Իտալացիները խաբեցին. ինչպես են հայերը Իտալիայի «կարմիր գոտու» գերին դարձել
(Թարմացված է 09:23 11.03.2020)
Հայ զբոսաշրջիկների և Իտալիայի հյուրանոցային համալիրների ներկայացուցիչների միջև «ճակատամարտ» է սկսվել. պատճառը կորոնավիրուսն է։ԵՐԵՎԱՆ, 11 մարտի — Sputnik, Լաուրա Սարգսյան. Իտալիայի մի շարք հյուրանոցների ղեկավարներ հրաժարվում են վերադարձնել հայ զբոսաշրջիկների չեղարկված ամրագրումների գումարը։ Բանն այն է, որ զբոսաշրջիկները չեն կարողանում Իտալիա գնալ ոչ թե անձնական պատճառներով, այլ երկրում կորոնավիրուսի բռնկման հետևանքով։ Այդ մասին Sputnik Արմենիայի թղթակցի հետ զրույցում ասաց Any Wish Tour տուրիստական գործակալության տնօրեն Ալինա Պետրոսյանը։
©
Sputnik / Aram Nersesyan
Իտալիան այս պահին կորոնավիրուսից մահացությունների թվով առաջինն է։ Վերջին տվյալներով` երկրում վարակվել է 9172 մարդ։ Երկրում կարանտին է հայտարաված և սահմանված է «կարմիր գոտի», ըստ որի` մարդկանց տեղաշարժը սահմափակվում է ոչ միայն Իտալիա ժամանողների և Իտալիայից մեկնողների դեպքում, այլև երկրի ներսում։
«Մեր հաճախորդները, որոնք դեռ նախքան հայտնի իրադարձությունները հյուրանոցներում համարներ էին ամրագրել, հայտնվել են անելանելի իրավիճակում։ Նրանք չեն կարող Իտալիա գնալ կորոնավիրուսի պատճառով, իսկ հյուրանոցները հրաժարվում են վերադարձնել չեղարկված ամրագրումների գումարը»,–ասաց նա։
Նրա խոսքով` հյուրանոցների կառավարիչները անորոշ հայացքով ձեռքերն են տարուբերում։ Սակայն գոյություն ունի հստակ կանոն. եթե քաղաքացիները չեղարկում են նախատեսված ճամփորդությունը արտակարգ կամ ֆորս–մաժորային իրավիճակի (բնական աղետներ, համաճարակ, երկրաշարժ և այլն) հետևանքով, ապա զբոսաշրջիկին պարտավոր են վերադարձնել նրա գումարը։ Պետրոսյանը նշեց, որ այս պահին խոսքը ոչ թե մի քանի հարյուր, այլ մի քանի հազար եվրոյի մասին է։
Կորոնավիրուսի պատճառով Երևանում ուկրաինական ջրային կրկեսի շոու ծրագիրը կհետաձգվի
«Մեր զբոսաշրջիկները իրենց ցանկությամբ չէ, որ չեն ուզում Իտալիա գնալ, ինչն արմատապես փոխում է իրավիճակը»,– շեշտեց Պետրոսյանը։
Նմանատիպ իրավիճակ է նաև դեպի Հայաստան չվերթներ իրականացնող ավիաընկերությունների շրջանում։ Պետրոսյանը պատմեց, որ այս պահին ստիպված են բառացիորեն «պատերազմել» LOT ավիաընկերության հետ։ Ընկերությունը հրաժարվում է վերադարձնել մի քաղաքացու տոմսի գումարը, որը պետք է Հայաստան ժամաներ իրենց չվերթով, սակայն նրա մոտ կորոնավիրուս են հայտնաբերել։ LOT–ն առաջարկում է ուղևորության ամսաթիվը փոխել։
«Նա զբոսաշրջիկ չէ, որը կարող է սպասել իրավիճակի փոփոխության, այդ մարդը միջոցառման է հրավիրված»,– հավելեց Պետրոսյանը։
«Իրազեկ և պաշտպանված սպառող» ՀԿ նախագահ Բաբկեն Պիպոյանն իր հերթին կարծում է, որ ստեղծված իրավիճակում հարցի լուծման համար ժամանակ է պետք, չնայած որ խախտվում են զբոսաշրջիկների իրավունքները։
