ԵՐԵՎԱՆ, 1 մարտի –Sputnik. ՀՀ կրթության, գիտության, մշակույթի և սպորտի նախարար Արայիկ Հարությունյանն անդրադարձել է հասարակության շրջանում լայն քննարկման առարկա դարձած ուսումնական հաստատություններում արտահերթ արձակուրդ հայտարարելու թեմային։
«Քաղաքացիական պայմանագիրը» չեղարկել է Մարտի 1-ի զոհերի հիշատակին նվիրված երթը
«Առավոտից հաղորդագրություններ եմ ստանում ուսումնական հաստատություններում արտահերթ արձակուրդ հայտարարելու հնարավորության մասին»,- Facebook-ի իր էջում գրել է նա։
Հարությունյանը հավաստիացրել է, որ հարցը գտնվում է նախարարության ուշադրության կենտրոնում։
«Որոշումների մասին անպայման կտեղեկացնենք ձեզ»,- նշել է նախարարն ու հիշեցրել, որ անհրաժեշտությունից ելնելով և լարվածությունը թուլացնելու համար վերջերս որոշում կայացվեց բացակայությունները զրոյացնելու վերաբերյալ:
Հարությունյանը ընդգծել է, որ բոլոր որոշումները բխելու են բացառապես երեխաների առողջությունը պաշտպանելու անհրաժեշտությունից, ինչից առավել կարևոր բան չկա:
Նախարարը հորդորել է հետևել միայն պաշտոնական լրահոսին:
Նշենք, որ ուսումնական հաստատություններում արտահերթ արձակուրդ հայտարարելու մասին քննարկումները թեժացան Հայաստանում կորոնավիրուսի առաջին դեպքի հայտնաբերման ֆոնին։
Հայաստանում կորոնավիրուսով վարակման առաջին դեպքը գրանցվել է անցած գիշեր. վարակվածը 29-ամյա մի տղամարդ է:
Հիշեցնենք, որ կորոնավիրուսով վարակված տղան կնոջ հետ օդանավով ժամանել էր փետրվարի 28-ին։ Նա ինքն էր դիմել բժշկի, նրա վիճակը լավ է. հիվանդանոց դիմելիս ջերմել է, հիմա նույնիսկ ջերմություն չունի։
Իրանից Հայաստան ՀՀ քաղաքացիներ եկել են ու դեռ կգան, սահմանները փակելու կարիք չկա. նախարար
Նախնական թեստը դրական եղել, կրկնակի թեստի արդյունքները հայտնի են դարձել Երևանի ժամանակով այս գիշեր ժամը երեքին։ Հատկանշական է, որ պացիենտի կնոջ թեստի պատասխանը բացասական է, այսինքն՝ նրա մոտ վիրուս չի հայտնաբերվել։
Իրանում ՀՀ դեսպանությունը երեկ հայտնել էր, որ փետրվարի 25-ից 28-ն ընկած ժամանակահատվածում օդանավով Հայաստան են տեղափոխվել ՀՀ 130 քաղաքացի և Հայաստանում օրինական կացության իրավունք ունեցող անձինք, իսկ ցամաքային սահմանով՝ 229: Ցամաքային սահմանով քաղաքացիների մուտքը Հայաստան ներկայումս շարունակվում է:
