Երևան

Չգրանցված աշխատողները կշարունակեն տուժել. ինչպե՞ս է հնարավոր նրանց աջակցել

597
(Թարմացված է 22:27 02.04.2020)
Գաղտնիք չէ, որ մի շարք ոլորտներում կան չգրանցված աշխատողներ, որոնք այժմ հարկադիր պարապուրդում են, ինչպես գրանցվածները։ Բայց եթե գրանցված աշխատողները ստանալու են աջակցություն, ապա չգրանցվածների դեպքում, ըստ մասնագետների, միայն մեկ ձևով կարող են օգնել։

ԵՐԵՎԱՆ, 2 ապրիլի – Sputnik, Կարինե Հարությունյան. Մինչ պետությունն արտակարգ դրության պայմաններում քայլեր է ձեռնարկում, որ քաղաքացիները տնից դուրս չգան, մի շարք քաղաքացիներ մտահոգ են. նրանք կառավարությունից սոցաջակցություն ստանալու որևէ ցանկում չկան, բայց չեն էլ աշխատում։ Խոսքը չգրանցված աշխատողների մասին է, որոնք այսօր անելանելի իրավիճակում են հայտնվել։ Խնդիրն այն է, որ պետությունը մեկամսյա հարկադիր պարապուրդի համար որոշել է աջակցել մի շարք ընկերությունների (սրճարաններ, տուրիզմ) աշխատակիցներին, սակայն այդ ցանկերում, բնականաբար, միայն գրանցված աշխատողներն են։

Հայաստանի գործատուների միության նախագահ Գագիկ Մակարյանը Sputnik Արմենիայի հետ զրույցում նշեց, որ չգրանցված աշխատող ասելով` պետք է նկատի ունենալ երկու խումբ մարդկանց։ Նրա խոսքով` չգրանցված աշխատող են թե՛ նրանք, ովքեր աշխատում են, բայց գործատուն չի գրանցում նրանց, թե՛ նրանք, ովքեր օրավարձով են աշխատում` շինարարություն են անում, երեխա պահում...

«Չգրանցված աշխատողները կշարունակեն տուժել, քանի որ նրանց աջակցության համար պետությունը գործիքակազմ չունի։ Այս դեպքում կա երկու ճանապարհ. առաջինն այն է, որ պետությունը պետք է առաջարկի նրանց որպես գործազուրկ գրանցվել։ Դրանով իսկ պետությունը կլուծի նաև գործազրկության ճշգրիտ տվյալներ ունենալու հարցը»,–ասաց Մակարյանը։

Իսկ հաջորդ քայլը, ըստ նրա, պետք է լինի այն, որ այս օրերին որպես գործազուրկ գրանցվածները նպաստ ստանան։ Մակարյանի խոսքով` սա մի ձև է, որը կարող է փրկության ձեռք լինել մի շարք մարդկանց համար, քանի որ հակառակ պարագայում նրանք կարող են աղքատանալ` չկարողանալով արտակարգ դրության ավարտից հետո վճարել կոմունալներն ու այլ վարձերը։

Գործատուների միության նախագահը կարծում է` գործատուն ընդառաջ կգնա իր չգրանցված աշխատակիցներին և որոշակի գումար կտա այս մեկ ամսվա համար։ Խնդիրն այն է, որ սպասարկման կամ մեկ այլ ոլորտի աշխատակից գտնելն էլ հեշտ չէ, և գործատուն ընտրություն է կատարել աշխատանքի ընդունելիս։

«Սակայն որպեսզի գործատուն ավելի համարձակ գնա այդ քայլին, պետք է տեսնի, թե հետկորոնավիրուսային Հայաստանում ինչ է կատարվելու։ Այսինքն` պետությունն իր ռեսուրսները պետք է ուղղի այդ նպատակի համար և գուցե գործարար միջավայրին առնչվող օրենքում փոփոխություններ անի, հարկերը ժամանակավոր նվազեցնի և այլն»,–ասաց Մակարյանը` հավելելով, եթե այս անորոշությունը մնա, գործատուն չի ուզի իր աշխատողներին պահել։

Տնտեսագետ, ՀՅԴ բյուրոյի տնտեսական հետազոտությունների գրասենյակի ծրագրերի համակարգող Թադևոս Ավետիսյանն էլ նշում է` անօրինական աշխատանքի դեպքում մեղավոր են ինչպես աշխատակիցը, գործատուն, այնպես էլ պետությունը։