Sputnik Արմենիայի թղթակցի հետ զրույցում Պիպոյանը ընդգծեց, որ ստեղծված իրավիճակում ՀՀ կառավարությունը չի կարող Իտալիայի իշխանություններին ստիպել մի կողմ դնել սեփական քաղաքացիների խնդիրները և զբաղվել հայ զբոսաշրջիկների հարցերով։
«Հարցը կարելի է բարձրացնել այն բանից հետո, երբ Իտալիայում հաստատուն իրավիճակ կլինի։ Հուսով եմ` իշխանությունները կհամագործակցեն իտալացի գործընկերների հետ և իրավիճակից ելք կգտնեն»,–ասաց Պիպոյանը։
Ըստ նրա` վիճակն իրոք բարդ է. հյուրանոցները կարող են հայտարարել, որ իրենք մեղք չունեն, քանի որ իրենք պատրաստ են դիմավորել զբոսաշրջիկներին, իսկ փակ սահմանների համար պատասխանատվությունը իշխանության վրա է։
ՀՀ Զբոսաշրջության կոմիտեում նույնպես իրավիճակը բավական բարդ են որակում։
«Դժվարին խնդիր է, և մենք լուծման ուղիներ ենք փնտրում։ Որոշակի ժամանակ է անհրաժեշտ»,–պնդում են այստեղ։
Կորոնավիրուսն ու զբոսաշրջությունը․ չեղարկված ուղևորությունների վնասները Հայաստանում
Նշենք, որ ՀՀ ԱԳՆ–ն Իտալիայում գտնվող ՀՀ քաղաքացիներին կոչ է արել վերադառնալ հայրենիք։ Առողջապահության նախարարությունը ևս հորդորել է զերծ մնալ կորոնավիրուսով վարակման ռիսկ ներկայացնող երկրներ այցելություններից, իսկ այնտեղից վերադարձած քաղաքացիներին` 14 օրվա ընթացքում սահմանափակել շփումները և ինքնամեկուսացվել։ Գործատուները պարտավոր են այդպիսի աշխատակցին հեռավար աշխատանքով ապահովել։
թեգերը:
Օնիկ Գասպարյանը շարունակում է մնալ ԶՈւ բարձրագույն զինվորական հրամանատարը. Գլխավոր շտաբ
(Թարմացված է 12:24 03.03.2021)
ՀՀ ԶՈւ գլխավոր շտաբը նոր հայտարարություն է տարածել՝ անդրադառնալով ԳՇ պետի ազատման՝ վարչապետի միջնորդության հետ կապված իրավիճակին։ԵՐԵՎԱՆ, 3 մարտի - Sputnik. ՀՀ ԶՈւ գլխավոր շտաբը նոր հայտարարություն է տարածել՝ անդրադառնալով ԳՇ պետի ազատման՝ վարչապետի միջնորդության ու նախագահ Արմեն Սարգսյանի՝ մարտի 2-ին կայացրած որոշման հետ կապված իրավիճակին։
Նախագահը հայտարարել է Սահմանադրության 139-րդ հոդվածի 2-րդ մասի 2-րդ նախադասությամբ սահմանված իմպերատիվ երկու պահանջներից երկրորդի կատարման մտադրության՝ առանձին դիմումով Սահմանադրական դատարան դիմելու մասին, հիմքը՝ Սահմանադրության 169-րդ հոդվածի 1-ին մասի 4-րդ կետը։
Սահմանադրական դատարանի լիազորությունները սահմանված են Սահմանադրության 168-րդ հոդվածով, որով վերաբերելի կետն առաջինն է, օրենքի համապատասխանությունը որոշելը։ Սահմանադրության 168-րդ հոդվածով Նախագահի հրամանագրի նախագծի սահմանադրականության կամ ՀՀ ԶՈՒ ԳՇ պետին պաշտոնից ազատման հարց լուծելու իրավասություն Սահմանադրական դատարանը չունի, այսինքն՝ Նախագահը վերաբերելիի մասով կարող է դիմել Սահմանադրական դատարան բացառապես «Զինվորական ծառայության և զինծառայողի կարգավիճակի մասին» 2017թ. նոյեմբերի 15-ի ՀՀ օրենքի (այսուհետ՝ Օրենք)՝ որպես նախագծի իրավական հիմքի՝ Սահմանադրությանը համապատասխանելու հարցը որոշելու խնդրանքով և ոչ կոնկրետ օրենքի հոդվածի կամ մասի։
