ԵՐԵՎԱՆ, 7 մարտի — Sputnik. Երևանի քաղաքապետարանը պատրաստ է 3 մլն դրամ վճարել Ազատության հրապարակի շրջակայքի վերականգնման ու բարեկարգման նախագիծ ներկայացնողին։ Այդ նպատակով հայտարարված բաց մրցույթի մասին Facebook-ի իր էջում գրել է Երևանի քաղաքապետ Հայկ Մարությանը։
«Մրցույթի նպատակներից է քաղաքային նշանակության հանգստի գոտու գեղագիտական գրավիչ միջավայրի, քաղաքացիների հանգստի համար էկոլոգիապես կայուն, հարմարավետ տարածության ստեղծումը՝ ամրագրելով այն որպես հետագա կապիտալ կառուցապատումներին զերծ, անձեռնմխելի տարածք»,– գրում է Մարությանը։
Մրցույթ անցկացնելու որոշումը Երևանի քաղաքապետն ընդունել է մարտի 5-ին։
Որոշման համաձայն` մրցույթին ներկայացված առաջարկների քննարկումը, գնահատումը, որոշման ընդունումը կատարվելու է գաղտնի ընթացակարգով և միայն հաղթողին որոշելուց հետո է բացահայտվելու նրա ով լինելը։
Որպես մրցութային աշխատանքի նախապայման` քաղաքապետարանը հեղինակներին առաջարկում է ապամոնտաժել Ազատության հրապարակի ասֆալտապատ ծածկը և դրա փոխարեն նախատեսել սալահատակ։
Իսկ կանաչ գոտիներում առաջարկվում է նախատեսել հետիոտնային անցումներ ու ճեմուղիներ, բայց կանաչ ծածկույթը պետք է հնարավորինս մեծ լինի։
Տարածքում պետք է ապահովվի նաև հաշմանդամություն ունեցող խմբերի տեղաշարժման մատչելիությունը։
Ի՞նչ տեսք կունենա Մարտի 1-ի զոհերի հիշատակը հավերժացնող հուշարձանը. հաղթողին որոշել են
Կարապի լճի վերակառուցման առաջարկում պետք է հաշվի առնվի լիճը շրջակա միջավայրի հետ կապելու, նրա ներկա տեսքը պահպանելու պայմանը։
Մրցութային աշխատանքների ներկայացման համար տրամադրվում է 40 օր։
Մրցութային հանձնաժողովը ղեկավարելու է Երևանի քաղաքապետը, քաղաքապետարանի պաշտոնյաներից բացի, դրանում ընդգրկվելու են նաև կրթության, գիտության, մշակույթի և սպորտի նախարարության և քաղաքաշինության կոմիտեի ներկայացուցիչներ։
Նշենք, որ դրամական պարգև կստանա միայն մրցույթում հաղթող ճանաչված մասնակիցը։
«Հաղթանակ» զբոսայգու տարածքում 756 շինություն կա. թողնելը մի խնդիր է, քանդելը` մեկ այլ
