ԵՐԵՎԱՆ, 27 դեկտեմբերի — Sputnik. 2100 չվերթով Ալմաթի–Նուր-Սուլթան ուղևորվող «Բեք Էյր» ավիաընկերության ինքնաթիռի կործանման հետևանքով զոհերի թիվը հասել է 15–ի, հայտնում է Sputnik Ղազախստանը։
Ավելի վաղ հայտնում էին, որ Ալմաթիի ավիավթարի հետևանքով 14 մարդ է զոհվել։ Այժմ հայտնի է, որ հիվանդանոցում մահացել է չարաբաստիկ չվերթի ևս մեկ ուղևոր։
Ինքնաթիռում, ընդհանուր առմամբ, եղել է 93 ուղևոր և անձնակազմի 5 անդամ։ 66–ը հիվանդանոց են տեղափոխվել, նրանցից 50–ին պահել են հիվանդանոցում, 6–ը ծանր վիճակում են, 6–ը` ծայրահեղ ծանր։ Տվյալներ կան, որ տուժած ուղևորներից 19–ը մանկական հիվանդանոց են տեղափոխվել։ Մի շարք վիրավորներ վիրահատությունների կարիք ունեն։
Համացանցում հայտնվել է կործանված ինքնաթիռից փրկված նորածնի լուսանկարը։
Այժմ Ալմաթիի օդանավակայանն արդեն սովորական ռեժիմով է աշխատում։
Ղազախստանի առաջին նախագահ Նուրսուլթան Նազարբաևը ցավակցություն է հայտնել դեպքի առիթով։
«Ցավում եմ կորստի համար ու ցավակցություն եմ հայտնում մահացածների հարազատներին ու մտերիմներին», – նշել է Նազարբաևը տելեգրամի իր ալիքում։
Ուղևորատար ինքնաթիռը կործանվել է Ղազախստանում Ալմաթայի մոտակայքում։ Խոսքը «Բեք Էյր» ավիաընկերության ինքնաթիռի մասին է, որը 2100 չվերթով ուղևորվում էր Ալմաթի–Նուր-Սուլթան։ Ինքնաթիռը մեկնել է ըստ ժամանակացույցի` տեղի ժամանակով 07:05, հետո կորել է ընդունիչներից։ Ինքնաթիռում 93 ուղևոր է եղել, այդ թվում` երեք նորածին, նաև անձնակազմի 5 անդամ։
Վերելքի ժամանակ այն կորցրել է բարձրությունը, հարվածել բետոնե պատնեշին ու բախվել երկհարկ շինությանը։
Որոնողափրկարարական գործողություններին, ընդհանուր առմամբ, մասնակցում են 976 մարդ, 70 միավոր տեխնիկա ու շտապօգնության 33 բրիգադ։ Դեպքի վայրում օպերատիվ–քննիչ խումբ է աշխատում, տարածքը փակված է։
Ղազախստանի ինդուստրիայի ու ենթակառուցվածքների նախարարությունը հայտնել է, որ «Բեք Էյր» ավիաընկերության աշխատանքը կասեցվել է։