ԵՐԵՎԱՆ, 17 դեկտեմբերի — Sputnik. ՀՀ առողջապահության նախարար Արսեն Թորոսյանի դեմ դատական հայցերն այնքան շատ են, որ նախարարը չի էլ հիշում` որն ինչ փուլում է գտնվում։ Թորոսյանը այս մասին հայտնեց Sputnik Արմենիայի հետ զրույցում` անդրադառնալով ԵՊԲՀ ռեկտոր, առողջապահության նախկին նախարար Արմեն Մուրադյանի` իր դեմ ներկայացված հայցին։
Հոկտեմբերի 2–ին Մուրադյանը դատական հայց էր ներկայացրել Թորոսյանի դեմ` զրպարտության համար։ Թորոսյանը մինչ այդ ասել էր, որ իր դեմ արշավ է սկսված, որը ղեկավարում է Արմեն Մուրադյանը։
«Դատական գործերով զբաղվում են փաստաբաններս։ Ճիշտն ասած` ես չեմ հետևում դրանց ընթացքին. ժամանակ չի լինում։ Իրոք, այնքան շատ են դրանք, որ տեղյակ չեմ` որն ինչ եղավ»,–ասաց նախարարը։
Թորոսյանը նշեց` հատուկ կարևորություն չի տալիս իր դեմ ներկայացված դատական հայցերին։
Հիշեցնենք, որ երեկ` դեկտեմբերի 17–ին, տեղի ունեցավ Արմեն Մուրադյանն ընդդեմ Արսեն Թորոսյանի հայցի քննարկման առաջին նիստը։ Դատավորը հետաքրքրվել էր՝ արդյո՞ք կողմերը պատրաստ են հաշտության գնալ։ Թորոսյանի ներկայացուցիչն ասել էր, որ իր վստահորդի հետ այդ հարցը չի քննարկել, Արմեն Մուրադյանի ներկայացուցիչն էլ իր հերթին նշել էր, որ պատասխանող կողմի դիրքորոշումը լսելուց հետո միայն կհայտնեն իրենց կարծիքը։ Դատական հաջորդ նիստը տեղի կունենա 2020 թվականի ապրիլի 8-ին՝ 11։50-ին։
Արմեն Մուրադյանը դատի է տվել Արսեն Թորոսյանին
Արսեն Թորոսյանի դեմ հոկտեմբերի 15–ին դատական հայց էր ներկայացրել նաև ՀՀ ԱՆ Ճառագայթային բժշկության և այրվածքների գիտական կենտրոնի լաբորատոր ախտորոշիչ բաժանմունքի վարիչ Դավիթ Գրիգորյանը։ Հոկտեմբերին Դավիթ Գրիգորյանը տնօրենի ժ/պ Գևորգ Սիմոնյանից աշխատանքային պայմանագիրը խզելու մասին ծանուցում էր ստացել: Ծանուցման մեջ Գրիգորյանին առաջարկվել էր բանվորի կամ տեխնիկի աշխատանք, քանի որ մասնագիտական պատրաստվածության որակավորմանը համապատասխան թափուր հաստիք չկա: Թեմային Facebook–ի իր էջում անդրադարձել էր ՀՀ Ազգային ժողովի առողջապահության և սոցիալական հարցերի հանձնաժողովի նախագահ Նարեկ Զեյնալյանը, որն աշխատանքային պայմանագիրը խզելու մասին ծանուցումը ցինիզմ էր որակել։
Դանիելյան. «Արսեն Թորոսյանի խոսքն ապատեղեկատվություն է, թող նա լսի վարչապետին»
Թորոսյանն արձագանքել էր Զեյնալյանի գրառմանը` գրելով, թե ցինիզմ չէ՞, որ Գրիգորյանը, բուժհիմնարկի նախկին տնօրինության հետ պայմանավորվածության համաձայն՝ շուկայականից գրեթե 3 անգամ մատչելի գնով սենյակ է վարձակալել ու պետական բուժհիմնարկի լաբորատորիայի ներսում սեփական մասնավոր լաբորատորիան բացել։
