ԵՐԵՎԱՆ, 20 նոյեմբերի — Sputnik. Հայաստանում կտրուկ ավելացել է այն տղաների թիվը, որոնք ոչ միայն մոդելինգով են զբաղվում, այլև ցանկություն են հայտնում մասնակցելու միջազգային գեղեցկության մրցույթների:Այս մասին Sputnik Արմենիայի հետ զրույցում հայտնեց գեղեցկության միջազգային մրցույթների հայաստանյան ներկայացուցչության տնօրեն Յանա Գրիգորյանը:
«Շատ գովելի է, որ տղաները ցանկություն են հայտնում մասնակցել գեղեցկության միջազգային մրցույթների: Տարիներ առաջ այդպես չէր: Ցավոք սրտի, Հայաստանում տղաների համար հովանավորներ գտնելը շատ ավելի բարդ է, քան աղջիկների»,-ասաց նա և ներկայացրեց այն մոդելներին, որոնք պատրաստվում են Հայաստանը ներկայացնել միջազգային մրցույթներում:
Հայ գեղեցկուհիները և «Արա գեղեցիկ»-ները`միջազգային բեմերում. ով որ մրցույթին է մասնակցելու
24-ամյա մոդել Էդգար Կրապետյանն այս տարի Հայաստանը կներկայացնի միանգամից երկու միջազգային մրցույթում, որոնք տեղի կունենան Ֆիլիպիններում. Mister Glam international 2019-ը կանցկացվի նոյեմբերի 24-30-ը և Mister Noble king 2019-ը կանցկացվի դեկտեմբերի 4-16-ը:
Էդգարը մասնագիտությամբ դիզայներ է, 19 տարեկանից զբաղվում է մոդելինգով: 2018 թվականին մասնակցել է նաև Հնդկաստանում անցկացվող Mister model worldwide հեղինակավոր մրցույթին և արժանացել 2 տիտղոսի՝ «Լավագույն տաղանդ» և «Լավագույն ոճային մոդել»։
Դրամական մրցանակ չկա. Հռիփսիմե Սարգսյանը «Միսս Երկիր» մրցույթում արծաթե մեդալ է նվաճել
«Կցանկանայի, որ մրցույթի շնորհիվ Էդգարն արտերկրում աշխատելու առաջարկ ստանա, որովհետև, ցավոք սրտի, Հայաստանում մոդելինգն այդքան էլ զարգացած չէ»,-ասաց Յանան:
Այս տարի Հայաստանը Man of the Globe International միջազգային մրցույթում կներկայացնի 20-ամյա Միկա Սարգսյանը: Մրցույթն այս տարի կանցկացվի Շրի Լանկայում փետրվարի 23-29-ը:
Միկան հետաքրքրությունների լայն շրջանակ ունի: Նա 6 տարի հաճախել է ֆուտբոլի: Եղել է «Բանանց» ֆուտբոլային ակումբի խաղացող: 8 տարի զբաղվել է շախմատով, 2 տարի` պրոֆեսիոնալ ֆիթնեսով, սովորել է Ջիվանու անվան աշուղական դպրոցի ժողովրդական երգեր բաժնում, նվագում է կիթառ: Միկան 2 տարի նորաձևության ոլորտում աշխատել է որպես մոդել: Հիմա նոր է վերադարձել բանակից, փորձում է հետ բերել առաջվա մարզավիճակը և լավացնել անգլերենի իմացությունը:
Հաջորդ միջազգային մրցույթը, որին իր մասնակցությունը կունենա նաև Հայաստանը, Mister Model of the Universe-ն է, որը կանցկացվի Հնդկաստանի Բանգալոր քաղաքում, հունվարի 20-30: Մեր մասնակիցը 22- ամյա Արմեն Սավչենկոն է, ծնունդով Չարենցավանից:
Ֆիլիպիններում ընտրեցին մոլորակի ամենագեղեցիկ աղջկան. տեսանյութ
Մասնագիտությամբ կենսաբան է: Ավարտել է Երևանի պետական համալսարանի կենսաբանության ֆակուլտետը, սակայն իր մասնագիտությամբ չի ցանկացել աշխատել: Սովորել է նաև Հայաստանի «Յու Քեն» մոդելային դպրոցում: Այժմ աշխատում է հասարակական կազմակերպությունում, որը Հայաստանում պայքարում է ՄԻԱՎ-ի տարածման դեմ: Նա այս տարի առաջին անգամ է մասնակցում միջազգային մրցույթի:
Իսկ դեկտեմբերի 16-23-ը Հնդկաստանի մայրաքաղաք Նյու Դելիում կանցկացվի Mister model worldwide մրցույթը: Հայաստանի մասնակիցը 21-ամյա Վլադիմիր Գաբրիելյանն է: Մասնագիտությամբ ապագա բժիշկ է: Մեծ սեր ունի երաժշտության հանդեպ: Նվագում է դաշնամուր, կիթառ, շեփոր, շրթհարմոն: 5 տարի զբաղվել է քիքբոքսինգով, այժմ տարված է ֆիթնեսով: Բիզնեսմեն է, ունի սնկի արտադրություն: Ազատ ժամանակ շախմատ է խաղում և համեղ ուտեստներ պատրաստում: Նա ևս առաջին անգամ է մասնակցում միջազգային մրցույթի:
Մեր զրուցակից Յանա Գրիգորյանն իր մասնակիցներին հաջողություն է մաղթում և հույս հայտնում, որ նրանք մոդելային ասպարեզում կգտնեն իրենց տեղը:
