Երևան

Բանգլադեշի սովետական շենքերը` գերմանացի լուսանկարչի ալբոմում. այն կարելի է գնել առցանց

427
(Թարմացված է 00:50 16.01.2020)
Հայկական ճարտարապետության հետաքրքիր նմուշների մասին պատմող յուրօրինակ գիրքը վաճառվում է գրքերի վաճառքի միջազգային առցանց հարթակներում։

ԵՐԵՎԱՆ, 16 հունվարի — Sputnik. 90-ականների Երևանը մնացել է ոչ միայն հայաստանցիների ու երևանցիների հիշողություններում, այլև արտասահմանցի այն արվեստագետների, ովքեր այդ տարիներին եղել են Երևանում ու շրջել մայրաքաղաքի ցուրտ ու մութ թաղամասերով։

Գերմանացի վավերագրող, արվեստաբան Ուրսուլա Շուլց Դորնբուրգը որոշել է հրատարակել ավելի քան 20 տարի առաջ` 1996-1997թթ–ին Երևանում արած իր լուսանկարները։

Ընդ որում, հրատարակության համար հետաքրքիր ձևաչափ է որոշվել, որի մտահղացման հեղինակը նույնպես Ուրսուլա Շուլցն է։ Երևանյան գրախանութներից մեկում 23 տարի առաջ հանդիպած աշակերտական օրագիրն այնքան էր հետաքրքրել արվեստագետին, որ գնել ու իր հետ տարել էր Եվրոպա։ 

Տարիներ անց նա որոշել է հենց այդ օրագիրն էլ վերածել Հայաստանում արված լուսանկարների յուրօրինակ ալբոմի։ Նկարներն օրագրի դատարկ էջերին փակցնելուց հետո Ուրսուլա Շուլցն այն նվիրել է դստերը` Ջուլիային, ով այդ տարիներին ճարտարապետություն էր ուսանում։

Հայ նկարիչը կոմիքս է նկարել խուլ երեխաների սուպեր ընդունակությունների մասին. լուսանկար

«Սիրելի´ Ջուլիա, 1996-ից ի վեր Երևան կատարած իմ տարբեր այցերի ժամանակ արված լուսանկարները ես փակցնում էի հայաստանյան աշակերտական օրագրի էջերին,– գրել է հեղինակն ալբոմի ընծայականում,– այս լուսանկարներից շատերն արվել են երևանյան մի թաղամասով իմ զբոսանքի ընթացքում, որը Բանգլադեշ են անվանում»։

Հեղինակը հույս է հայտնել, որ Հայաստանում իր հայտնաբերած սովետական ճարտարապետության եզակի ձեռագիրը, որի նմանը հնարավոր չէ գտնել Բասրելոնայում, ըստ արժանվույն կգնահատվի դստեր կողմից։

«1960- ականների էքստրեմալ ֆորմաներն ու 1970-ականների գույներն` իրենց տարատեսակ բազմազանությամբ, հրաժեշտի տխուր երեկույթ են հիշեցնում»,– անկեղծանում է Ուրսուլա Շուլցը` խոստովանելով, որ չէր կարող դադարել լուսանկարել։

Ուրսուլա Շուլց Դորնբուրգի լուսանկարչական խցիկը հետաքրքիր պատկերներ է արձանագրել նաև հայաստանյան վանքերում ու նույնիսկ Երևանի գերեզմանոցներում։

Լուսանկարչական ալբոմը հրատարակած MACK Books հրատարակչությունը որոշել է դրանում ոչինչ չփոխել։ Նորանկախ Հայաստանի պատկերներն ու դեռևս թարմ խորհրդային ճարտարապետության հետքերը հրատարակվել են հենց Երևանից գնված աշակերտական օրագրի ֆոնին, հեղինակի նախընտրած դիզայնով։

Լույս ընծայված նոր գիրքն արդեն հասանելի է գրքերի վաճառքի միջազգային առցանց հարթակներում։

427
թեգերը:
լուսանկարիչ, նկարիչ, Գերմանիա, երևանցիներ, Երևան
Ըստ թեմայի
Գյուլերի հայկական աչքը. Ստամբուլն` առանց սուլթանական շքեղության
Ինչպես հայ նկարիչը Թբիլիսիի այցեքարտը դարձավ
Հայ նկարիչը բիբլիական կերպարներ է ստեղծում թղթից ու ալյումինից. տեսանյութ