«Օֆշորի» հայտնի գործը նոր ընթացք է ստանում. գործարարին նորից կկալանավորե՞ն
(Թարմացված է 16:26 11.03.2020)
Աշոտ Սուքիասյանի պաշտպան Լուսինե Զեյնալյանը գործի նոր ընթացքից որոշ մանրամասներ է հայտնել լրագրողներին։ԵՐԵՎԱՆ, 11 մարտի — Sputnik. «Օֆշորի» հայտնի գործով կալանավայրում հայտնված ադամանդագործ, գործարար Աշոտ Սուքիասյանի ազատ արձակվելուց հետո տուժող կողմը՝ Փայլակ Հայրապետյանը, դիմել է Վճռաբեկ դատարան: Լրագրողների հետ հանդիպման ժամանակ Սուքիասյանի պաշտպան Լուսինե Զեյնալյանը հայտնեց՝ բողոքն անհիմն է:
Տեղեկացրել էինք, որ Վերաքննիչ դատարանի որոշմամբ այս տարվա հունվարի 31-ին ազատ է արձակվել հայտնի գործարար Աշոտ Սուքիասյանը: Նրան դեռ 2017թ.-ի հոկտեմբերի 2-ին Առաջին ատյանի դատարանը մեղավոր էր ճանաչել և դատապարտել 16 տարվա ազատազրկման: Դատարանը որոշել էր վերջինից բռնագանձել 8 մլրդ 919 մլն դրամ՝ հօգուտ գործով տուժող գործարար Փայլակ Հայրապետյանի, և 632 մլն 403 հազար դրամ՝ հօգուտ Հայրապետյանի որդու:
«Փայլակ Հայրապետյանի պաշտպանական կողմի բողոքները հիմնավորված չեն, քանի որ փաստարկներ, պատճառաբանություններ չկան, թե ինչու են դեմ Առաջին ատյանի դատարանի որոշմանը: Բացի այդ, մենք բացարկ ենք հայտնել Վճռաբեկ դատարանի կազմին, քանի որ տեղի դատավորներից որոշները կապեր ունեն Փայլակ Հայրապետյանի հետ»,-ասաց Լուսինե Զեյնալյանը:
Փաստաբանը հայտնեց՝ իրենք ուսումնասիրություն են կատարել ու պարզել՝ Վճռաբեկ դատարանի երկու դատավոր փոխկապակցված են Փայլակ Հայրապետյանի հետ: Տարիներ առաջ, ըստ Զեյնալյանի, Հայրապետյանի որդին՝ Հայրապետ Հայրապետյանը, աշխատել է այդ դատավորների հետ: Փաստաբանը հայտնեց, որ խոսքը, մասնավորապես, Վճռաբեկ դատարանի դատավոր Լիլիթ Թադոսյանի և նրա հոր` Զելիմ Թադևոսյանի մասին է:
Զեյնալյանը նշեց, որ Աշոտ Սուքիասյանի դեմ այս քրեական գործերը միայն մեկ նպատակ ունեն՝ նրան դուրս բերել բիզնեսից: «Սուքիասյանի դեմ այս արշավը տեղի է ունեցել Փայլակ Հայրապետյանի հետ պայմանավորվածությամբ, որպեսզի նա մտներ Սուքիասյանի բիզնեսի մեջ, նրա բիզնեսը տապալեր: Ավելին, երբ ՀՀ երրորդ նախագահ Սերժ Սարգսյանի եղբորորդին՝ Նարեկ Սարգսյանը, նշանադրվեց Հայրապետյանի եղբոր թոռնուհու հետ, դրանից հետո ավելի ակտիվ գործունեություն սկսվեց Սուքիասյանի դեմ»,-ասաց պաշտպանը:
Կրակոցներ են արձակել «Հայաստան» հանրախանութի սեփականատիրոջ տղայի մեքենայի ուղղությամբ
Զեյնալյանի խոսքով՝ երբ այս տարի վերջապես վերականգնվել է Սուքիասյանի նկատմամբ արդարությունը, հիմա նորից փորձում են նրան «կոտրել»: Պաշտպանը հայտնեց նաև, որ չնայած այս ամենին Սուքիասյանը չի կաշկանդվել և շարունակելու է բիզնեսի ոլորտում իր գործունեությունը:
