Ամանորի տոնավաճառ

Ամուսնության առաջարկություն` Փաշինյանի ուղերձին զուգահեռ. իվենթ-գործակալության գաղտնիքները

294
(Թարմացված է 14:54 30.12.2019)
Թեմատիկ երեկույթներ, դիմակահանդեսներ և նույնիսկ ամուսնության առաջարկություն․հայկական իվենթ-գործակալություններն Ամանորի գիշերը բազմաթիվ պատվերներ ունեն։ Մեզ հաջողվել է ծանոթանալ «ոչնչից» տոն են ստեղծող կազմակերպությունների ներքին խոհանոցին։

ԵՐԵՎԱՆ, 30 դեկտեմբերի — Sputnik, Ժաննա Պողոսյան. Ամանորի գիշերը Հանրապետության հրապարակում բազմաթիվ աստղերի մասնակցությամբ (այդ թվում՝ հայտնի երաժիշտ Գորան Բրեգովիչի) համերգը, ինչպես նաև վարչապետ Նիկոլ Փաշինյանի հրապարակից ուղիղ եթերով հեռարձակվող ուղերձը մարդկանց ոգևորել ու այդ օրը տարբեր ձև անցկացնելու բազմաթիվ գաղափարներ է ծնել։ Օրինակ` մի երիտասարդ որոշել է ամուսնության առաջարկություն անել հենց հրապարակում՝ Փաշինյանի ուղերձին զուգահեռ։ Երբ սիրելին պատասխանի, քաղաքում «կպայթեն» շքեղ հրավառությունները։ Հուսանք, որ աղջիկը կասի երկար սպասված «այո»-ն և կփորձի կենտրոնանալ իր ընկերոջ, այլ ոչ թե վարչապետի խոսքերի վրա։

Ամուսնության այդ կրեատիվ առաջարկության մասին Sputnik Արմենիային պատմեցին «Ֆորմատից դուրս» միջոցառումներ կազմակերպող գործակալությունից։ Գործակալության համահիմնադիր Վահե Թումանյանը ասաց, որ դեկտեմբերի 31-ին Հանրապետության հրապարակում ամուսնության մի քանի առաջարկություն կլինի։

«Մեզ հիմնականում դիմում են աղջիկները, որպեսզի մենք ռոմանտիկ երեկո, ընկերների ծննդյան տոներ կազմակերպենք և այլն։  Տղաները հիմնականում խնդրում են կազմակերպել ամուսնության առաջարկություն։ Մեկը խնդրում է հրավիրել ջութակահար, մյուսը՝ աճպարար, մեկն էլ՝ տավղահարուհի։ Ի դեպ, տավղահարուհու դեպքում երիտասարդը մեծ գումար էր վճարել նրա նվագի 15 րոպեի համար։ Բայց մենք փորձում ենք բավարարել մեր հաճախորդների բոլոր քմահաճույքները», - պատմում է Վահեն։

Նախընտրելի հանգստավայրեր` Ամանորը դիմավորելու համար. որ ուղղություններն են պահանջված

Նա նշում է, որ տարեց տարի իրենց ավելի շատ են դիմում բացառիկ տոներ կազմակերպելու խնդրանքով։ Այս Ամանորին նրանք գրեթե չունեն ստանդարտ կորպորատիվների պատվերներ, բոլորն ուզում են թեմատիկ երեկույթներ (ամենապահանջված թեման ռետրո ոճն է)։

«Modd Events» ընկերությունում նույնպես ջանասիրաբար աշխատում են թեմատիկ երեկույթներ կազմակերպելու վրա։ Ընկերության համահիմնադիր Արմենուհի Հարությունյանը պատմում է, որ ոչ միայն ընդհանուր ոճերով երեկույթներ են կազմակերպում, այլ նաև գրական ստեղծագործությունների թեմաներով։ Օրինակ` երկու տարի առաջ՝ 2018թ-ի նախաշեմին (Շան տարի) ընկերությունն ամանորյա կորպորատիվ է կազմակերպել Միխայիլ Բուլգակովի «Շան սիրտը» գրքի սյուժեով։

