկվել է։
Հարությունյանը հայտնեց, որ մարզադահլիճի կառուցման համար արդեն իսկ նախագծեր են պատրաստվում։
Միջազգային ասպարեզում վերականգնված արդարությունը կվերականգնվի նաև Հայաստանում
Հիշեցնենք, որ ծանրորդ Սիմոն Մարտիրոսյանը Հայաստանի առաջին մեդալը նվաճեց Ռիո դե Ժանեյրոյում ամառային Օլիմպիական խաղերում: Ծանրամարտի մրցաշարի 105 կգ քաշային կարգում 19-ամյա Մարտիրոսյանը դարձել էր արծաթե մեդալակիր: Դրանից հետո հայտնի դարձավ, որ օլիմպիադայի ոսկե մեդալակիր Ռուսլան Նուրուդինովի դոպինգ թեստը դրական արդյունք է ցույց տվել։