Նշենք, որ Սուքիասյանի գործով Վճռաբեկ բողոքի քննության օրը դեռ հայտնի չէ:
ՀՔԾ-ն հաստատեց` Միհրան Պողոսյանի օֆշորային գործը վերաբացվել է
Հիշեցնենք՝ Աշոտ Սուքիասյանին մեղադրանք էր առաջադրվել խարդախության, փողեր լվանալու և հարկերից խուսափելու համար: Ըստ առաջադրված մեղադրանքի՝ Փայլակ Հայրապետյանին և նրա որդուն պատկանող գույքի գրավադրումից` 2010թ. հունիսի 25-ից մինչև 2011-ի հունիսի 15-ը,Սուքիասյանն «Ամերիաբանկ» ՓԲ-ից ստացել է 10 մլն 700 հազար ԱՄՆ դոլարի վարկ, սակայն չի կատարել վարկային պայմանագրով նախատեսված պարտավորությունները:
Օնիկ Գասպարյանը շարունակում է մնալ ԶՈւ բարձրագույն զինվորական հրամանատարը. Գլխավոր շտաբ
(Թարմացված է 12:24 03.03.2021)
ՀՀ ԶՈւ գլխավոր շտաբը նոր հայտարարություն է տարածել՝ անդրադառնալով ԳՇ պետի ազատման՝ վարչապետի միջնորդության հետ կապված իրավիճակին։ԵՐԵՎԱՆ, 3 մարտի - Sputnik. ՀՀ ԶՈւ գլխավոր շտաբը նոր հայտարարություն է տարածել՝ անդրադառնալով ԳՇ պետի ազատման՝ վարչապետի միջնորդության ու նախագահ Արմեն Սարգսյանի՝ մարտի 2-ին կայացրած որոշման հետ կապված իրավիճակին։
Նախագահը հայտարարել է Սահմանադրության 139-րդ հոդվածի 2-րդ մասի 2-րդ նախադասությամբ սահմանված իմպերատիվ երկու պահանջներից երկրորդի կատարման մտադրության՝ առանձին դիմումով Սահմանադրական դատարան դիմելու մասին, հիմքը՝ Սահմանադրության 169-րդ հոդվածի 1-ին մասի 4-րդ կետը։
Սահմանադրական դատարանի լիազորությունները սահմանված են Սահմանադրության 168-րդ հոդվածով, որով վերաբերելի կետն առաջինն է, օրենքի համապատասխանությունը որոշելը։ Սահմանադրության 168-րդ հոդվածով Նախագահի հրամանագրի նախագծի սահմանադրականության կամ ՀՀ ԶՈՒ ԳՇ պետին պաշտոնից ազատման հարց լուծելու իրավասություն Սահմանադրական դատարանը չունի, այսինքն՝ Նախագահը վերաբերելիի մասով կարող է դիմել Սահմանադրական դատարան բացառապես «Զինվորական ծառայության և զինծառայողի կարգավիճակի մասին» 2017թ. նոյեմբերի 15-ի ՀՀ օրենքի (այսուհետ՝ Օրենք)՝ որպես նախագծի իրավական հիմքի՝ Սահմանադրությանը համապատասխանելու հարցը որոշելու խնդրանքով և ոչ կոնկրետ օրենքի հոդվածի կամ մասի։
Սահմանադրական դատարան դիմելու ժամկետ Սահմանադրության 139-րդ հոդվածի 2-րդ մասի 2-րդ նախադասությամբ և վերաբերող մասով Սահմանադրությամբ ընդհանրապես սահմանված չէ։ Վերաբերող մասով ժամկետները սահմանված են Օրենքի 35․1-րդ հոդվածի 3-րդ մասով՝ հրամանագրի նախագծի վերադարձից հետո 8 օր (ազատման հիմք Օրենքի 40-րդ հոդվածի 3-րդ մասը հղում է նշանակման կարգին)։
Հայտարարությամբ Նախագահը գործել է և հայտնել է մտադրությունը գործելու Սահմանադրությանը բացառապես համապատասխան։