«Բոլոր աշխատակիցներին բաժանվեցին դերեր, համապատասխան հագուստ, տարածքը գրքում նկարագրված դարաշրջանի ոճով էր և այլն։ Յուրաքանչյուր միջոցառմանը մենք վերաբերվում ենք սեփական երեխայի նման․ամեն ինչ անում ենք թատրոնի և կինոյի խառնուրդ  ստեղծելու համար։ Մենք դրամատուրգիա ենք կառուցում. սցենար գրում՝ սկիզբով, կուլմինացիայով և ավարտով», - պատմեց Հարությունյանը։

Նա հավելեց, որ հիմնականում հետաքրքիր նախագծեր իրենք են առաջարկում, բայց երբեմն էլ օգնում է հաճախորդների երևակայությունը։

«Մեզ մոտ եկան մի ընկերության ներկայացուցիչներ, որոնք խնդրեցին «վատ» կորպորատիվ կազմակերպել։ Նախորդ Ամանորին ընկերությունը վատ փորձ էր ունեցել՝ ձանձրալի հաղորդավար և վատ երաժշտություն, և ղեկավարությունը որոշել էր հումոր անել աշխատողների հետ՝ կատակով կազմակերպելով նույն վատ երեկույթը։ Երբ բոլոր աշխատակիցները վերջնականապես կհիասթափվեն, հանդես կգան մեր դերասանները և կկազմակերպեն իսկական խելահեղություն։ Չենք ուզում բացել փակագծերը՝ ինտրիգը պահելու համար։ Հուսով ենք, որ աշխատակիցներից ոչ ոք չի զանգի ոստիկանություն», - ծիծաղում է Հարությունյանը։

Խոզի բուդն ու «Մայրաքաղաքայինն» օտար են. ինչ պետք է լինի Ամանորին իսկական հայկական սեղանին

Հանրապետության հրապարակում սպասվող Նոր տարվա բուռն տոնակատարությունը ոգևորել է հրապարակին կից գործող ռեստորաններին տոնական օրերին աշխատելու։ «Yeremyan Projects» ընկերության PR բաժնի ղեկավար Անահիտ Գևորգյանը մեզ հետ զրույցում ասաց, որ «Շերեփ» և «Պանդոկ Երևան» Ամիրյան մասնաճյուղի ռեսատորաններն Ամանորի գիշերն աշխատելու են։

Ամանորը մոտենում է լուռ, աղմուկը կլսվի տոներից հետո. ինչ անակնկալ է անելու 2020-ը

«Այդպիսով մենք կմիանանք Երևանի կենտրոնում ընթացող Ամանորի տոնակատարությանը։ Մեր ռեստորաններում Ամանորը կարելի է նշել համեղ ուտելիքով, լավ երաժշտությամբ, մեր փոքրիկ հյուրերին սպասվում են ամանորյա անակնկալներ», - պատմեց Գևորգյանը։

Նրա խոսքով` իրենք վաղուց արդեն պատվերներ ունեն դեկտեմբերի 31–ի գիշերվա համար։

294
թեգերը:
անակնկալ, տղա, աղջիկ, ամուսնություն, Նիկոլ Փաշինյան, Գորան Բրեգովիչ, Հանրապետության հրապարակ, Համերգ, Ամանոր, Երևան, Հայաստան
Ըստ թեմայի
Ինչպե՞ս Ամանորին ճիշտ նվեր ընտրել. պատասխանում են ՀՀ քաղաքացիները
«Մանդարինկա». Բուզովան բլոգեր Դավիթ Մանուկյանի հետ ամանորյա երգ է թողարկել
Ամանորին Հայաստանի պոլիկլինիկաները կաշխատեն