ԵՐԵՎԱՆ, 12 նոյեմբերի - Sputnik. Սկսել փոքրիկ կրպակից ու տարիներ անց ունենալ հանրապետությունով մեկ սփռված խանութների ցանց կամ հիմնել միայն մեկ հաստոց ունեցող տպարան ու, ասենք, 5 տարի անց հայտնվել տպագրական առաջատար ընկերությունների եռյակում… Ինչպես կարելի է փոքր բիզնեսը ոչ միայն, ինչպես ասում են, «ջրի վրա պահել», չթողնել, որ խորտակվի, այլև այն զարգացնել ու մեծացնել…
Առաջին գործը, որ պետք է անի փոքր բիզնեսով զբաղվողը, սպառնացող մարտահրավերներին պատրաստ լինելն է: IBS Consulting Group բիզնես խորհրդատվական ընկերության հիմնադիր ու կառավարող գործընկեր, բիզնես փորձագետ Հայկ Մանասյանը Sputnik Արմենիայի հետ զրույցում ներկայացրել է այն հիմնական մարտահրավերները, որոնք անխուսափելի են, և հաճախ հենց դրանք են դառնում «բիզնեսի նավի խորտակման պատճառ»:
Փաշինյանն ուրախությամբ հայտնում է` միայն 1 օրում 1.5 միլիարդ դրամ է վերադարձվել բիզնեսին
Որքան էլ իդեան հզոր լինի, փողը որոշիչ է դառնում բիզնեսը ոտքի կանգնեցնելու համար
Այս հարցում բացառությունները քիչ են, դրա համար առաջին մարտահրավերը դառնում է սկզբնական կապիտալը կամ կանխիկ գումարի հոսքը: Սկզբնական փուլում և մրցակցության պայմաններում փոքր բիզնեսով զբաղվողները չեն կարողանում ապահովել սկզբնական կապիտալ, այսպես ասած, բյուջե կամ կանխիկ հոսքեր, որոնք նրանց հնարավորություն կտան ընդլայնվելու և ընդլայնված վերարտադրություն սկսելու: Այս մարտահրավերի հիմնական պատճառն այն է, որ այդ փուլում դեռ չկան մեծ ծավալի պատվեր և վաճառք, բայց արդեն իսկ մեծ ներդրումներ են արվում, օրինակ, բրենդավորման, սարքավորումների ձեռքբերման և այլնի համար: Այս փուլն անհրաժեշտ է որքան հնարավոր է շուտ հաղթահարել, որպեսզի հնարավոր դառնա առաջ գնալ: Եթե բիզնես պլանում այդ կանխիկի հոսքի կանխատեսումները ճիշտ չեն արվել, վաղ թե ուշ բիզնեսը կանգնում է սնանկացման խնդրի առաջ:
Սեփական «նոու-հաուն» պետք է իմանալ
Փոքր բիզնեսների համար լուրջ մարտահրավեր է փորձառության պակասը, երբ նրանք չունեն կուտակված համապատասխան փորձառություն, որ կարողանան մրցակցել գործող, արդեն կայացած բիզնեսների հետ և համապատասխանաբար ներգրավել նոր հաճախորդներ: Ու այստեղ կարևոր է սեփական «նոու-հաուն» ունենալ ու այն լավ իմանալ՝ ինչն է քեզ տարբերում, ինչն ես այլ կերպ անում և այլն: «Նոու-հաուն» պետք է լավ և հասկանալի ձևակերպված լինի:
Լավ է ունենալ 3 շատ որակյալ կադր, քան 10 միջակություն
Բիզնեսներից շատերը, չունենալով արդեն նշված փորձառությունն ու չունենալով իրենց «նոու-հաուն», եղած խնդիրը փորձում են լուծել անընդհատ նոր կադրեր ձեռք բերելով: Եվ այստեղ էլ մի նոր խնդիր է առաջանում՝ լավ, որակյալ կադրին ձեռք բերելու համար բարձր մեծ գումար է պետք, բայց երբ դու չունես այդքան ռեսուրս, որ կարողանաս «թանկ» կադրեր ձեռք բերել, ստիպված ես հարմարվել բյուջեի հնարավորություններին ու համապատասխան աշխատակիցներ ընտրել: Արդյունքում վարձում ես ոչ պրոֆեսիոնալ աշխատակիցներ, և դա նորից փակ շղթա է ստեղծում: Ոչ պրոֆեսիոնալը բիզնեսը երբեք առաջ չի տանի, լավագույն դեպքում նույն տեղում կդոփես: Դեռ Ստալինն էր ասում` ամեն ինչ որոշում են կադրերը:
Վանաձորցի ընտանիքի թալիսմանը մասուրն է, կամ զբոսաշրջիկները հիացած են հայկական ապուրով
Հանուն քանակի չի կարելի որակը զոհաբերել
Հաճախ փոքր բիզնեսները փորձում են արձագանքել բոլոր պատվերներին՝ իրականում չունենալով դրանք իրականացնելու համապատասխան ռեսուրս։ Հետևանքը լինում է այն, պատվերներն իրականացվում են ցածր որակով: Նրանց թվում է, թե այդ պատվերներն իրականացնելով՝ գումարը կավելանա, բիզնեսը կաճի, բայց ցածր որակով նման բիզնեսներն իրենք իրենց դուրս են մղում շուկայի մրցակցությունից:
Ի՞նչ են ուզում աշխատել Հայաստանի գյուղերում ապրող տղաներն ու աղջիկները
Շատ մի սիրահարվեք ձեր ապրանքին, փորձեք հասկանալ՝ արդյոք հաճախորդին էլ է այն այդքան դուր գալիս
Փոքր բիզնեսով զբաղվողները հաճախ շատ են տարված իրենց ապրանքով կամ ծառայությամբ: Դա նրանց խանգարում է լինել օբյեկտիվ, որովհետև բիզնեսը հիմնված է ապրանքի նկատմամբ իրենց սեփական կարծիքի, վերաբերմունքի վրա: Իրենք վստահ են՝ դա շատ լավն է: Նման վերաբերմունքը արգելափակում է զարգացման տեսլականն ու թույլ չի տալիս փոքր բիզնեսը մեծացնել:
Այս մարտահրավերներին պետք չէ մատների միջով նայել. համաշխարհային վիճակագրությունն ապացուցում է՝ որպես կանոն, եթե փոքր բիզնեսը չի աճում, ապա նրա մահն անխուսափելի է:
Այս թեմայով ավելին իմանալու համար կարող եք լսել Հայկ Մանասյանի և Արամ Չախոյանի զրույցը:
