ԵՐԵՎԱՆ, 7 նոյեմբերի — Sputnik. Կրթության, գիտության, մշակույթի և սպորտի նախարար Արայիկ Հարությունյանի հրաժարականը պահանջողներն այսօր պատրաստվում են գիշերել նախարարության առջև։ Այս մասին հայտարարեցին նստացույց անող ՀՅԴ Հայաստանի երիտասարդական միության ներկայացուցիչները, ինչպես նաև նրանց միացած ուսանողները։
«Արայիկ Հարությունյանը պետք է հրաժարական տա։ Մենք չենք պատրաստվում տուն գնալ, և մեր նստացույցը շարունակելու ենք այնքան ժամանակ, մինչև նա նման որոշում կկայացնի»,-ասացին նրանք։
Ի դեպ, բողոքի ակցիա անողները քնապարկեր են բերել` պատրաստվելով գիշերվան։
Հիշեցնենք, որ բողոքի ակցիան մեկնարկել է այսօր առավոտից, ապա վերածվել նստացույցի։ Նոյեմբերի 6-ին ԵՊՀ հայ բանասիրության և պատմության ֆակուլտետների ուսանողները վաղ առավոտից դասադուլ հայտարարեցին` բողոքելով աշխատանքային քննարկման դրված «Բարձրագույն կրթության մասին» օրենքի նախագծից, ըստ որի` «Հայոց լեզու», «Հայ գրականություն» և «Պատմություն» առարկաները պարտադիր չեն լինելու ոչ մասնագիտական ֆակուլտետների ուսանողների համար։
«Պատվով հեռացի՛ր». երիտասարդները շարունակում են պահանջել Արայիկ Հարությունյանի հրաժարականը
ՀՅԴ երիտասարդներն ու նրանց միացած ուսանողներն երեկ դատարկ արկղեր տարան ՀՀ կրթության, գիտության, մշակույթի և սպորտի նախարարության մուտքի մոտ` ասելով, որ բերել են, որպեսզի Արայիկ Հարությունյանը հրաժարական տալուց հետո իր իրերը դասավորի այդ արկղերում։ Արկղերը դատարկ էին, բայց դրանց վրա տարբեր գրություններ կային` «պատվով հեռացիր», «նվերներ», «ապազգային դրամաշնորհներ», «հագուստ» և այլն։
Արայիկ Հարությունյանի հրաժարականը պահանջող ցուցարարներն անժամկետ նստացույց են սկսել
Հարությունյանն էլ այսօր լրագրողների հետ զրույցում հայտարարեց, որ չի պատրաստվում հրաժարական տալ։ Իր հրաժարականի պահանջով հանդես եկող ՀՅԴ–ին էլ խորհուրդ տվեց փոխել իրենց ղեկավարներին։