Նրա խոսքով` մարդիկ լավ օրից չէ, որ համաձայնում են աշխատել, թեկուզ` անօրինական սկզբունքով։ Ավելին, կան մարդիկ, որ նույնիսկ իրենց կամքին հակառակ են չգրանցված աշխատող դառնում իրենց ընտանիքները կերակրելու համար։Այսինքն` մեղավոր են գործատուները, որոնք ստիպողաբար անօրինական աշխատակից են պահում։Իսկ պետության մեղքն այն է, որ բավարար հարկային պայմաններ չեն ստեղծվել, որ մարդիկ օբյեկտիվորեն գնան դեպի օրինական աշխատանք։

«Ստացվում է` մեղավոր են երեք կողմն էլ, սակայն հարված ստանում է միայն աշխատակիցը, ինչն արդար չէ։ Նման չոր և կացնային մոտեցման պարագայում առնվազն աղքատության ցուցանիշը կկրկնապատկվի, քանի որ այդ մարդիկ և նրանց ընտանիքները պոտենցիալ աղքատներ են։ Արդարացված չէ այն մոտեցումը, որ եթե անօրինական աշխատող ես, ապա պետք է գնաս ու ինքդ էլ գլխիդ ճարը տեսնես»,–ասաց Ավետիսյանը։

Նա նույնպես կարծում է` հիմա ճիշտ ժամանակն է, որ գործազրկության դիմաց նպաստ տան մարդկանց, ինչն անում էին նախկինում։ Ավետիսյանը հայտնեց նաև, որ պետությունը գործազրկության նպաստ դադարեցրեց վճարել, քանի որ այն որևէ խնդիր չէր լուծում։ Իսկ իրականում այդ նպաստը որևէ հարց չէր լուծում, քանի որ շատ քիչ գումար էին վճարում մարդկանց։ Իսկ հիմա, ըստ Ավետիսյանի, պետք է կենսապահովման նվազագույն զամբյուղին համահունչ որոշակի գումար բաժանեն գործազուրկներին։

Վերջինս կարծում է, որ այս միջոցով պետությունը նաև կնպաստի, որ մարդիկ աշխատելիս անպայման գրանցվեն։ «Պետության ֆունկցիան չէ մարդկանցից նեղանալ և պատժել` սոցիալական որևէ աջակցություն չցուցաբերելով»,–իր խոսքն ամփոփեց մասնագետը։

Հղիները նույնպես աջակցություն կստանան. կառավարությունը ևս մեկ ծրագիր հաստատեց

Աշխատանքի և սոցիալական հարցերի նախարարի մամուլի քարտուղար Սոնա Մարտիրոսյանը հայտնեց, թե չգրանցված աշխատողները չեն մտնում կորոնավիրուսի հետևանքով տուժած ոլորտի աշխատակիցների ցանկում։ Նրա խոսքով` չկա նման գործիքակազմ հասկանալու, թե ովքեր են իսկապես չգրանցված աշխատողներ։

Հիշեցնենք, որ կորոնավիրուսի կանխարգելման նպատակով հայտարարված արտակարգ դրությունից ելնելով` այժմ Հայաստանում գործում են միայն պարենային խանութները, դեղատներն ու գյուղմթերքի շուկաները։ Սրճարանների, զվարճանքի վայրերի գործունեությունը դադարեցվել է առնվազն մինչև ապրիլի 13–ը։

597
թեգերը:
աշխատանք, գործազուրկներ, Հայաստան
Ըստ թեմայի
Բիզնեսի ճգնաժամն այսօր և 90–ականներին. «հակավիրուսային» ինչ փաթեթ կառաջակի կառավարությունը
Իշխանությունը կօգնի՞ այս օրերին աշխատանքը կորցրած վարորդներին
Երեխաները լացում են․ բազմազավակ ընտանիքները՝ առցանց ուսուցման և գոյատևելու մասին
Իրավիճակը կարող է դառնալ անվերահսկելի. Թորոսյանն ասաց` ինչ են անում դրան չհասնելու համար
 Խոշոր եղջերավոր անասուններ

Հատուկ չվերթ խոշոր եղջերավոր անասունների համար, կամ ինչու են ՀՀ-ում սկսել միս քիչ ուտել

9
(Թարմացված է 20:49 12.07.2020)
Կորոնավիրուսն ու ճգնաժամը խախտել են տնտեսագիտության բոլոր կանոնները.  անասնագլխաքանակն ավելանում է, սպառումը՝ նվազում, բայց գներն առաջվա պես շարունակում են աճել: Հայ գործարարներն էլ իրենց անասուններն Իրաք են հասցնում վրացական ինքնաթիռի հատուկ չվերթով:

ԵՐԵՎԱՆ, 12 հուլիսի - Sputnik, Նելլի Դանիելյան. Կորոնավիրուսի համավարակի ու արտակարգ դրության պայմաններում Հայաստանում նվազել են ընտանի կենդանիների մսի իրացման ծավալները:

Այս մասին են վկայում ՀՀ վիճակագրական կոմիտեի «Արդյունաբերական կազմակերպություններում հիմնական արտադրատեսակների թողարկումը բնեղեն արտահայտությամբ՝ 2020 թվականի հունվար-մայիսին» հետազոտության արդյունքները:

Դրանց համաձայն՝ մսամթերքի բոլոր տեսակների իրացումն այս տարվա 5 ամիսներին  շուրջ 5%-ով անկում է ապրել՝ նախորդ տարվա նույն ժամանակահատվածի համեմատ:

Օրինակ՝ խոշոր եղջերավոր կենդանիների թարմ և սառեցրած մսի իրացման ծավալները կրճատվել են 5.1%-ով, խոզի մսինը՝ 4.8%-ով, ոչխարինը՝ 4.7%-ով:

Թե որն է նվազման պատճառը, Էկոնոմիկայի նախարարությունում չցանկացան մեկնաբանել՝  նշելով, որ այս պահին տիրապետում են միայն 2020 թվականի հունվար-մարտ ամիսներին հանրապետությունում իրականացրած սպանդի վիճակագրական տվյալներին, որոնք նույնիսկ գերազանցում են նախորդ տարվա ցուցանիշները:

Իսկ, օրինակ, թռչնամսի առևտուրը, հակառակը՝ այս տարի ավելացել է 15%-ով: Պատճառն, ամենայն հավանականությամբ, դրա համեմատաբար էժան գինն է:

«Սպանդի համար իրացվել է 15.900 տոննա (կենդանի քաշով) գյուղատնտեսական կենդանի և թռչուն, որը 5.3%-ով գերազանցում է նախորդ տարվա նույն ժամանակահատվածում արձանագրված ցուցանիշին»,- նշված է նախարարության՝ Sputnik Արմենիային ուղղված պատասխանում:

Քաղաքակրթությունն ու գյուղացու կորցրած շահույթը. սպանդանոցների չերևացող կողմը

Աճը, թերևս, բացատրվում է նրանով, որ նախարարությունում ընտանի կենդանիների ու թռչնամսի իրացման ծավալների հաշվարկը ներկայացված է մեկ ցուցանիշով: Արդյունքում՝ թռչնամսի 15%-անոց աճը «ծածկում» է մնացած տեսակների անկումը, և վիճակագրությունն ստացվում է դրական ցուցանիշով:

Իսկ 2020 թվականի՝ ըստ կենդանատեսակների մսի արտադրության ծավալների վերաբերյալ տեղեկությունը, Էկոնոմիկայի նախարարությունը խորհուրդ է տալիս փնտրել արդեն հաջորդ տարի՝ 2021-ին, հրապարակվող Հայաստանի վիճակագրական տարեգրքում։

Պետական մարմինների հրապարակած թվերի տարբերությունը «Ագրարագյուղացիական միավորում» հասարակական կազմակերպության նախագահ Հրաչ Բերբերյանը մեկնաբանում է տեղեկությունների հավաքագրման ոչ վստահելի ու վաղուց իրեն սպառած մեթոդաբանությամբ:

Բանն այն է, որ Հայաստանում առկա անասնագլխաքանակի մասին վիճակագրությունը «վերևներին»  տալիս են գյուղապետերը:

«Կարծում եմ, որ գյուղապետերի ինստիտուտն արատավոր է, և գյուղապետերն իրավունք չունեն վիճակագրություն ներկայացնելու: Նրանք ներկայացնում են մարզպետարաններ, մարզպետներն էլ, բնական է, որ պետք է ավելի լավ թվեր նկարեն ու ներկայացնեն, որ վարչապետի ձեռքը չընկնեն: Արդյունքում՝ ունենում ենք ոչ վստահելի ու անիրական վիճակագրություն»,- ասաց Բերբերյանը:

Նրա համոզմամբ՝ հաշվետվությունը պետք է ներկայացնեն արտադրողները և դրա դիմաց ստանան համապատասխան աջակցություն պետությունից՝ անասնապահության տվյալ ուղղությունը զարգացնելու ծրագրերի կամ սուբսիդիայի տեսքով:

Գործող մեխանիզմի պայմաններում, Բերբերյանի դիտարկմամբ, տնտեսագիտության բոլոր իրողությունները խախտվում են. անասնագլխաքանակն ավելանում է, սպառումը՝  նվազում, բայց գներն առաջվա պես շարունակում են աճել:

Կենդանիների մորթը տարիներ շարունակ իրականացվել է հակասանիտարական պայմաններում. Պետրոսյան

Տնտեսագիտական օրենքներին հակասող այս իրավիճակն իրականում հասկանալու համար Բերբերյանը ոլորտի պատասխանատուներին առաջարկում է անձամբ գնալ գյուղեր ու տեղում պարզել, թե որքանով է իրականում պակասել անասնագլխաքանակը Հայաստանում ու ինչու ժողովուրդը միս չի գնում:

Ստեղծված խառնաշփոթի պատճառը, սակայն, ըստ Բերբերյանի, միայն  վիճակագիրները չեն: Նրա խոսքով՝ միսը թանկացել է, որովհետև Հայաստանում թանկացել է անասնակերը:

Իսկ կորոնավիրուսն ու տնտեսական ճգնաժամն իրենց հերթին ազդել են սպառողների վճարունակության վրա:

«Այսօր մոնիթորինգ ենք արել Երևանի շուկաներից մեկում: 2-3 օրվա միսը չի վաճառվել»,- հայտնեց ՀԿ նախագահը:

Մեծապես կրճատվել է նաև հանրային սննդի կետերի կողմից տարվա այս եղանակին սպառվող մսի ծավալը, ինչը ևս լրացուցիչ խնդիր է ոլորտի արտադրողների համար:

Բայց կա մի հետաքրքիր իրողություն ևս. պարզվում է՝ կորոնավիրուսի հետևանքով փակ սահմանները Հայաստանից արտահանվող մսի ծավալների վրա էապես չեն ազդել: Նույնիսկ այս իրավիճակում հայ գործարարները գտնում են իրենց արտադրանքն արտերկիր հասցնելու ուղիներ:

Վերջերս նման մի հետաքրքիր տեղեկություն չվրիպեց նաև Sputnik Արմենիայի ուշադրությունից: Մեր տեղեկություններով՝ հունիսի 28-ին Հայաստանում  վայրէջք  է կատարել Իրաքից ժամանած բեռնատար ինքնաթիռ, որը որոշ ժամանակ անց՝ արդեն բեռնված, Հայաստանից ուղղություն է վերցրել դեպի Իրաք:

ՀՀ քաղաքացիական ավիացիայի կոմիտեից հաստատեցին այս տեղեկությունը:

Ներում–բեկում չի լինելու. սուպերմարկետներն ու սննդի կետերը միսը կգնեն միայն սպանդանոցներից

Պարզվեց, որ հունիսի 28-ին Իրաքի Սուլեյմանիի օդանավակայանից Երևանի «Զվարթնոց» օդանավակայանում վայրէջք է կատարել վրացական «Easy Charter LLC» ավիաընկերության բեռնատար օդանավը, որն, ի դեպ, Հայաստան է եկել դատարկ: Իսկ արդեն «Զվարթնոց» օդանավակայանից, ըստ ներկայացված փաստաթղթերի, Իրաքի Սուլեյմանիի օդանավակայան է տեղափոխել 38 տոննա խոշոր եղջերավոր անասուն:

Իրացման այս ծավալների մասին վիճակագրական հաշվարկներում առայժմ տեղեկություն չկա: Հունիս ամսվա տնտեսական տվյալները պաշտոնական ամփոփագրերում դեռ ներառված չեն:

 

9
թեգերը:
չվերթ, Միս, Հրաչ Բերբերյան, անասնակեր, Հայաստան
Ըստ թեմայի
ՄԻՊ–ը կզբաղվի անասնաբույծների բարձրացրած խնդիրներով
Մսամթերքն ու շաքարավազն էժանացել են. գները Հայաստանում
Կառավարությունը գյուղացուն առաջարկում է խելացի անասնագոմեր կառուցել
«Խելացի անասնատուն» անվանումն աբսուրդ է և զավեշտի է հասցնում գաղափարը. Հովհաննիսյան
Միքայել Մինասյան

Նիկոլ Փաշինյանը պատերազմ է հայտարարել Հայ առաքելական եկեղեցուն. Միքայել Մինասյան

23
(Թարմացված է 21:05 12.07.2020)
Միքայել Մինասյանը Facebook-յան տեսաուղերձի միջոցով պատասխանել է իր հետևորդների հարցերին: Անդրադարձ է եղել նաև հայաստանյայց եկեղեցու շուրջ ընթացող զարգացումներին:

ԵՐԵՎԱՆ, 12 հուլիսի - Sputnik. ՀՀ պաշտոնաթող նախագահ Սերժ Սարգսյանի փեսա, Վատիկանում Հայաստանի նախկին դեսպան Միքայել Մինասյանը շարունակում է Facebook-ի իր էջում տեսաուղերձների շարքը։ Այս անգամ նա որոշել էր արդեն բացօթյա պատշգամբից պատասխանել օգտատերերի՝ իրեն ուղղված հարցերին։ Տեսանյութի նկարագրությունում նա ասաց, որ վերջին երկու շաբաթում ստացել է բազմաթիվ հարցեր, որոնց հիմքում մարդկանց նեղացվածությունն ու կասկածն է «Ստի վերջը» շարքի դադարեցման կապակցությամբ:

Պատասխանելով օգտատերերից մեկի՝ հայաստանյայց եկեղեցուն վերաբերող հարցին, Մինասյանը նշեց, որ հետևում է կատարվող իրադարձություններին, և դրանք որակեց որպես «պատերազմ»։

«Նիկոլ Փաշինյանը պատերազմ է հայտարարել Հայ առաքելական եկեղեցուն։ Օգտագործելով արդեն ավելի քան տասը տարիների աշխատանքի արդյունքները, որ Հայ առաքելական եկեղեցու եպիսկոպոսները վատն են, կաշառակեր են և այլն, և օգտվելով մարդկանց՝ երևի թե հաճախ օբյեկտիվ զայրույթից, նա քանդում է եկեղեցին և դա անում է անթաքույց»,- հայտարարեց Մինասյանը՝ հավելելով, որ դա Փաշինյանը հետևողական իրականացնում է «իր պատվիրատուների պատվերը»։

Միքայել Մինասյանը բացատրեց` ինչու է «կուխնուց» ելույթ ունենում. տեսանյութ

Մինասյանի պնդմամբ՝ Փաշինյանը պայքարում է եկեղեցու դեմ, որը շատ լավ գիտի՝ հայ հասարակությունը հենման երեք բևեռ ունի՝ լեզուն, պատմությունն ու հիշողությունը, որի հիմքում եկեղեցին է, ընդ որում՝ կապ չունի՝ հավատացյալ ես, թե ոչ։

Նա ցավով արձանագրեց, որ այդ գործում ՀՀ վարչապետին օգնում են հենց եկեղեցականները, որոնք ձևացնում են, թե դա իրենց չի վերաբերում, թող ուրիշները պայքարեն։ Մինասյանի կարծիքով՝ եկեղեցին պետք է արձագանքի, որովհետև սա ազգային ազատագրական պայքար է, որը պետք է ղեկավարի հենց եկեղեցին։

«Իրենք անթաքույց զբաղված են հայերին ատելով։ Իրենք անթաքույց զբաղված են պետությունն ու հասարակությունը քանդելով։ Իրենք ստեղծում են Նոր Հայաստան։ Այո, այդ մի հարցում նրանք ազնիվ են»,- ընդգծեց Մինասյանը՝ նշելով, որ Նոր Հայաստանում ստեղծվում է նոր հայի տեսակ, որը չպետք է ունենա հայրենիք, որովհետև նոր հայի տեսակը ֆեյսբուքահայաստանն է։

Նշենք, որ հետախուզման մեջ գտնվող Միքայել Մինասյանը՝ իր «Ստի վերջը» խորագրով տեսանյութերից մեկում հայտարարել էր, որ Փաշինյանի կինը` Աննա Հակոբյանն ու նրա եղբայրը՝ Հրաչյա Հակոբյանը, ներգրավված են ծխախոտի մաքսանենգության գործում։

23
թեգերը:
Հայ Առաքելական Եկեղեցի, Եկեղեցի, Միքայել Մինասյան
Ըստ թեմայի
Միքայել Մինասյանի տեղեկությունն անիրական է․ ոստիկանությունը ստուգումներ է կատարել
Միքայել Մինասյանը նոր մեղադրանք ներկայացրեց Նիկոլ Փաշինյանին ու Աննա Հակոբյանին
Միքայել Մինասյանի համակարգչի վերականգնված ֆայլերը կուսումնասիրվեն. մեղադրանքը հիմք է
Միքայել Մինասյանի մեղադրանքն ավելացվել է նոր բացահայտումներով. «Սպայկան» և Ռոզա Ստեփանյանը