ԵՐԵՎԱՆ, 17 ապրիլի – Sputnik. ՀՀ առողջապահության նախարարության «Հոգեկան առողջության պահպանման ազգային կենտրոն» ՓԲԸ-ի նախկին տնօրեն Նարեկ Վանեսյանը Facebook-ի իր էջում սիրառատ լուսանկար է հրապարակել, որում վիրահայ բժիշկն ու իր բուժքույր կինն են: Նրանք վերջերս են ամուսնացել, բայց իրենց մեղրամիսն անցկացնում են COVID-19 դրական ասիմպտոմ մեկուսարանում՝ մեր հայրենակիցներին օգնելով:
«Երեկոյան ստուգայցերը Երևանի կարանտինի գրասենյակի պարտադիր գործընթացներից են: Այսօր ստուգայցի ժամանակ COVID-19 դրական ասիմպտոմ մեկուսարանում հանդիպեցի նման պատկերի: Նկարում «Սուրբ Գրիգոր Լուսավորիչ» ԲԿ-ի բուժաշխատողներ՝ վրացահայ բժիշկ Գեորգի Կանտարիան ու նրա՝ մասնագիտությամբ բուժքույր կինն են: Հպարտ եմ մեր կամավորներով...»,-գրել է Վանեսյանը։
Նշենք, որ այս ընթացքում Վանեսյանը շատ ակտիվ է սոցցանցերում։ Ավելի վաղ նա հուզիչ լուսանկար էր հրապարակել իր վաղեմի բժիշկ ընկերոջ ու նրա բժիշկ դստեր մասնակցությամբ։
Կադրում երևում էր, թե ինչպես են հայր ու աղջիկ նայում իրար ապակու տարբեր կողմերից։
Ապակու տարբեր կողմերում․ բժիշկ հոր ու կամավոր դստեր հանդիպման լուսանկարը հուզել է մարդկանց
Հիշեցնենք, որ Հայաստանում կորոնավիրուսով վարակվածների թիվը այսօր դարձավ 1201։ Վերջին տվյալներով՝ արդեն առողջացել է 402 մարդ, փաստացի բուժվողների թիվը 780 է, իսկ մահվան դեպքերն ավելացել են ևս մեկով` հասնելով 19-ի։ Հայաստանում, ընդհանուր առմամբ, կորոնավիրուսի թեստ է հանձնել 10793 մարդ։
Կորոնավիրուսը չի նահանջում. վարակվածների թիվը դարձավ 1201. ևս մեկ մարդ մահացել է
