ԵՐԵՎԱՆ, 6 ապրիլի - Sputnik. ՀՀ վարչապետ Նիկոլ Փաշինյանը Facebook սոցիալական ցանցի ուղիղ եթերում, պատասխանելով իրեն ուղղված հարցերին, ասաց` քսանմեկերորդ դարում վաթսունհինգ և ավելի տարիքի մարդիկ լիարժեք աշխատունակ մարդիկ են։
Օգտատեր Դիանա Գասպարյանը հարցրել էր` ի՞նչ է սպասում այն տարիքի անձանց, որոնք թոշակ ստանալու համար դեռ երիտասարդ են, բայց աշխատանքի չեն ընդունում, քանի որ երիտասարդ չեն։ «Հիմա էլ, երբ օգնության առաջարկներ եղան, այս խավը կրկին անտեսվեց։ Խոսքս այժմյան օգնությանը այդքան չի վերաբերում, այլ մեր արհամարհված տարիքը»,– գրել էր նա` նշելով, որ ինքը 59 տարեկան է։
«Մենք պետք է ունենանք ծրագրեր, որոնց նպատակը մարդկանց աշխատաշուկայում ավելի մրցունակ դարձնելը լինի»,- ասաց վարչապետը։
Նա նշեց, որ երկրի տնտեսական զարգացման համար պետք է մշակվեն ոչ թե այնպիսի ծրագրեր, որոնց նպատակը լինի այդ տարիքի մարդկանց թոշակով կամ նպաստով ապահովելը, այլ նրանց վերապատրաստելը, այսինքն՝ օգնել նոր հմտություններ ձեռք բերել, զարգացնել եղածը, որպեսզի նրանք աշխատաշուկայում մրցունակ լինեն աշխատանք գտնելու համար։
Կորոնավիրուսն ու «ռուսական» խոպանը․ հայերի ընտանիքները զրկվել են փողից
Վարչապետը համաձայնեց, որ այստեղ լուրջ անելիքներ կան։ Նա խոստացավ, որ առաջիկայում առավելագույնը կարվի հարցը լուծելու համար։
Չգրանցված աշխատողները կշարունակեն տուժել. ինչպե՞ս է հնարավոր նրանց աջակցել