Սահմանադրական դատարան դիմելու ժամկետ Սահմանադրության 139-րդ հոդվածի 2-րդ մասի 2-րդ նախադասությամբ և վերաբերող մասով Սահմանադրությամբ ընդհանրապես սահմանված չէ։ Վերաբերող մասով ժամկետները սահմանված են Օրենքի 35․1-րդ հոդվածի 3-րդ մասով՝ հրամանագրի նախագծի վերադարձից հետո 8 օր (ազատման հիմք Օրենքի 40-րդ հոդվածի 3-րդ մասը հղում է նշանակման կարգին)։
Հայտարարությամբ Նախագահը գործել է և հայտնել է մտադրությունը գործելու Սահմանադրությանը բացառապես համապատասխան։
ՀՀ ԶՈՒ գլխավոր շտաբի պետ, գեներալ-գնդապետ Օնիկ Վիկտորի Գասպարյանը մինչև 8-օրյա ժամկետի լրանալը (Նախագահի կողմից Սահմանադրական դատարան դիմելուց հետո սկսում են գործել այլ ժամկետներ) շարունակում է իր ծառայությունը հայրենիքին և ժողովրդին, հանդիսանում է Զինված ուժերի բարձրագույն զինվորական հրամանատարը։
Հանրահավաքի ժամանակ հնարավոր են սադրանքներ․ ՀՀ ոստիկանություն
(Թարմացված է 12:10 03.03.2021)
Ոստիկանությունը կոչ է անում զերծ մնալ հակաիրավական քայլերից ու չտրվել սադրանքների։
ԵՐԵՎԱՆ, 3 մարտի - Sputnik. ՀՀ ոստիկանությունում տվյալներ են ստացվել, որ մարտի 3-ի ժամը 16.00-ին նախատեսված հանրահավաքի ժամանակ հնարավոր են սադրանքներ։ Տեղեկությունը հայտնում են ոստիկանության մամուլի ծառայությունից։
«Կոչ ենք անում զանգվածային միջոցառումներն իրականացնել բացառապես օրենքի շրջանակներում, զերծ մնալ հակաիրավական քայլերից ու չտրվել սադրանքների։ Քաղաքացիներին հորդորում ենք լինել իրավահարգ և իրենց իրավունքներն իրացնելիս պահպանել օրինականության պահանջներն ու համակեցության կանոնները»,-նշված է հաղորդագրության մեջ։
Ոստիկանությունը հավաստիացնում է, որ օրենքով իրեն վերապահված լիազորությունների շրջանակում ձեռնարկելու է բոլոր միջոցները՝ հասարակական կարգն ապահովելու և հանրային անվտանգությունը պահպանելու համար։
Ներքաղաքական իրավիճակը Հայաստանում սրվեց այն բանից հետո, երբ ՀՀ ԶՈւ Գլխավոր շտաբը փետրվարի 25-ին պահանջեց ՀՀ վարչապետ Նիկոլ Փաշինյանի հրաժարականը, ասելով, որ քաղաքական ղեկավարությունը պետությունը տանում է դեպի վտանգավոր սահմանագիծ։ Դա տեղի ունեցավ այն բանից հետո, երբ վարչապետը պաշտոնից հեռացրեց Գլխավոր շտաբի պետի առաջին տեղակալ Տիրան Խաչատրյանին։
Օնիկ Գասպարյանը պետք է հեռանա. ըստ Փաշինյանի` ո՞րն է ԳՇ պետի դավաճանությունը
Ի պատասխան Նիկոլ Փաշինյանը հայտարարեց ռազմական հեղաշրջման փորձի մասին և քաղաքացիներին կոչ արեց հավաքվել Հանրապետության հրապարակում՝ «հեղափոխությունը պաշտպանելու» համար։
Նա հայտնեց նաև, որ ստորագրել է Գլխավոր շտաբի պետ Օնիկ Գասպարյանին պաշտոնից հեռացնելու փաստաթուղթը, որը, սակայն, ՀՀ նախագահ Արմեն Սարգսյանը չստորագրեց և հետ ուղարկեց փետրվարի 27–ին։ Նույն օրը վարչապետը կրկին առաջարկությունն ուղարկեց ՀՀ նախագահին։
Գլխավոր շտաբը մարտի 1-ին նոր հայտարարություն տարածեց նշելով, որ կրկին հաստատում է ստեղծված իրավիճակի վերաբերյալ իր գնահատականները և շեշտում, որ, անկախ Զինված ուժերը քաղաքական գործընթացների մեջ ներքաշելու փորձերից, մնում Է անդրդվելի, կշռադատված և հաստատակամ։