Երևան. արխիվային լուսանկար

Ինչ անել ուրիշի խախտման պատճառով վարորդական իրավունքից չզրկվելու համար. տեսանյութ

1330
(Թարմացված է 18:38 28.12.2019)
ՀՀ ոստիկանությունը տեսանյութ է տարածել, որտեղ պարզաբանել է հունվարի 1-ից ուժի մեջ մտնող նոր օրենքի որոշ դրույթներ։

ԵՐԵՎԱՆ, 28 դեկտեմբերի — Sputnik. 2020թ.–ի հունվարի 1-ից խախտում կատարած վարորդները ոչ միայն կտուգանվեն, այլև բալեր կկորցնեն։ Այս առիթով ՀՀ ոստիկանությունը նոր կարգի որոշ մանրամասներ պարզաբանող տեսանյութ է հրապարակել։

Պարզվում է` եթե ավտոմեքենան վարում է ոչ սեփականատերը, հետագա խնդիրներից խուսափելու ու վարորդական իրավունքից ուրիշի պատճառով չզրկվելու համար, նա նախապես պետք է առցանց համակարգով հայտնի, թե ով է իր ավտոմեքենան շահագործող վարորդը։

Ոստիկանության տեսանյութը քայլ առ քայլ ներկայացնում է roadpolice.am կայքում գրանցում կատարելու կարգը։

««Շահագործում» բաժնում քաղաքացին կարող է տեսնել, թե ինչ ավտոմեքենայի է կցված որպես վարորդ, իսկ «խախտումներ» բաժնում կարող է տեսնել, թե ինչ խախտումներ է թույլ տվել»,– պարզաբանվում է տեսանյութում։

Հիշեցնենք` հունվարի 1-ից ուժի մեջ մտնող նոր իրավակարգավորումներով`յուրաքանչյուր վարորդի ամեն տարվա համար տրվելու է 9 միավոր։ Յուրաքանչյուր խախտման համար այդ միավորները նվազելու են 0.5-4 միավորի չափով` կախված խախտման տեսակից ու ծանրությունից։

Տուգանքների նոր համակարգ ՃՈ–ից. ի՞նչ պետք է իմանան վարորդները

Եթե մեկ տարվա ընթացքում վարորդին տրված 9 միավորը սպառվի, նա 6 ամսով զրկվելու է վարորդական իրավունքից։ 6 ամիսը լրանալուց հետո վարորդական իրավունքը վերականգնվելու է և դարձյալ տրվելու է 9 միավոր։ Երկրորդ 9 միավորը մեկ տարվա ընթացքում սպառելու դեպքում, վարորդը վարորդական իրավունքից զրկվելու է արդեն 1 տարի ժամկետով, և վարորդական իրավունքը վերականգնվելու է միայն քննություն հանձնելուց հետո։

Ընդ որում, վարորդական իրավունքից ժամանակավորապես զրկված վարորդներին իրավունք է տրվելու մինչև ժամկետի լրանալը տեսական քննություն հանձնել ու ավելի շուտ վերականգնել կորցրած իրավունքը։

Միաժամանակ, նոր օրինագծերով նվազելու են տուգանքների չափերը։

Օրինակ` անսթափ վիճակում ավտոմեքենան վարելու համար գործող 150 000 տուգանքի փոխարեն կիրառվելու է 29 000 դրամ տուգանք, փոխարենը` անսթափ վարորդի բալերից հանվելու է միանգամից 4–ը։ Իսկ մեկ տարվա ընթացքում խախտումը կրկնելու դեպքում վարորդը 6 ամսով զրկվելու է վարորդական իրավունքից։

Իսկ եթե անսթափ վարորդը հանրային տրանսպորտի կամ տաքսու վարորդ է, նա վարորդական իրավունքից 6 ամսով կզրկվի հենց առաջին խախտման դեպքում։

Հայկական վարորդական վկայականների հարցը Ռուսաստանում մոռացության չի մատնվել. Կոսաչյով

Միավորների հաշվարկը համապատասխանեցվել է այսօր գործող տուգանքների չափերին։

Այսպես, 5000 դրամ տուգանք նախատեսող խախտումները հաշվարկվելու են 1 միավորի չափով, 20-25 000 դրամանոց խախտումները` 2 բալ։ 3 բալանոց խախտումները երկուսն են` ավտոմեքենայի հաշվառման համարանիշն այլ անձի հանձնելը և սահմանված արագությունը 31-50 կմ/ժ–ով գերազանցելը, որի համար գործող օրենքով նախատեսված է 100 000 դրամ տուգանք։ Իսկ 4 միավոր հանվելու է սահմանված արագությունը 51-80 կմ/ժ–ով գերազանցելու և անսթափ վիճակում ավտոմեքենա վարելու համար։

1330
թեգերը:
տեսանյութ, Օրենք, Ճանապարհային ոստիկանություն(ՃՈ), Տուգանք, վարորդական իրավունք, վարորդ
Ըստ թեմայի
Բաղդասարյան. «ՃՈ ակտերի բողոքարկման նոր կարգից կշահեն և՛ վարորդները, և՛ պետությունը»
Երևանում և հանրապետության բոլոր ճանապարհներին ՃՈ խմբերը 24 ժամ ծառայություն կիրականացնեն
Մեքենաների հոսքի պատճառով տեխանձնագրերը վերջացել են. ՃՈ ղեկավարի պարզաբանումները