ՀՀ ԶՈՒ գլխավոր շտաբի պետ, գեներալ-գնդապետ Օնիկ Վիկտորի Գասպարյանը մինչև 8-օրյա ժամկետի լրանալը (Նախագահի կողմից Սահմանադրական դատարան դիմելուց հետո սկսում են գործել այլ ժամկետներ) շարունակում է իր ծառայությունը հայրենիքին և ժողովրդին, հանդիսանում է Զինված ուժերի բարձրագույն զինվորական հրամանատարը։
Հանրահավաքի ժամանակ հնարավոր են սադրանքներ․ ՀՀ ոստիկանություն
(Թարմացված է 12:10 03.03.2021)
Ոստիկանությունը կոչ է անում զերծ մնալ հակաիրավական քայլերից ու չտրվել սադրանքների։
ԵՐԵՎԱՆ, 3 մարտի - Sputnik. ՀՀ ոստիկանությունում տվյալներ են ստացվել, որ մարտի 3-ի ժամը 16.00-ին նախատեսված հանրահավաքի ժամանակ հնարավոր են սադրանքներ։ Տեղեկությունը հայտնում են ոստիկանության մամուլի ծառայությունից։
«Կոչ ենք անում զանգվածային միջոցառումներն իրականացնել բացառապես օրենքի շրջանակներում, զերծ մնալ հակաիրավական քայլերից ու չտրվել սադրանքների։ Քաղաքացիներին հորդորում ենք լինել իրավահարգ և իրենց իրավունքներն իրացնելիս պահպանել օրինականության պահանջներն ու համակեցության կանոնները»,-նշված է հաղորդագրության մեջ։
Ոստիկանությունը հավաստիացնում է, որ օրենքով իրեն վերապահված լիազորությունների շրջանակում ձեռնարկելու է բոլոր միջոցները՝ հասարակական կարգն ապահովելու և հանրային անվտանգությունը պահպանելու համար։
Ներքաղաքական իրավիճակը Հայաստանում սրվեց այն բանից հետո, երբ ՀՀ ԶՈւ Գլխավոր շտաբը փետրվարի 25-ին պահանջեց ՀՀ վարչապետ Նիկոլ Փաշինյանի հրաժարականը, ասելով, որ քաղաքական ղեկավարությունը պետությունը տանում է դեպի վտանգավոր սահմանագիծ։ Դա տեղի ունեցավ այն բանից հետո, երբ վարչապետը պաշտոնից հեռացրեց Գլխավոր շտաբի պետի առաջին տեղակալ Տիրան Խաչատրյանին։
Օնիկ Գասպարյանը պետք է հեռանա. ըստ Փաշինյանի` ո՞րն է ԳՇ պետի դավաճանությունը
Ի պատասխան Նիկոլ Փաշինյանը հայտարարեց ռազմական հեղաշրջման փորձի մասին և քաղաքացիներին կոչ արեց հավաքվել Հանրապետության հրապարակում՝ «հեղափոխությունը պաշտպանելու» համար։
Նա հայտնեց նաև, որ ստորագրել է Գլխավոր շտաբի պետ Օնիկ Գասպարյանին պաշտոնից հեռացնելու փաստաթուղթը, որը, սակայն, ՀՀ նախագահ Արմեն Սարգսյանը չստորագրեց և հետ ուղարկեց փետրվարի 27–ին։ Նույն օրը վարչապետը կրկին առաջարկությունն ուղարկեց ՀՀ նախագահին։
Գլխավոր շտաբը մարտի 1-ին նոր հայտարարություն տարածեց նշելով, որ կրկին հաստատում է ստեղծված իրավիճակի վերաբերյալ իր գնահատականները և շեշտում, որ, անկախ Զինված ուժերը քաղաքական գործընթացների մեջ ներքաշելու փորձերից, մնում Է անդրդվելի, կշռադատված և հաստատակամ։